އިންޓަނެޓް މެދުވެރިކޮށް ހިންގާ ކުށްތައް ހުއްޓުވުމަށް މަސައްކަތްކުރާ އދގެ މުއާހަދާ (ޔުނައިޓެޑް ނޭޝަންސް ކޮންވެންޝަން އެގެއިންސްޓް ސައިބާކްރައިމް)ގައި ރާއްޖެއިން ބައިވެރިވެއްޖެ އެވެ.

މި މުއާހަދާގައި ރާއްޖެއިން ސޮއިކޮށްފައިވަނީ ވިއެޓްނާމުގައި މިހާރު ކުރިއަށްދާ ޔޫއެން ކޮންވެންޝަން އެގެއިންޓް ސައިބާ ކްރައިމްގެ ހައި ލެވެލް އޯޕެނިން ބައްދަލުވުމުގެ ތެރެއިންނެވެ. ރާއްޖޭގެ ފަރާތުން މި މުއާހަދާގައި ސޮއިކުރައްވާފައިވަނީ ފޮރިން މިނިސްޓަރު އަބްދުﷲ ހަލީލް އެވެ.

މިކަމާ ގުޅިގެން ފޮރިން މިނިސްޓަރު އަބްދުﷲ ހަލީލް އެކްސްގައި ހިއްސާކުރެއްވި ޕޯސްޓެއްގައި ވިދާޅުވީ، މި ނިންމުމަކީ ރައްކާތެރި ޑިޖިޓަލް މުސްތަގުބަލެއް ރާއްޖޭގައި ގާއިމުކުރުމަށް އެޅިގެންދާ މުހިންމު ފިޔަވަޅެއް ކަމަށެވެ.

މިނިސްޓަރު ހަލީލް ވިދާޅުވި ގޮތުގައި، ރާއްޖެފަދަ ތަރައްގީވަމުން އަންނަ ގައުމުތަކަކީ ސައިބާ ކްރައިމްގެ ޝިކާރައަކަށް ފަސޭހައިން ވެވިދާނެ ގައުމުތަކެއް ކަމަށާއި ސަބަބަކީ ސައިބާ ކްރައިމްތަކުން ރައްކާތެރިވުމަށް ބޭނުންވާ ވަސީލްތައް ނެތުން ކަމަށް މިނިސްޓަރު ވިދާޅުވި އެވެ. އެހެންނަމަވެސް ގޮންޖެހުންތަކާ އެކުގައިވެސް ރާއްޖެއިން ފަހަތަށް ނުޖެހި، ސައިބާ ކްރައިމް ހުއްޓުވުމަށް އަޅަން ޖެހޭ ފިޔަވަޅުތައް އަޅާނެކަމަށް މިނިސްޓަރ ހަލީލް ވިދާޅުވި އެވެ.

މި މުއާހަދާގައި ރާއްޖެއިން ބައިވެރިވުމަށް ރައްޔިތުންގެ މަޖިލީހުން ރުހުން ދީފައިވަނީ މިމަހުގެ 15 ވަނަ ދުވަހުގައިކަން ފާހަގަކޮށްލަން ޖެހެ އެވެ.