މިއަދު އިޢުލާންކުރި ނަތީޖާ އާއި އެކު، ޓަންޒޭނިއާގެ ޢާންމު އިންތިޚާބު ބޮޑު ތަނުން ރައީސް ސާމިއާ ސުލޫހޫ ހަސަން ކާމިޔާބުކުރައްވައިފިއެވެ. ސާމިއާ އަކީ މުސްލިމެކެވެ. ކްރިސްޓިއަނުންގެ މައި ޕާޓީ ބަލިކުރައްވައި، އެކަމަނާ އިންތިޚާބު ކާމިޔާބު ކުރެއްވީ 97.66 ޕަސަންޓް ވޯޓުންނެވެ.
ބޮޑެތި ޚިޔާލުތަފާތުވުންތަކާއި އެކު އިދިކޮޅު އެންމެ ބޮޑު ދެކެންޑިޑޭޓުންނަށް ވެސް ވާދަނުކުރެވޭ ގޮތަށް ކުރިޔަށް ގެންދިޔަ މި އިންތިޚާބާއި ގުޅިގެން މުޅި ޓަންޒޭނިއާގައި ދަނީ މުޒާހަރާ ކުރަމުންނެވެ، ބޮޑެތި ސިޓީތަކުގައި މިހާރު ކާފިއު އިޢުލާންކޮށްފައި ވާއިރު، އިންޓަނެޓް ވެސް ލިބެނީ ދޭތެރެދޭތެރެއިން ކަމަށް އެ ޤައުމުގެ ރައްޔިތަކު ބުނެފައި ވެއެވެ. އަދި މުޒާހަރާގެ ބައިވެރިންނާއި ދެކޮޅަށް ސަލާމަތީ ބާރުތަކުން ދަނީ އިންތިހާ އަށް ބާރުގެ ބޭނުން ކުރަމުން ކަމަށް ވެއެވެ.
2021 ވަނަ އަހަރުން ފެށިގެން ރައީސްކަން ކުރައްވާ ސާމިއާގެ މަރުތޭލާއި ކޯރާޑި ޖެހި ޕާޓީގެ ފުލް ކޮންޓްރޯލް އޮންނަ އިންތިޚާބީ ކޮމިޝަނުން އޮކްޓޯބަރު 29 ވަނަ ދުވަހު ބޭއްވި ރިޔާސީ އިންތިޚާބަކީ މިނިވަން އަދި އިންސާފުވެރި އިންތިޚާބެއް ނޫން ކަމަށް ބުނެ، އިދިކޮޅު ފަރާތްތަކުން ތުހުމަތު ކުރަނީ އިންތިޚާބުގެ ނަތީޖާ ވަނީ އޮޅުވާލާފައި ކަމަށެވެ.
Advertisement
މި އިންތިޚާބުގައި 17 ކެންޑިޑޭޓުންގެ ނަން ވޯޓުކަރުދާހުގައި އޮތަސް، ކޯޓުގައި ހިނގަމުންދާ މައްސަލަ ތަކާއި ގުޅިގެން އެންމެ ވަރުގަދަ އިދިކޮޅު ކްރިސްޓިއަން ދެލީޑަރުން ވަނީ އިންތިޚާބުން މަހުރޫމް ކޮށްލާފައެވެ.
އެފްރިކާގެ ދެވަނައަށް އެންމެ ބޮޑު އިޤްތިޞާދުގައި އިންތިޚާބާއި ގުޅިގެން ހަލަބޮލިކަން ކުރިމަތިވި ނަމަވެސް ރައީސް ސާމިއާ ވިދާޅުވަނީ ޤައުމު އަމާން ވަންދެން ކާފިއު ހިންގާނެ ކަމަށާއި، އިންތިޚާބަކީ އިންޞާފުވެރި އިންތިޚާބެއް ކަމަށެވެ.
ޓަންޒޭނިއާގެ އިންތިޚާބާއި ގުޅިގެން ހިނގަމުންދާ ހަމަނުޖެހުންތަކުގައި އެތައް ސަތޭކަ ބަޔަކު މަރުވެއްޖެ ކަމަށް އިދިކޮޅު ފަރާތްތަކުން ބުނެއެވެ. ނަމަވެސް އދ. އިން ބުނީ 10 މީހަކު މަރުވެފައިވާކަން ކަށަވަރުވެފައިވާ ކަމަށެވެ.
ޓަންޒޭނިއާގެ ކްރިސްޓިއަނުން ބުނާ ގޮތުގައި ޑިމޮކްރެޓިކް އުޞޫލުތަކާއި މުޅިން ޚިލާފަށް އިރުމަތީ އެފްރިކާގައި ބޭއްވި މި އިންތިޚާބުގައި ސަރުކާރު ހިންގާ ޕާޓީ ޗާމާ ޗާ މާޕިންޑޫޒީ (ސީސީއެމް) ގެ އަންހެން ލީޑަރު ވަނީ މުލައްދަނޑީގެ ބާރުގެ ބޭނުން ކޮށްފައެވެ.
ޓަންޒޭނިއާގެ އިލެކްޝަންސް ކޮމިޝަނުން ބުނީ އިންތިޚާބު އިންސާފުވެރި ކަމަށާއި، ރަސްމީ ނަތީޖާ އަށް ބަދަލެއް ނާންނާނެ ކަމަށެވެ.
