ބޭންކް އޮފް މޯލްޑިވްސް އިން ނެގި ލޯނެއް ނުދައްކައިގެން ހެވީލޯޑް މޯލްޑިވްސްގެ ތިން ރަށެއް ވިއްކާލުމަށް ބޭންކް އޮފް މޯލްޑިވްސް (ބީއެމްއެލް) އަށް ސިވިލް ކޯޓުން ދިން ހުއްދަ ހައިކޯޓުން އިއްޔެ ބާތިލުކޮށްފި އެވެ.
ހެވީ ލޯޑަކީ ރައްޔިތުންގެ މަޖިލީހުގެ ކުރީގެ ނައިބު ރައީސް ރީކޯ މޫސާ މަނިކުގެ މަސްލަހަތު އޮންނަ ކުންފުންޏެކެެވެ. ބޭންކް އޮފް މޯލްޑިވްސް ގެ ފަރާތުން ހެވީލޯޑްއަށް 11 މިލިއަން ޑޮލަރުގެ ލޯނެއް ދޫކޮށްފައިވަނީ 18 ޑިސެންބަރު 2016 ގަ އެވެ. މި ލޯނާ ގުޅިގެން ”ލ.ފަރެސް“ ގައިވާ ބިން އަދި ހަދަމުންދާ ރިސޯޓުގެ ހެޑްލީސް ރައިޓް އާއ،ި ”ލ.ބޮޑުހުރާ“ ގެ ހެޑްލީސް ރައިޓް އާއި ”ލ. ކުޑަފަރެސް“ ގެ ހެޑްލީސް ރައިޓް ބީއެމްއެލްއަށް ވަނީ ރަހުނު ކޮށްފަ އެވެ.
ލޯނު އެއްބަސްވުމާ އެއްގޮތަށް ހެވީ ލޯޑްއިން ބީއެމްއެލްއަށް ފައިސާ ނުދައްކާކަމަށް ބުނެ ސިވިލް ކޯޓަށް ހުށަހެޅި މައްސަލައަކާ ގުޅިގެން ދަރަނި ސާބިތުވާކަމަށް ކަނޑައަޅައި އެއްބަސްވުމާ އެއްގޮތަށް އަމަލުކުރުމަށް ހެވީލޯޑްގެ މައްޗަށް 13 ޖަނަވަރީ 2020 ގައި ކުރި ހުކުމާއެއްގޮތަށް ހެވީލޯޑްއިން ފައިސާ ދައްކާފައިނުވާތީ، ތަންފީޒީ މައްސަލައެއް ބީއެމްއެލްގެ ފަރާތުން ހުށަހެޅުމުން އެ ތިން ރަށް ވިއްކާލުމުގެ ހުއްދަ ސިވިލް ކޯޓުން ބީއެމްއެލްއަށް އޮތީ ދީފަ އެވެ. ސިވިލް ކޯޓުގެ މި ނިންމުން ހެވީލޯޑްގެ ފަރާތުން ހައިކޯޓުގައި އިސްތިއުނާފު ކުރުމުން އެ މައްސަލައިގައި ހައިކޯޓުން ހުކުމް ކޮށްފައިވަނީ އިއްޔެ އެވެ.
ހައިކޯޓުގެ ހުކުމުގައި ބުނެފައިވަނީ، ސިވިލް ކޯޓުގެ މަދަނީ އިޖުރާއަތުގެ ގަވާއިދުގައި ރަހުނު ވިއްކާލުމުގެ ހުއްދަ ދިނުމުގައި އަމަލުކުރާނެ ގޮތުގެ ސާފު އިޖުރާއަތު ބަޔާންކޮށްފައިވާ ކަމަށާއި، ސިވިލް ކޯޓަށް ރަހުނުކޮށްފައިވާ މުދާ ދެފަރާތުންވެސް އަގުކޮށް ހުށަހެޅިކަމާއ،ި އެ އަގުތަކުގައި ބޮޑު ފަރަގެއް ހުރިކަމާމެދު ހެވީލޯޑްއިން އަދި ބީއެމްއެލްގެ މެދުގައި ހިލާފެއް ނެތް ކަމަށެވެ.
އަދި ޝަރުއީ އަގު ކޮމިޓީގެ މަސައްކަތް ނުފެށި ލަސްވެ ދެ އަހަރާއި ހަތް މަސް ފާއިތުވެފައިވާއިރު، އެއީ ބީއެމްއެލްއަށް ގެއްލުން ލިބޭ ކަމެއް ކަމަށް ވާތިީ، ބީއެމްއެލްއިން ހުށަހެޅި އަގުތަކަށް ރިއާޔަތްކޮށް ރަހުނު ވިއްކާލުމުގެ ހުއްދަ ދިނުމަކީ އެންމެ އިންސާފުވެރިގޮތް ކަމަށް ސިވިލް ކޯޓުން ނިންމާފައިވާއިރު، ޝަރުއީ އަގުކޮމިޓީއަށް ރަހުނު މުދާ އަގުނުކުރެވި ދިގު މުއްދަތެއް ފާއިތުވެގެން ގޮސްފައިވަނީ ހެވީލޯޑްގެ އެއްވެސް އިހުމާލެއް އޮވެގެންކަން ނުވަތަ އެފަރާތުން ކުރަންޖެހޭ ކަމެއް ނުކޮށްގެންކަން ސިވިލް ކޯޓުގެ ހުކުމުގައި ބަޔާންކޮށްފައި ނުވާކަން ހައިކޯޓުން ފާހަގަކޮށްފައިވެ އެވެ.
އޭގެ އިތުރުން ސިވިލް ކޯޓުން ރަހުނު ވިއްކުމުގެ ހުއްދަ ދީފައިވާއިރު ރަހުނުތައް ވިއްކާލުމުގެ ވަކި ތަރުތީބެއް ކަނޑައަޅާފައިވެސް ނެތްކަން ހައިކޯޓުން ފާހަގަކޮށްފައިވެ އެވެ.
ބޭންކުން ހުށަހެޅި އަގަށް ރިއާޔަތްކޮށް ރަހުނު ވިއްކާލުމުގެ ހުއްދަ ދޭން ސިވިލް ކޯޓުން ނިންމާފައިވީ ނަމަވެސް، ހައި ކޯޓުގެ ހުކުމުގައިވަނީ ހަސްމުންގެ އެއްވެސް އިހުމާލެއް ނެތި، ޝަރުއީ އަގު ކޮމިޓީން މުދާ އަގުކުރުމުގައި ލަސްތަކެއްވާ ނަމަ، ކޯޓުން ކުރަންޖެހޭ ކަމަކީ އެ މަސައްކަތް އަވަސް ކުރުވުން ކަމަށެވެ.
"ހަސްމުންގެ އިހުމާލެއް ނެތް ހާލަތުގައި އެކަން ނުކުރެވުނު ކަމަށް ބަޔާންކޮށް މަދަނީ އިޖުރާއަތު ފުރިހަމަ ކުރުމެއް ނެތި ރަހުނު ވިއްކާލުމުގެ ހުއްދަ ދިނުމަކީ ރަނގަޅު ގޮތެއް ކަމުގައި ބެލެވޭކަށް ނެތް،" ހައި ކޯޓުގެ ހުކުމުގައިވެ އެވެ.
ހައިކޯޓުގައި މި މައްސަލަ ބައްލަވާފައިވަނީ، ފަނޑިޔާރު ހުސައިން މަޒީދު، ފަނޑިޔާރު މުހައްމަދު ފައިސަލް އަދި ފަނޑިޔާރު މުހައްމަދު ޝަނީޒް އަބްދުﷲ އެވެ.
