ރާއްޖޭގައި ގާއިމުކުރާ ދެވަނަ ވަގުފު ބިނާއިން އަހަރަކު 10 މިލިއަން އިސްލާމިކް ވަގުފު ފަންޑަށް ލިބޭނެކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު މިއަދު ވިދާޅުވެއްޖެ އެވެ.

މިނިސްޓަރު ޝަހީމް މި މޭރުމުން ވިދާޅުވީ އެކްސްގައި ހިއްސާކުރެއްވި ޕޯސްޓެއްގަ އެވެ. މިނިސްޓަރު ވިދާޅުވި ގޮތުގައި، ރާއްޖޭގެ ދެވަނަ ޒަމާނީ ވަގުފު ބިނާ (ދާރުލްއަރްގަމް)ގެ އަމަލީ މަސައްކަތް ފެށުމުގެ އެއްބަސްވުމުގައި މި މަހުގެ 26 ވަނަ ދުވަހު ސޮއިކުރުމަށް ހަމަޖެހިފައިިވާ ކަމަށެވެ. އަދި މިތަނުން އަހަރަކު 10 މިލިއަން އިސްލާމިކް ވަގުފު ފަންޑަށް ލިބޭނެ ކަމަށްވެސް މިނިސްޓަރު ވަނީ ވިދާޅުވެފަ އެވެ.

ދާރުލްއަރްގަމްގެ އިތުރުން ދާރުއްސަލާމްގެ ނަމުގައި ހުޅުމާލޭގައިވެސް ވަގުފު އިމާރާތެއް އެޅުމަށް ސަރުކާރުން ވަނީ ނިންމައިފަ އެވެ. ދާރުއްސަލާމް އިމާރާތުން އަހަރަކު 50 މިލިއަން ވަގުފު ފަންޑަށް ލިބޭނެކަމަށް ސަރުކާރުން ލަފާކުރެ އެވެ. މާލޭ ސަރަހައްދުގެ އިތުރުން އައްޑޫ ސިޓީ، ފުވައްމުލަކު ސިޓީ، ތިނަދޫ ސިޓީ، ކުޅުދުއްފުށި ސިޓީގެ އިތުރުން ގއ. ވިލިނގިލީގައި ވަގުފު މަޝްރޫއުއެއް ފެށުމަށް ރައީސް ޑރ. މުއިއްޒު ވަނީ ނިންމަވައިފަ އެވެ.

ވަގުފު މަޝްރޫއުތަކަކީ އިސްލާމީ ދާއިރާއިން ރައީސް ޑރ. މުއިއްޒުގެ ރިޔާސީ ވައުދުތަކުގައި ހިމެނޭ އެންމެ ބޮޑު މަޝްރޫއުތަކެވެ.