ކެންސަރު ބަލިމީހުންނަށާއި ސާޖަރީކުރާ ބަލިމީހުންގެ ތަދު ކަނޑުވައިދޭ ފެންޓަނީލް ޕްރިކަސަރ ކެމިކަލްސް އެމެރިކާ އަށް އަލުން ދިނުމަށް ޗައިނާ އިން އެއްބަސް ވެއްޖެއެވެ. ޗައިނާ އިން މިގޮތަށް އެއްބަސްވީ މިއަދު ދެކުނު ކޮރެއާގައި ރައީސް ޝީ ޖިންޕިން އާއި ޑޮނަލްޑް ޓްރަމްޕް ބޭއްވި ބައްދަލުކުރެއްވުމަށް ފަހު ޓްރަމްޕްގެ އެދިވަޑައިގެންނެވުމަށެވއ.
ރަޝިޔާ އާއި ޔުކްރޭނު ހަނގުރާމައިގައި ޗައިނާ އިން ރަޝިޔާ އާއި އެއްކޮޅަށް އެރުމުން އެމެރިކާ އިން ވަނީ ޗައިނާ އަށް ދަތިކުރަން މަސައްކަތް ކޮށްފައެވެ. އެގޮތުން ޗައިނާގެ މުދަލުން ޓެރިފް ބޮޑުކޮށް ވިޔަފާރީގެ ބޮޑު ހަނގުރާމަެއް ޗައިނާ އާއި ދެކޮޅަށް ފެށިއެވެ. މިއާއި އެކު ޗައިނާއިން ކުރި ކަމަކީ އެމެރިކާއަށް މިދެންނެވި ބޭސް އުފައްދާ ކެމިކަލާއި އެނޫންވެސް ޓެކްނޮލޮޖީ އަށް ބޭނުންވާ ގިނަ ތަކެތި އެމެރިކާ އަށް އެކްސްޕޯޓު ކުރުން ލިމިޓްބކޮށްލީއެވެ. އެއާއި އެކު އެމެރިކާ ގާތްގަނޑަކަށް “ގޮތް ހުސްވި”އެވެ.
ކެންސަރާއި ސާޖަރީ ކުރާ ބަލިމީހުންގެ ބޮޑެތި ރިހުން ފިލުވައިދިނުމަށް ހޮސްޕިޓަލްތަކުން ދޭ ސިންތެޓިކް އޮޕިއޮއިޑް ފެންޓަނީލް އުފެއްދުމަށް ބޭނުންކުރާ މުހިއްމު މާއްދާތައް އެމެރިކާ އަށް ދިނުމުގައި ޗައިނާއިން ދަތިކޮށްލުމުން އެމެރިކާގެ ހޮސްޕިޓަލްތަކުގައި ތަދު ފިލުވާ ބޭސްތައް މަދުވެ، ކަޅު ބާޒާރުގައި ފޭކު ބޭސްތައް ވަނީ އިތުރުވެފައެވެ. އެމެރިކާގެ ކަޅުބާޒާރުގައި ވިއްކަން ފެށި މި ފޭކު ބޭސްތަކުގެ ސަބަބުން އެތައް ބައެއްގެ ފުރާނަ ގެއްލުނެވެ.
ޗައިނާއިން މި ބޭހުގެ ކެމިކަލް ކޮންޓްރޯލް ކުރުމާއެކު އެމެރިކާގައި ފޭކު ބޭސްތައް ޢާންމުވެ، މިދިޔަ އަހަރު އެމެރިކާގެ 80،000 މީހުން މަރުވި ކަމަށް ޔޫ.އެސް. ސެންޓަރސް ފޯ ޑިޒީސް ކޮންޓްރޯލް އެންޑް ޕްރިވެންޝަން (ސީޑީސީ)ން ބުންޏެވެ. އޭގެ ތެރެއިން ގިނަ މީހުން މަރުވީ ޗައިނާއިން އެޅި ދަތިކުރުމުގެ ފިޔަވަޅުގެ ސަބަބުން ކަމަށް އެމެރިކާގެ އިދާރާއިން ބުނެއެވެ.
ޗައިނާ އިން މި ދިން ލުޔާއި އެކު އެމެރިކާއިން ވެސް ދަނީ ޗައިނާ އަށް ކަންކަމުގައި ލުއި ދެމުންނެވެ. އަންނަ އަހަރު ކުރީކޮޅު ދެފައީސުން ޗައިނާގައި ބައްދަލުކުރެއްވުމަށް ވެސް މިހާރު ވަނީ ނިންމާފައެވެ.
