ތެލަސީމިއާ ބަލި ތަހައްމަލުކުރަމުންދާ ކޮންމެ ކުއްޖަކަށް އަންނަ އަހަރުން ފެށިގެން ކޮންމެ މަހަކު 1،000 ރުފިޔާގެ އެލަވަންސެއް ދޭން ފަށާނެކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
ލ.ގަމުގެ ރައްޔިތުންނާ ބައްދަލުކުރައްވައި ވާހަކަފުޅުދައްކަވަމުން ރައީސް މިރޭ ވިދާޅުވީ ތެލަސީމިއާ އެލަވަންސްގެ ގޮތުގައި އަންނަ އަހަރު ކޮންމެ ކުއްޖަކަށް 1،000 ރުފިޔާގެ ރޭޓުން އެލަވަންސެއް ދިނުމަށް ނިންމަވައި އަންނަ އަހަރުގެ ބަޖެޓުގައި އެކަމަށް 11.7 މިލިޔަން ރުފިޔާ ހިމެނުމަށް ނިންމާފައިވާކަމަށެވެ. އަދި މި އެލަވަންސްގެ ސަބަބުން އެ ކުދިންނަށް މިހާރު ލިބޭ ފަރުވާއަށް އިތުރު އެހީތެރިކަމެއް ލިބިގެންދާނެ ކަމަށް ރައީސް ވިދާޅުވި އެވެ.
ރައީސް ވިދާޅުވި ގޮތުގައި ތެލަސީމިއާ ކުދިންގެ ގޮތުގައި 982 ކުދިން ރަޖިސްޓްރީވެފަ އެބަތިންބެވެ.
Advertisement
ތެލަސީމިއާ ކުދިންނަށް ފޯރުކޮށްދޭން ޖެހޭ ހިދުމަތްތައް ވީހާވެސް ބޮޑަށް ރަނގަޅުކުރުމުގެ ގޮތުން ސަރުކާރުން އަންނަނީ ގިނަ މަސައްކަތްތަކެއް ކުރަމުންނެވެ. އެގޮތުން މާލޭގައި ހުރި ތެލަސީމިއާ ސެންޓަރުން ދެމުން ގެންދިޔަ ހިދުމަތްތައް ހުޅުމާލެ އޮރެންޖް ހިޔާއަށް ވަނީ ބަދަލުކޮށްފައިވާއިރު އެކުދިންނަށް ފަސޭހައިން ސްޕެޝަލިސްޓް ޑޮކްޓަރުންނަށް ދެއްކޭނެ މަގުތަނަވަސް ކޮށްދީފައިވާއިރު ތެލަސީމިއާ ކުދިންނަށް ފަރުވާދިނުމުގައި މިހާރު ރާއްޖޭގައި ޔޫރަޕުގެ ޑޮކްޓަރުންވެސް ދަނީ ހަރަކާތްތެރިވަމުންނެވެ.
ރާއްޖޭގައި ތެލެސީމިއާ ކުދިންގެ އާބާދީ މަދުކުރުމަށް ކުރަމުންދާ މަސައްކަތުގެ ދަށުން ސްކޫލްތަކުގެ ގްރޭޑް 10 އެއްގައި ކިޔަވާ ދަރިވަރުން ތެލެސީމިއާއަށް ސްކްރީންކުރުމުގެ މަސައްކަތްވެސް ސަރުކާރުން ވަނީ ފަށާފަ އެވެ. އަދި ބޯންމެރޯ ޓްރަންސްޕްލާންޓް ހެދުމުގެ އިންތިޒާމު ދައުލަތުގެ ހަރަދުގައި ހަމަޖައްސައިދެއްވުމުގެ އިންތިޒާމު ހަރުދަނާކުރުމާއި ތެލެސީމިއާ ކުދިން ހަދަންޖެހޭ މުހިއްމު ބައެއް ޓެސްޓުތައް ރާއްޖޭގައި ހެދޭނެ އިންތިޒާމުވެސް ވަނީ ހަމަޖައްސަވާފަ އެވެ.
