ޖުޑިޝަލް ސާވިސް ކޮމިޝަން (ޖޭއެސްސީ)ގެ ރައީސްކަމާއި މެންބަރުކަމުން މަޖިލީހުގެ މާފުށީ ދާއިރާގެ މެމްބަރު ހުސައިން ރިޒާ ކުއްލި ގޮތަކަށް އިސްތިއުފާ ދެއްވައިފި އެވެ.
ޖޭއެސްސީގައި ރިޒާ އިންނަވަނީ އެ ކޮމިޝަނަށް ރައްޔިތުންގެ މަޖިލީހުން އައްޔަންކުރާ މެންބަރުގެ ގޮތުގަ އެވެ. ރިޒާ ޖޭއެސްސީން އިސްތިއުފާދެއްވިކަން ޖޭއެސްސީން ވަނީ ހާމަކޮށްފަ އެވެ. ނަމަވެސް އޭނާ އިސްތިއުވާ ދެއްވި ސަބަބެއް ހާމައެއް ނުކުރެ އެވެ.
ޖޭއެސްސީގެ މެމްބަރުކަމުން ރިޒާ އިސްތިއުފާ ދެއްވިއިރު، ކްރިމިނަލް ކޯޓާއި މެޖިސްޓްރޭޓް ކޯޓުތަކަށް ފަނޑިޔާރުން އައްޔަން ކުރުމަށް މިރޭ ސުޕްރީމް ކޯޓުގައި ބޭއްވުމަށް ހަމަޖެހިފައިވާ ރަސްމިއްޔާތުވެސް ވަނީ ކެންސަލް ކޮށްފަ އެވެ. މި ރަސްމިއްޔާތު ކެންސަލްކުރި ވަކި ސަބަބެއްވެސް ޖޭއެސްސީން ހާމަކޮށްފައެއް ނުވެ އެވެ.
ރިޒާއަކީ ރައްޔިތުންގެ މަޖިލީހުގެ މެމްބަރުންގެ ތެރެއިން ޖުޑީޝަލް ސާވިސް ކޮމިޝަނަށް އައްޔަނުކުރި މެމްބަރެވެ. ޖޭއެސްސީގެ މެމްބަރުކަމަށް ރިޒާ އިންހާބުކުރީ ނިމިދިޔަ 2024 އަަހަރުގެ ޖޫން މަހުގެ 12 ވަނަ ދުވަހު އެވެ.
ޖޭއެސްސީ އެކުލެވިގެން ވަނީ ދިހަ މެމްބަރުންގެ މައްޗަށެވެ. އޭގެތެރޭގައި ރައީސުލްޖުމްހޫރިއްޔާ އައްޔަން ކުރައްވާ މެމްބަރަކާއި އެޓާނީ ޖެނެރަލް ހިމެނެއެވެ. އޭގެ އިތުރުން ރައްޔިތުންގެ މަޖިލިސް ރައީސް އާއި މަޖިލީހުގެ މެމްބަރުންގެ ތެރެއިން ބޭފުޅަކާއި މަޖިލީހުން އައްޔަން ކުރައްވާ އާއްމުންގެ މެމްބަރާއި އަދި މަޖިލީހުން ރުހުންދޭ ސިވިލް ސާވިސް ކޮމިޝަންގެ ރައީސް ހިމެނެއެވެ. ދެން ޖޭއެސްސީގައި ތިއްބަވަނީ ތިން މަރުހަލާގެ ކޯޓުތަކުގެ ތިން ފަނޑިޔާރެކެވެ.
