ދެކުނު ކޮރެއާގެ ދުނިޔޭގެ މަޝްހޫރު ކޭ-ޕޮޕް ބޭންޑް ބީޓީއެސްއިން އިންޑިއާގެ މުމްބާއީގައި ޝޯއެއް ބާއްވަން ނިންމައިފި އެވެ.
ލަފާކުރެވޭ ގޮތުގައި އަންނަ އަހަރު ބޭއްވުމަށް ހަމަޖެހިފައިވާ ޓުއާގެ ދަށުން ދުނިޔޭގެ 20 ސިޓީއެއްގައި ބީޓީއެސް އިން ޝޯ ދޭނެކަމަށް ރިޕޯޓުތަކުން ބުނެ އެވެ.
އެގޮތުން، ބީޓީއެސް އިން ދާދި ފަހުން ނެރެފައިވާ ރިޕޯޓެއްގައި ބުނެފައިވަނީ އެ ބޭންޑުގެ އަލްބަމެއް އެންމެ އަވަހަށް އާންމުންނާ ހަމައަށް ނެރެވޭނެ ކަމަށް ލަފާކުރަނީ އަންނަ އަހަރުގެ މާޗް މަހުގައި ކަމަށެވެ. މީގެ އިތުރުން ޝޯތައް ބާއްވާނެ ކަމަށް ލަފާކުރެވޭ އެހެން ސިޓީތަކުގެ ތެރޭގައި ލަންޑަން، ޕެރިސް، ޓޯކިޔޯ އަދި ލޮސް އެންޖެލެސް ހިމެނޭ ކަމަށް ރިޕޯޓްތަކުން ވަނީ ބުނެފަ އެވެ. ނަމަވެސް، މިހާތަނަށް އެ ބޭންޑުން މިކަން ރަސްމީކޮށް ހާމަކޮށްފައެއް ނުވެ އެވެ.
މިފަހަރުގެ ޓުއާ އަށް ތައްޔާރުވުމަށްޓަކައި، ބީޓީއެސްގެ ހުރިހާ ލަވަކިޔުންތެރިން މިހާރު ވަނީ އަސްކަރީ ހިދުމަތް ފުރިހަމަކޮށްފަ އެވެ. އަދި އަންނަ އަހަރު ނެރުމަށް ތައްޔާރުވަމުންދާ އާ އަލްބަމުގެ މަސައްކަތްތަކަށް އެ ފަރާތްތައް މިހާރު ދަނީ ތައްޔާރުވަމުންނެވެ.
އިންޑިއާގެ ފޭނުންނަށް މިއީ އާދަޔާހިލާފު އުފާވެރި ހަބަރެކެވެ. ސަބަބަކީ، 2020 ވަނަ އަހަރު ބީޓީއެސް އިން އިންޑިއާގެ މުމްބާއީގައި ޝޯއެއް ބާއްވަން ނިންމާފައިވީ ނަމަވެސް ކޮވިޑްގެ ބަލިމަޑުކަމާއި ގުޅިގެން އެ ފަހަރުގެ ޝޯ ކުރިއަށް ނުގެންދެވުނުތީ އެވެ.
އިންޑިއާގައި ބީޓީއެސްގެ ޝޯއެއް ބާއްވާނެ ކަމަށް ރިޕޯޓްކޮށްފައިވާއިރު، މިކަމަށް ބާރުދޭ އިތުރު ސަބަބެއް ވެސް އެބައޮތެވެ. އެއީ އެ ބޭންޑްގެ މައި ކުންފުނި ކަމަށްވާ ހައިބް އިން ދެކުނު އޭޝިއާގައި ވިޔަފާރި ފުޅާކުރުމުގެ ގޮތުން އޯވަސީސް ހެޑްކުއާޓަރެއް މި އަހަރު މުމްބާއީގައި ހުޅުވާފައިވުމެވެ. މިއީ އިންޑިއާގައި ކޭ-ޕޮޕްގެ މަގުބޫލުކަން އިތުރުވަމުންދާކަން ދައްކުވައިދޭ ކަމެކެވެ.
ބީޓީއެސް އަށް އިންތިޒާރުކުރާ އެތައް މިލިއަން ފޭނުންނަށް، އެ ބޭންޑުގެ ރަސްމީ އިއުލާނަކަށް މިހާރު އިންތިޒާރުކުރެވެމުންނެވެ.
