ކުރިއަށް އޮތް 20 އަހަރަށް ރާއްޖޭގެ ތަރައްގީގެ ޕްލޭން އެކުލަވާލުމަށްޓަކައި ސަރުކާރުން "ވިލުންތެރި ރާއްޖެ 2045" ނަމުގައި ކުރިއަށްގެންދާ ޕްރޮގްރާމްގެ ހިޔާލާއި މަޝްވަރާ ހޯދުމުގެ ބައްދަލަވުންތައް މާލޭގައި ފަށައިފި އެވެ.

ހިޔާލާއި މަޝްވަރާ ހޯދުމަށް މި ބައްދަލުވުން ކުރިއަށް ގެންދަނީ ވަށް މޭޒެއްގައި "ސެކްޓޯރަލް ރައުންޑްޓޭބަލް" މި ނަމުގައެވެ. ހާއްސަ ގޮތެއްގައި ތައުލީމާއި، ސިއްހަތާއި، ބޯހިޔާވަހިކަމާއި، މަސްވެރިކަމާއި، ތިމާވެއްޓާއި އަދި އެހެނިހެން ގިނަ ދާއިރާތަކުގެ ފަންނީ ބޭފުޅުން މި ބައްދަލުވުމުގައި ބައިވެރިވެ އެ ބޭފުޅުންގެ ހިޔާލާއި މަޝްވަރާ އެއްކޮށް މި ތަރައްގީގެ ޕްލޭންގައި އެކުލަވާލާނެ އެވެ. މުހިންމު 62 މައުޟޫއީ ދާއިރާއަކަށް ލަފައާއި އިރުޝާދު ހޯދުމަށް ބާއްވާ މި ބައްދަލުވުމުން އިއްޔެ ފަށާފައިވަނީ އުމަރު ޒާހިރު ބިލްޑިންގައި ގާއިމްކޮށްފައިވާ "ވިލުންތެރި ރާއްޖެ އޮފީސް" ގައެވެ.

ނޮވެމްބަރު މަހު ހަ ވަނަ ދުވަހުގެ ނިޔަލަށް ބޭއްވުމަށް ހަމަޖެހިފައިވާ މި ބައްދަލުވުމައި އެންމެ ފުރަތަމަ މަޝްވަރާކޮށް ހިޔާލު އެއްކުރެވިފައިވަނީ ރާއްޖެއަށް ދިމާވެފައިވާ އެންމެ ބޮޑު މައްސަލަ ކަމަށްވާ ބޯހިޔާވަހިކަމުގެ މައްސަލައާ ގުޅޭ ގޮތުންނެވެ.

މި ބައްދަލުވުންތަކުގައި ބައިވެރިވުމަށް އެދޭ ފަރާތްތަކުން "ނެކްސިޔާ މޯލްޑިވްސް" ގެ ވެބްސައިޓް މެދުވެރިކޮށް ރަޖިސްޓްރީވުމުގު ފުރުސަތު އޮންނާނެ އެވެ.

"ކުރިމަގު ސައްލާ" ގެ ނަމުގައި ރާއްޖޭގެ އަތޮޅުތަކުގައި މިހާރުވެސް މަޝްވަރާ ބައްދަލުވުންތައް ކުރިއަށް އެބަދެ އެވެ. ނެކްސިޔާ އިން ބުނެފައިވާ ގޮތުގައި ރަށްރަށުގައި ބާއްވަމުންގެންދާ ބައްދަލުވުންތަކުގައި ތަރައްގީގެ ޕްލޭނަށް ބޭނުންވާ މުހިންމު ގިނަ މައުލޫމާތުތަކެއް ދަނީ އެއްކުރެވެމުންނެވެ. އެގޮތުން ރައްޔިތުން އެންމެ ބޭނުންވާ ކަމަކީ އަތޮޅުތަކުގެ ރަށްތަކުގެ ގުޅުން މިހާރަށްވުރެ ބަދަހިކޮށް، ލޯކަލް އިގްތިސާދު ހަރުދަނާކޮށް މިހާރަށްވުރެ ރަނގަޅު ހިދުމަތްތަކެއް ފޯރުކޮށްދީ، އިޖުތިމާއީ އެއްބައިވަންތަކަން މިހާރަށްވުރެ އިތުރުކޮށް އަދި ވަކިވަކި ރައްކާތެރިކަން ކަށަވަރުކޮށް ގުދުރަތީ މާހައުލު ހިމާޔަތްކޮށް ވެއްޓަަށް ގެއްލުން ނުވާނެ ގޮތަކަށް ތަރައްގީ ދެމެހެއްޓެނިވި ޕްލޭން އެކުލަވާލުން ކަމަށްވެސް ނެކްސިޔާ އިން ބުނެފައިވެ އެވެ.

މި ބައްދަލުވުންތައް މިހާތަނަށް ރާއްޖޭގެ 20 އަތޮޅެއްގައި ވަނީ ކާމިޔާބުކަމާއެކު ބާއްވާފަ އެވެ. މި ބައްދަލުވުންތަކުގައި އެއްކުރެވޭ ހިޔާލާއި މަޝްވަރާ އެއްކޮށް ކުރިއަށް އޮތް 20 އަހަރު، ރައްޔިތުން ރާއްޖެ އޮންނަން ބޭނުންވާގޮތުގެ ތަސައްވުރު އެކުލަވާލައި، އެއަށް ގާނޫނީ ބާރުވެރިކަން ދިނުމަށް ސަރުކާރުން ވަނީ ނިންމާފަ އެވެ.