ޖުލައި މަހު 26 ގައި ހުޅުވި ވެލާނާ އެއާޕޯޓުގެ އާ ޓާމިނަލުން އިނގިރޭސީވިލާތުގެ ގައުމީ އެއާލައިން ކަމަށްވާ ބްރިޓިޝް އެއާވޭސް އަށް ހިދުމަތްދޭން ފަށައިފި އެވެ. މި އެއާލައިނަށް ހިދުމަތްދޭން ފެށުން ފާހަގަކުރުމަށް ވެލާނާ އެއާޕޯޓުގައި ހާއްސަ ރަސްމިއްޔާތެއް ވަނީ ބާއްވާފަ އެވެ.
މިއަދު ހެނދުނު ބޭއްވުނު މި ރަސްމިއްޔާތު ޝަރަފުވެރި ކޮށްދެއްވީ އިނގިރޭސީވިލާތުން ރާއްޖެއަށް ކަނޑައަޅުއްވާފައި ހުންނަވާ އެކްޓިން ހައި ކޮމިޝަނަރު ތައުފީގު ވައްހާބު އެވެ. ބްރިޓިޝް އެއާވޭސްގެ އެއާޕޯޓް މެނޭޖަރު މުހައްމަދު ނިހާން އަދި އެމްއޭސީއެލްގެ އިސްވެރިންނާއި އޮފިޝަލުންވެސް ބައިވެރިވެވަޑައިގެންފައިވެ އެވެ.
މި ރަސްމިއްޔާތުގައި ބްރިޓިޝް އެއާވޭސްގެ ޗެކިން ކައުންޓަރުތައް ރަސްމީކޮށް ހުޅުވައި އެ ފުލައިޓުން ދަތުރުކުރި 126 ފަސިންޖަރުންނަށް ހަދިޔާ ދީފައިވެ އެވެ. އަދި ޓާމިނަލް 1 އަށް ކައިރިކުރި އެ އެއާލައިނުގެ ފުރަތަމަ މަތިންދާބޯޓު BA061 އިން ރާއްޖެ އައި 122 ފަސިންޖަރުންނަށް ވަނީ ސަގާފީ ހަރަކާތްތަކާއެކު ހޫނު މަރުހަބާއެއް ކިޔައިފަ އެވެ.
ބްރިޓިޝް އެއާވޭސް ގެ ދަތުރުތައް ރާއްޖެ ފަށާފައިވަނީ 2009 ވަނަ އަހަރު އޮކްޓޫބަރު މަހު 26 ގައެވެ. މި އެއާލައިނަކީ އިނގިރޭސީވިލާތުގެ ގައުމީ އެއާލައިނެވެ.
މި އެއާލައިންގެ ހިދުމަތް ޓާމިނަލް 1 އަށް ބަދަލުކުރުމާއެކު އެ ޓާމިނަލުން ހިދުމަތްދޭ އެއާލައިންތަކުގެ އަދަދު މިވަނީ 13 އަށް އަރާފަ އެވެ. އެ އެއާލައިންތަކަކީ؛
- މޯލްޑިވިއަން (ދިވެހިރާއްޖެ)
- އެއާ އަރަބިއާ (ސައުދީ އަރަބިއާ)
- ބިއޯންޑް (ޔުނައިޓްޑް އަރިބި އެމިރޭޓްސް، ދުބާއީ)
- ފިޓްސް އެއާ (ސްރީލަންކާ)
- ބެއިޖިންގ ކެޕިޓަލް އެއާލައިންސް (ޗައިނާ)
- ބަޓިކް އެއާ (މެލޭޝިއާ)
- ބެންގްކޮކް އެއާވޭސް (ތައިލެންޑް)
- އިންޑިގޯ (އިންޑިއާ)
- ގަލްފް އެއާ (ބަހްރެއިން)
- މެލޭޝިއާ އެއާލައިންސް (މެލޭޝިއާ)
- ސައުދިއާ އެއާލައިންސް (ސައުދީ އަރަބިއާ)
- ޗޮންޗިން އެއާލައިންސް (ޗައިނާ)
އެމްއޭސީއެލްގެ އަމާޒަކީ ރާއްޖެ އަށް ދަތުރުކުރާ ހުރިހާ އެއާލައިންތަކަށްވެސް އެންމެ ފުރިހަމަ އަދި އެންމެ މަތީ ފަންތީގެ ހިދުމަތް ފޯރުކޮށްދިނުމެވެ.
ޓާމިނަލް 1 ހުޅިވާފައިވަނީ މިއަަހަރު ޖުލައި މަހު 26 ގައެވެ. މި ޓާމިނަލުން އަހަރަކު ހަތް މިލިއަން ފަސިންޖަރުންނަށް ހިދުމަތް ދެވޭނެ އެވެ.
