ނޭޝަނަލް އިންޓެގްރިޓީ ކޮމިޝަނުގެ ރައީސްކަމުގެ މަގާމަށް އެކޮމިޝަނުގެ މެންބަރު، ޝުއައިބު އަބްދުއްރަހްމާނު މިއަދު އައްޔަނުކޮށްފި އެވެ.

އެންއައިސީ އަށް ރައީސްކަމުގެ މަގާމަށް، ރައީސުލްޖުމްހޫރިއްޔާ ޑރ. މުހައްމަދު މުއިއްޡު ބޭފުޅަކު އައްޔަން ކުރެއްވީ، ނޭޝަނަލް އިންޓެގްރިޓީ ކޮމިޝަނު ގާނޫނުގައިވާ ގޮތުގެމަތީން، ރައީސްއަށް ލިބިދޭ ބާރުގެދަށުންނެވެ.

ނޭޝަނަލް އިންޓެގްރިޓީ ކޮމިޝަނުގެ ހަތަރު މެންބަރެއްގެ ދައުރު ހަމަވާތީ، ޝުއައިބު ހިމެނޭހެން ހަތަރު ބޭފުޅަކު އައްޔަނުކުރީ އިއްޔެ އެވެ. މިއީ، ޝުޢައިބު އެންއައިސީގެ މެމްބަރުކަމަށް އައްޔަނުކުރެއްވި ދެވަނަ ދައުރެވެ .ޝުއައިބު އެކޮމިޝަނުގެ ރައީސްކަމަށް އައްޔަންކުރައްވާފައިވަނީ ކުރިން ކޮމިޝަނުގެ ރައީސްކަމުގެ މަގާމުގައި ހުންނެވި ބޭފުޅާގެ ދައުރު ހަމަވުމާ ގުޅިގެންނެވެ. 

ނޭޝަނަލް އިންޓެގްރިޓީ ކޮމިޝަނަކީ، ގާނޫނު ތަންފީޒުކުރާ އިދާރާތަކާއި އެ އިދާރާތަކުގައި މަސައްކަތްކުރާ މުވައްޒަފުންނާގުޅޭ މައްސަލަތައް ބަލައި ފިޔަވަޅުއަޅާނެ އިޖުރާއަތުތަކާއި އުސޫލުތައް ކަނޑައެޅުމަށާއި، ނޭޝަނަލް އިންޓެގްރިޓީ ކޮމިޝަންގެ ގާނޫނު ތަންފީޒުކުރުމަށް ކުރަންޖެހޭ އެންމެހައި ކަންކަން ކުރުމަށްޓަކައި އުފައްދަވާފައިވާ ކޮމިޝަނެކެވެ.

މި ކޮމިޝަން އެކުލެވިގެންވަނީ ފަސް މެންބަރުންގެ މައްޗަށެވެ.