2028 ގެ ރިޔާސީ އިންތިހާބުގެ ވޯޓު ކަރުދާސްތައް ރާއްޖޭގައި ޗާޕުކޮށްފި ނަމަ ވޯޓު ކަރުދާހުގައި އެމަނިކުފާނުގެ ނަން އޮންނާނެ ކަމަށް ކުރީގެ ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެ އެވެ. އެމަނިކުފާނު މިހެން ވިދާޅުވެފައިވަނީ ބުރާސްފަތި ދުވަހުގެ ރޭ ޕީއެންއެފްގެ ޖަލްސާގައި ވާހަކަފުޅު ދައްކަވަމުންނެވެ.
ޔާމީން ވިދާޅުވީ ކޯޓުގައި އޮތް އެމަނިކުފާނުގެ މައްސަލައިގައި ސަލާމަތްވާނެ ކަމުގެ ފުރިހަމަ ޔަގީންކަން އެބައޮތް ކަމަށާއި އެމަނިކުފާނުގެ ލޯޔަރުންނާއި ލީގަލް ޓީމަށް ވެސް އެ ޔަގީންކަން އެބައޮތް ކަމަށެވެ.
ޔާމީން ވިދާޅުވީ ސަރުކާރުގެ އެތެރެއިން ކަންކަން ހިނގާ ގޮތާއި ރައްޔިތުންގެ މަޖިލިސް ތެރޭގައި ކަންކަން ހިނގާ ގޮތް އިނގިލައްވާ ކަމަށާއި ވަރަށް ގިނަ ބޭފުޅުން އެމަނިކުފާނުގެ ނަން ވޯޓު ކަރުދާހުގައި ނޯންނާނެ ކަމަށް ދަނީ ވިދާޅުވަމުން ކަމަށެވެ. ޔާމީން ވިދާޅުވީ އެމަނިކުފާނުގެ ނަން ވޯޓު ކަރުދާހުގައި ނެތް ނަމަ އެ ކަރުދާސްތަކަކީ ރާއްޖޭގައި ޗާޕުކުރާ ކަރުދާސްތަކެއް ނޫން ކަމަށެވެ.
Advertisement
"ސަރުކާރުގެ އެތެރެއިން ކަންކަން ހިނގާ ގޮތް އަޅުގަނޑަށް އެބަ އިނގޭ، ރައްޔިތުންގެ މަޖިލީހުގެ އެތެރެއިން ކަންކަން ހިނގާ ގޮތް އެބަ އިނގޭ. ހަމަ ކަށަވަރު ބަސް ދެމުން ދެމުން އެ އަންނަނީ ރައީސް ޔާމީންގެ ނަމެއް ވޯޓު ކަރުދާހުގައި ނޯންނާނެއޭ. އެހެންވެއްޖެއްޔާ އެ ވޯޓު ކަރުދާސް ދިވެހިރާއްޖެއަކު ނޫން ޗާޕުކުރާނީކީ. ރައީސް ޔާމީނުގެ ނަން އިރާދަކުރެއްވިއްޔާ ވޯޓު ކަރުދާހުގައި އޮންނާނެ." ޔާމީން ވިދާޅުވި އެވެ.
ނިމިދިޔަ ހަފްތާގައި ޔާމީން ވަނީ ކްރިމިނަލް ކޯޓުގައި ކުރިއަށްދާ ހިޔާނާތުގެ މައްސަލައިގެ ޝަރީއަތުގެ އަޑުއެހުމަށް ވަޑައިނުގަނެ ހއ. ދިއްދޫ އަށް ވަޑައިގެންފަ އެވެ. އެހެންކަމުން އެ އަޑުއެހުން ވަނީ ކެންސަލް ކޮށްފަ އެވެ.
އެމަނިކުފާނުގެ ވެރިކަމުގައި ވ. އާރަށް ކުއްޔަށް ދޫކުރުމުގެ މުއާމަލާތާ ގުޅިގެން ރިޝްވަތުގެ ގޮތުގައި އެއް މިލިއަން ޑޮލަރު ގަބޫލުކޮށް އެ ފައިސާ ލޯންޑާކުރި ކަމުގެ މައްސަލައިގެ އަޑުއެހުންތައް ސުޕްރީމް ކޯޓުގައި ނިމިފައިވާއިރު މިހާރު ވަނީ ހުކުމަކާ ހަމައަށް އައިސްފަ އެވެ. އަވަސް މުއްދަތެއްގައި ހުކުމް އިއްވޭނެ ކަމަށް އުންމީދުކުރެވޭ ކަމަށް ފަޑިޔާރު ބެންޗުން ވަނީ ވިދާޅުވެފަ އެވެ.
