އޮކްޓޯބަރު 18 ވަނަ ދުވަހު ޝިކާގޯގައި ބޭއްވި ކޮންސެޓެއްގައި ލަވަކިޔުންތެރިޔާ މޮނިކާއާ އެކު ޕާފޯމްކުރަމުން ދަނިކޮށް، ބްރެންޑީ ކުއްލިއަކަށް ސްޓޭޖް ދޫކޮށް ހިނގައްޖެ އެވެ. މިކަމުގެ ސަބަބުބް ސަޕޯޓަރުންނަށް ބޮޑު ހައިރާންކަމެއް ލިބިފައިވާއިރު ކޮންސެޓް ވެސް ވަނީ އެއާއެކު ނިންމާލާފަ އެވެ.
ބްރޭންޑީ ސްޓޭޖް ދޫކޮށް ގޮސްފައިވަނީ "ގިވް މީ އަ ސެކަންޑް ޔޫ އޯލް" މިހެން ބުނުމަށްފަހު އެވެ. ތިމަންނަ އަށް ވަގުތެއް ދޭށޭ ބުނެ ސްޓޭޖް ދޫކޮށް ދިޔުމަށް ފަހު އޭނާ އަލުން އަނބުރާ އައިސްފައިނުވެ އެވެ. އަދި އެ ދެމީހުންގެ މަޝްހޫރު ލަވަ ކަމަށްވާ "ދަ ބޯއި އިޒް މައިން" މި ލަވަ ޕާފޯމް ކުރެވޭ ގޮތް ވަނީ ނުވެފަ އެވެ.
ޖެހިގެން އައި ދުވަހު ބްރޭންޑީ ވަނީ އޭނާ އަށް ދިމާވި ހާދިސާ އޭނާގެ ފޭނުންނަށް ހިއްސާ ކޮށްފަ އެވެ. ބްރޭންޑީ ބުނެފައިވަނީ އެވަގުތު އޭނާ ހުރީ ދިގު ރިހާސަލްތަކާއި ޓުއާގެ ސަބަބުން ޑީހައިޑްރޭޓްވެ ވަރަށް ބޮޑަށް ވަރުބަލިވެފައިވާ ކަމަށެވެ. އަދި ސްޓޭޖް ދޫކޮށް ދިޔައީ ބޮލުގައި ރިއްސާފައި ހުރި ވަރުން ހޭނެތިގެން ވެއްޓިދާނެ ކަމުގެ ބިރު އޮތުމުން ކަމަށެވެ. އެންމެ ފުރަތަމަ އިސްކަމެއް ދޭން ޖެހޭނީ ސިއްހަތަށް ކަމަށް ބުނެ އޭނާ ވަނީ މޮނިކާ އަށާއި ކޮންސެޓް ބޭއްވުމަށްޓަކައި އިންތިޒާމުގެ ކަންތައްތައް ކުރިއަށް ގެންދިޔަ ފަރާތްތަކަށް ޝުކުރު އަދާކޮށްފަ އެވެ.
ކޮންސެޓް ދޫކޮށް ދިޔުމަށްފަހު ބްރޭންޑީ ދިޔައީ ޑޮކްޓަރަށް ދެއްކުމަށެވެ. ބްރޭންޑީ ބުނެފައިވަނީ އޭނާގެ ހާލު މިވަގުތު އަންނަނީ ރަނގަޅުވަމުން ކަމަށާއި، އިންޑިއާޕޮލިސް ގައި ކުރިއަށް އޮތް ޕާފޯމަންސް އަށް އަންނާނެ ކަމުގެ ޔަގީންކަން އަރުވާ ކަމަށެވެ.
ބްރޭންޑީގެ ސަޕޯޓަރުންނާއި އޭނާއަށް ހެޔޮ އެދޭ ފަރާތްތަކުން ވަނީ އޭނާ އަށް އަވަސް ޝިފާއަކަށް އެދޭ ކަމަށް ބުނެ ސޯޝަލް މީޑިއާގައި ހިއްސާކޮށްފަ އެވެ. ބްރެންޑީ އާއި މޮނިކާ ވެސް ވަނީ އެ ދެމީހުން އެކީގައި ޓުއާ ކުރިއަށް ގެންދަން ބޭނުންވާ ކަމަށް ބުނެފަ އެވެ.
ބްރެންޑީ އަކީ އެމެރިކާގެ މަޝްހޫރު ލަވަކިޔުންތެރިޔެއް އަދި އެކްޓްރެސް އެކެވެ. 1990 ގެ އަހަރުތަކުގައި މަޝްހޫރުކަން ހޯދި ބްރޭންޑީ އަކީ ދުނިޔޭގެ އެތައް ޒުވާން އާޓިސްޓުން އިންސްޕިރޭޝަނެއްގެ ގޮތުގައި ބަލަމުންދާ ފަންނާނެކެވެ.
