އެމެރިކާ އިން ފެށި ވިޔަފާރީގެ ހަނގުރާމަ ޗައިނާ އިން ކާމިޔާބުކޮށް އެމެރިކާ އަށް ވުރެ މާ ފަސޭހައިން ޗައިނާއިން “ނޭވާލަމުން”ދާކަމަށް ދަ އިކޮނޮމިސްޓް އިން ރިޕޯޓް ކޮށްފިއެވެ.

ޗައިނާގެ އިޤްތިޞާދު ކުރިއަރަމުންދާތީވެ ޓްރަމްޕު ކުރެއްވި ކަމަކީ ޗައިނާގެ މުދަލުން ނަގާ ޓެރިފް ބޮޑުކޮށް ޗައިނާގެ މުދަލަށް އެމެރިކާގައި ބަރޯސާވުން ކުޑަކުރުމަށް، އެމެރިކާގެ އެތެރޭގެ އުފެއްދުންތައް އިތުރު ކުރުމަށް ބޮޑެތި އެކްޝަންތައް ނެންގެވުމެވެ.

ރިޕޯޓުތައް ބުނާ ގޮތުގައި ޗައިނާގެ މުދަލަށް 100 ޕަސެންޓް ޓެރިފް ނަގާނެ ކަމަށް އެމެރިކާއިން އިޢުލާންކޮށް ހަރުކަށި އުޞޫލުތަކެއް ޗައިނާ އާއި ދެކޮޅަށް ތަންފީޛު ކުރުމަށް އިޢުލާންކުރި އިރުއްސުރެ ޗައިނާ އޮތީ މިއަދާއި ހަމަޔަށް ވެސް ވަރަށް “ކޫލް” ކޮށެވެ.

ޓްރަމްޕުގެ ވެރިކަމުގައި އޭނާ ގެންދަވަނީ ޗައިނާ އަށް ވަރަށް ބޮޑަށް “ފިއްތައިލުމަށް” މަސައްކަތް ކުރަމުންނެވެ. މި އަހަރުގެ މެއި މަހުގެ ނިޔަލަށް ޗައިނާގެ މުދަލުން ޓެރިފްގެ ގޮތުގައި 51.1 ޕަސަންޓް އެމެރިކާއިން ދިޔައީ ނަގަމުނެނެވެ.

ދެން ފެނުނީ އެމެރިކާ އިން މާބޮޑަށް ހައްދުފަހަނަ އެޅި މަންޒަރެވެ. ޗައިނާގެ ބައެއް ތަކެތިން ނަގާ ޓެރިފް 145 ޕަސެންޓާއި ހަމަޔަށް އެރުވިއެވެ. އެންމެފަހުން ޗައިނާއިން ވެސް ގޮތް ދުލެއް ނުކުރިއެވެ. ޗައިނާ އިން ކުރި ކަމަކީ އެމެރިކާގެ ބައެއް ތަކެއްތިން ނަގާ ޓެރިފް 146 ޕަސަންޓަށް ބޮޑުކޮށްލީއެވެ. އަދި ކިއެއްތަ ޗައިނާއިން ބަދަލުހިފީ ސުމާޓް ފޯނާއި ސެޓެލައިޓާއި ތިމާވެއްޓާއި ރައްޓެހި ޓެކްނޮލޮޖީގެ ބައިތަކާއި ހަތިޔާރުތަކަށް ބޭނުންވާ މަޢުދަން އެކްސްޕޯޓްކުރުން ވެސް ލިމިޓް ކޮށްގެންނެވެ.

ވިޔަފާރީގެ ހަނގުރާމައިގައި ޗައިނާއިން ކާމިޔާބު ހޯދަނީ ބިމުއަޑީގެ މަޢުދަންތަކުގެ އެކްސްޕޯޓް ކޮންޓްރޯލް ކޮށްގެންނެވެ.

ދުނިޔޭގެ ޒަމާނީ ޓެކްނޮލޮޖީއަށް އެންމެ މުހިންމު އަދި އެންމެ ތަދު މަޢުދަންތަކުގެ 70 ޕަސެންޓް ހުރީ ޗައިނާގައެވެ. އެމެރިކާ އިން ޗައިނާ އާއި ދެކޮޅަށް ވިޔަފާރީގެ ހަނގުރާމަ ފުޅާކުރުމާއި އެކު ޗައިނާއިން ކުރި ކަމަކީ އެމެރިކާ އަށާއި އެމެރިކާގެ ރައްޓެހި ޤައުމުތަކަށް އެކްސްޕޯޓްކުރާ މުހިންމު 17 ވައްތަރެއްގެ މަޢުދަން ލިމިޓް ކޮށްލީއެވެ. މިއާއި އެކު އެމެރިކާއަށް “އަރިދަފުސް ރޯގާ ޖެހި”، ވަރަށް ބޮޑަށް އެމެރިކާގެ “ނޭފަތުން ފެން އައިސް” އުނދަގޫތަކާއި ކުރިމަތިލާން ޖެހިއްޖެއެވެ. ޭކްނޮލޮޖީ އަށް ބޭނުންވާ މުހިއްމު ބައިތައް ހޯދުމަށް އެމެރިކާ އަށް ދަތިވެއްޖެއެވެ.

ވާނީ ވެސް އެހެންތާއެވެ. އެމެރިކާ އިން ޗައިނާ އާއި ކުރިމަތިލުމުން ޗައިނާއިން މި ހެދި ގޮތަކީ އެމެރިކާ އަށް ނުވިސްނި އޮތް “ބަލި ފައިގައި” ހިފައިލީއެވެ. އެއީ، ބެޓެރީ ތަކާއި އިލެކްޓްރިކް ވެހިކަލްތަކާއި އިންޖީނުތަކާއި ހަތިޔާރުތަކަށް ބޭނުންވާ މުހިންމު ބައިތައް އުފެއްދުމުގައި އެމެރިކާއަށާއި އެމެރިކާގެ ރައްޓެހި ހުރިހާ ޤައުމަކަށް ވެސް ފިއްތައިލުމެވެ. މުހިންމު މަޢުދަންތައް އެކްސްޕޯޓް ކުރުމުގައި ލިމިޓް ކޮށްލުމެވެ.

އެއާއި އެކު އެމެރިކާގެ ކަރުބުޑުގައި “ހިތިރަހަ” ލާން ފެށިއެވެ. “ނޭވާ ލުމަށް” އުނދަގޫވިއެވެ. އެމެރިކާ އަށް ދެން މަޖުބޫރުވީ ކޮންމެވެސް ވަރަކަށް ފަހަތަށް ޖެހި ޓެރިފް މައްސަލަ އަށް ލުއި ދިނުމަށެވެ.

އެމެރިކާއިން މިހާރު ގެންދަނީ ޗައިނާ އާއި މަޝްވަރާ ކޮށްގެން އެކަށިގެންވާ ޙައްލެއް ލިބޭނެ ގޮތެއް ފެނޭތޯ މަސައްކަތް ކުރަމުން ކަމަށް ޚަބަރު ލިބެއެވެ.