ވޯޓުލާން ޑިޖިޓަލް އައިޑީ ކާޑު ބަލައިނުގަންނާނެ ކަމަށް އިލެކްޝަންސް ކޮމިޝަނުން ބުނެފި އެވެ.
އިލެކްޝަންސް ކޮމިޝަނުން މިފަދައިން ބުނެފައި މިވަނީ، އަައްޑޫ ސިޓީގެ ވަކިވަކި ރަށްރަށުގައި ކައުންސިލްތައް ހެދުމަށް އާންމުންގެ ހިޔާލު ހޯދުމުގެ ވޯޓުގައި ބައެއް ފަރާތްތަކުން ވޯޓުލާން އަންނައިރު ޑިޖިޓަލް އައިޑީ ކާޑު ގެންދާތީ އެވެ.
މިއަދު ހެނދުނު 08:00ގައި ވޯޓުލުމުގެ ކަންކަން ފަށާފައިވާއިރު، މިހާތަނަށް ވޯޓު ލާފައިވަނީ އެންމެ 1،661 މީހުންނެވެ. އެއީ 17.35 އިންސައްތަ މީހުންނެވެ. އެހެންކަމުން އަދި ޖުމުލަ 7،915 މީހުން ވޯޓުލާން ޖެހޭނެ އެވެ. ވޯޓުލުމުގެ ކަންކަން މިއަދު ހަވީރު 04:00 އާއި ހަމައަށް މާލެ ސިޓީ އަދި އައްޑޫ ސިޓީ ހުޅުދޫ، މީދޫ އަދި ފޭދުގައި ކުރިއަށް ދާނެ އެވެ.
މާލެ ސިޓީއާއި އައްޑޫ ސިޓީގެ ތިން އަވަށުގައި ޖުމުލަ 18 ވޯޓު ފޮށި ބެހެއްޓުމަށް ވަނީ ހަމަޖެހިފަ އެވެ. އެގޮތުން މާލޭ ސިޓީގައި ހަތް ފޮށި ބަހައްޓާފައިވާއިރު، އައްޑޫ ސިޓީ ހުޅުދޫގައި ތިން ފޮށި، މީދޫގައި ތިން ފޮށި އަދި ފޭދޫގައި ފަސް ފޮށި ވަނީ ބަހައްޓައިފަ އެވެ. މާލޭގައި ވޯޓު ފޮށިތައް ބެހެއްޓުމަށް ހަމަޖެހިފައިވަނީ ކަލާފާނު ސްކޫލުގަ އެވެ.
އައްޑޫ ސިޓީ ހުޅުދޫ، މީދޫ އަދި ފޭދޫގައި ސިޓީ ކައުންސިލުން ވަކިވެފައިވާ ކައުންސިލްތަކެއް ހެދުމަށް ފެނޭތޯ ބެލުމަށް ނަގާ ވޯޓުގައި، ވޯޓުލުމުގެ ހައްގު ލިބިފައިވަނީ 9،576 މީހުންނަށެވެ. އެއީ އައްޑޫ ސިޓީ ހުޅުދޫއިން 2،874 މީހުންނާއި، މީދޫއިން 2،347 މީހުންނާއި، އަދި ފޭދޫއިން 4،355 މީހުންނެވެ.
އިލެކްޝަންސް ކޮމިޝަނުން ބުނެފައިވާ ގޮތުގައި، އައްޑޫ ސިޓީގެ ވަކިވަކި ރަށްރަށުގައި ކައުންސިލްތައް ހެދުމަށް އާންމުންގެ ހިޔާލު ހޯދުމުގެ ވޯޓުލުން ނިމުމާއެކު، ވޯޓު ގުނައި، އެ ފޮޓެއްގެ ކައިރީގައި ވަގުތީ ނަތީޖާ އިއުލާން ކުރާނެ އެވެ. މި ވޯޓުގެ ދާއިމީ ނަތީޖާ އިއުލާން ކުރާނީ އަންނަ އާދިއްތަ ދުވަހު އެވެ.
