މެލޭޝިއާއަށް ވަޑައިގަންނަވަމުން ބޯޓަށް ތެޔޮ އަޅަން ޤަޠަރަށް މަޑުކުރައްވާ މަގުމަތީގައި ވެސް އެ ޤައުމުގެ އަމީރު ޝައިޚް ތަމީމް ބިން ޙަމަދު އަލް ޘާނީ އާއި ބައްދަލު ކުރައްވަން އެމެރިކާގެ ރައީސް ޑޮނަލްޑް ޓްރަމްޕް ބޭނުންފުޅުވެއްޖެ އެވެ.

ވައިޓް ހައުސްގެ އޮފިޝަލަކާއި ޙަވާލާދީ ރޮއިޓާސް އިން ބުނީ މި ބައްދަލުވުން އޮންނާނީ އެއާފޯސް ވަން ބޯޓުގައި ކަމަށާއި އެ ބޯޓުގައި ޓްރަމްޕާއި އެކު އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވެސް ބައިވެރިވާނެ ކަމަށެވެ.

ރިޕޯޓުތަކުން އެނގޭ ގޮތުގައި މި ބައްދަލުވުމުގައި އެމެރިކާ އިން ބަލާނީ ފައިސާކޮޅެއް ލިބޭނެ ގޮތެކެވެ. އެގޮތުން ޤަތަރާއި ދެމެދު ވިޔަފާރީގެ ގުޅުންތަކާއި ބެހޭ ގޮތުން މަޝްވަރާ ކުރައްވާނެ ކަމަށް ބެލެވެއެވެ.

މި ބައްދަލުވުމަކީ އެމެރިކާ ދައުލަތުގެ ރަސްމީ ދަތުރެއްގެ ތެރެއިން ކުރާ ކަމަކަށް ނުވިޔަސް، މެދުއިރުމަތީގައި އިއްތިޙާދުތައް ބަދަލުވަމުންދާ މި ދަނޑިވަޅުގައި އެމެރިކާއިން މަސައްކަތް ކުރަނީ ޤަލްފުގެ ޤައުމުތަކުގެ ބޮލަށް ސަވާރުވުމަށެވެ.