ބޭންކިން ނިޒާމުގެ ތެރެއިން ގެދޮރު ގަތުމަށް ބޭނުންވާ ފައިސާ އަގުހޮޔޮކޮށް ހޯދައިދިުމަށް ފަންޑެއް ގާއިމުކޮށްފި އެވެ.

މި ފަންޑު ގާއިމުކުރީ މަރުކަޒީ ބޭންކް، އެމްއެމްއޭ އިން މިހާރު ގެޒެޓުކޮށްފައިވާ އިންކްލޫސިވް ނޭޝަނަލް އެފޯޑަބަލް ހައުސިން ސްކީމާ ބެހޭ ގަވާއިދުގެ ދަށުންނެވެ. އިންކްލޫސިވް ނޭޝަނަލް އެފޯޑަބަލް ހައުސިމް ސްކީމުގެ މައިގަނޑު މަގުސަދަކީ މާލެ ސަރަހައްދުގައި ގެދޮރު ގަތުމަށް ބޭނުންވާ ފައިނޭންސިން އަގުހެޔޮކަށް ލިބޭނެ މަގުފަހި ކޮށްދިނުމެވެ.

މި ސްކީމާއި ސްކީމުގެ ފަންޑު ގާއިމުކޮށް ހިންގުމުގެ ކަންކަން އިންކްލޫސިވް ނޭޝަނަލް އެފޯޑަބަލް ހައުސިން ސްކީމާ ބެހޭ ގަވާއިދުގައި ވަނީ ބަޔާންކޮށްފަ އެވެ.

މި ގަވާއިދުގެ ދަށުން އިންކްލޫސިވް ނޭޝަނަލް އެފޯޑަބަލް ހައުސިން ސްކީމާއި ސްކީމުގެ ފަންޑު ހިންގާނީ އެކަމަށް އެމްއެމްއޭއިން ކަނޑައަޅާ މާލީ އިދާރާއަކުންނެވެ. އަދި މި ފަންޑު މިހާރު ވަނީ ގަވާއިދާއެކު އުފެދިފަ އެވެ. މި ގަވާއިދުގައިވާ ގޮތުން އެމްއެމްއޭއިން އެހެން ގޮތަކަށް ކަނޑަނާޅާހާ ހިނދަކު، ކޮންމެ ބޭންކަކުން ވެސް، އެ ބޭންކަކަށް ލޯނާއި ދަރަނީގެ ގޮތުގައި ލިބެންޖެހޭ ޖުމުލަ ފައިސާގެ ތެރެއިން 10-15 ޕަސެންޓުގެ އަދަދެއް ފަންޑަށް ދޫކުރަންޖެހޭނެ އެވެ.

މި ސްކީމްގެ ދަށުން މާލީ އެހީތެރިކަން ދޫކުރަނީ ދެ ފެސިލިޓީއެއްގެ ދަށުންނެވެ. އެއީ ޓައިޕް އޭ ފައިނޭންސިން ފެސިލިޓީ(ލީސް އެންޑިން ވިތް އޯނާޝިޕް ފެސިލިޓީ) އާއި ޓައިޕް ބީ ފައިނޭންސިން ފެސިލިޓީ(އެންޑް-ޔޫޒާ ފައިނޭންސިސް ފެސިލިޓީ)

ކޮންމެ ބާވަތެއްގެ ފައިނެންސިން ފެސިލިޓީއަށް ދޫކުރާނެ ފަންޑުގެ މިންވަރު، ކަނޑައަޅާނީ އެމްއެމްއޭއިން އިންނެވެ. އަދި އެމްއެމްއޭއިން އެހެން ގޮތަކަށް ކަނޑަނާޅާހާ ހިނދަކު، ކޮންމެ ފައިނޭންސިން ފެސިލިޓީއެއްގެ މުއްދަތަކީ މަދުވެގެން 25 އަހަރެވެ. އަދި ފެސިލިޓީ ނަގާ ފަރާތުން މި މުއްދަތަށްވުރެ ކުރު މުއްދަތެއް ހަމަޖައްސަން އެދި ހުށަހަޅައިފައިވާނަމަ، އެ މުއްދަތެއް ހަމަޖެއްސިދާނެކަމަށް ގަވާއިދުގައި ބަޔާންކޮށްފައިވެ އެވެ.

މި ފަންޑުން ފައިނޭންސިން ފެސިލިޓީ ދޫކުރާނީ ގެދޮރުވެރިކަމުގެ މިލްކުވެރިކަން ނެތި އަލަށް ގެދޮރު ގަންނަ އަދި އެ އެމްއެމްއޭއިން ކަނޑައަޅާ އިތުރު ޝަރުތުތައް ފުރިހަމަވާ މީހުންނަށެވެ. ފަންޑުން ފައިނޭންސިން ފެސިލިޓީ ދޫކުރާނެ ބޯހިޔާވަހިކަމުގެ މަޝްރޫއުތަކާއި، ފައިނޭންސިން ފެސިލީޓީތައް ލިބުމަށްޓަކައި ފުރިހަމަވާންޖެހޭ ޝަރުތުތައް ކަނޑައަޅައި އެމްއެމްއޭއިން އާންމުކުރާނެ އެވެ.