ވައިގެ ދަތުރުފަތުރުގެ ވިޔަފާރިތަކުގައި ދިވެހިންގެ ބައިވެރިވުން އިތުރުކުރުމަށްޓަކައި، ސިވިލް އޭވިއޭޝަން އޮތޯރިޓީ (ސީއޭއޭ) އިން އާ ގަވާއިދެއް ހަދައި ގެޒެޓުކޮށްފި އެެވެ.
ޓްރާންސްޕޯޓް މިނިސްޓްރީން ބުނީ މިއީ ވައިގެ ދަތުރުފަތުރުގެ ދާއިރާއިން ގައުމީ ފުދުންތެރިކަން އިތުރުކޮށް، ދިވެހި ވިޔަފާރިތަކަށް އިތުރު ބާރު ދިނުމަށް ސަރުކާރުން ހިންގާ މަސައްކަތްތަކުގެ މުހިންމު ބައެއް ކަމަށެވެ.
އެގޮތުން މި އާ ގަވާއިދުގެ ދަށުން ޖެނެރަލް ސޭލްސް އޭޖެންޓުންނާއި ޕެސެންޖާ ސޭލްސް އޭޖެންޓުންނާއި ކާގޯ ސޭލްސް އޭޖެންޓުންގެ ގޮތުގައި ރާއްޖޭގައި ހަރަކާތްތެރިވުމުގެ ހުއްދަ ދެވޭނީ، ސައްތައިން ސައްތަ ދިވެހި ކުންފުނިތަކަށް އެކަންޏެވެ. މިނިސްޓްރީން ބުނި ގޮތުގައި މިއީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ލަފާފުޅާ އެއްގޮތަށް ނިންމި ނިންމުމެކެވެ.
Advertisement
ކުރިން ގަވާއިދު އޮންނަގޮތުން ބޭރު ފަރާތެއްގެ 49 ޕަސެންޓް ހިއްސާ އޮތަސް އެކުންފުންޏަކަށް ރާއްޖޭގައި މިފަދަ ވިޔަފާރިތައް ކުރެވެ އެވެ.
ޓްރާންސްޕޯޓުން ބުނިގޮތުގައި އަލަށް މި އެކުލަވާލާ ގަވާއިދަކީ ވައިގެ ދަތުރުފަތުރު އަދި ޓްރާންސްޕޯޓް ދާއިރާއިން ލިބޭ މާލީ ފައިދާތައް ދިވެހި އިގުތިސާދަށް ހިފެހެއްޓުމަށް ވަރަށް މުހިއްމު ދައުރެއް އަދާކުރާނެ ކަމެކެވެ. އަދި ދިވެހިންގެ މިލްކުވެރިކަމަށް އިސްކަންދީ ލޯކަލް ވިޔަފާރިވެރިންނަށް ފުޅާ ދޮރުތަކެއް ހުޅުވުމާއެކު، ސަރުކާރުން މަސައްކަތްކުރަނީ އިންސާފުވެރި ވާދަވެރި މާހައުލެއް ގާއިމުކޮށް، ދިވެހި ކުންފުނިތަކުގެ ގާބިލުކަން އިތުރު ކުރުމަށް ކަމަށްވެސް މިނިސްޓްރީން ވަނީ ބުނެފަ އެވެ.
މި އާ ގަވާއިދާ ގުޅިގެމް ޓްރާންސްޕޯޓް މިނިސްޓަރު މުހައްމަދު އަމީން އެކްސްގައި ކުރެއްވި ޕޯސްޓެއްގައި ވިދާޅުވިގޮތުގައި މި އިސްލާހަކީ، ދިވެހި ވިޔަފާރިތަކަށް ކުރިއެރުން ދީ، އެ ވިޔަފާރިތައް އިތުރަށް ހަރުދަނާކުރުމަށްޓަކައި ގިނަ ދުވަސްތަކެއްވަންދެން އެދެމުންއައި ބަދަލެކެވެ.
އަދި މި ސިޔާސަތަކީ ގައުމުގެ އިގުތިސާދީ މިނިވަންކަން ހަރުދަނާކުރުމާއި، ދިވެހިންގެ އަމިއްލަ ބާރުތަކުން ދެމެހެއްޓެނިވި ކުރިއެރުން ހޯދުމަށް ރައީސް ޑރ. މުޢިއްޒު ގެންގުޅުއްވާ ދިގު ރާސްތާގެ ތަސައްވުރާ ވަރަށް އެއްގޮތް ސިޔާސަތެއް ކަމަށްވެސް މިނިސްޓަރު ވިދާޅުވި އެވެ.
ދިވެހި ވިޔަފާރިތަކަށް ފުރުސަތު ފަހިކުރުމުގެ ގޮތުން ސަރުކާރުން ދާދިފަހުން ވަނީ ފޮރިން އިންވެސްޓްމަންޓް އެންޓްރީ ކްރައިޓީރިއާވެސް އިސްލާހުކޮށް ދިވެހި ވިޔަފާރިތަކަށް ހާއްސަ ދާއިރާތަކެއް ކަނޑައަޅައި އެ ދާއިރާތަކުގައި ބިދޭސީ ކުންފުނިތަކުން ވިޔަފާރި ކުރުން މަނާކޮށްފަ އެވެ.
