ދުރު ރާސްތާއަށް ދެވަނަ އެއާޕޯޓެއް މި އަތޮޅުގައި އެޅުމަށް އެންމެ އެކަށޭނެ ރަށަކީ މާވަށް ކަމަށާއި އެ މަޝްރޫއު ފައްޓަވައިދެއްވާނެ ކަމުގެ ފެހި ސިގްނަލް ރައީސުލްޖުމްހޫރިއްޔާ ދެއްވައިފި އެވެ.
ރައީސުލްޖުމްހޫރިއްޔާ ވިދާޅުވީ މާވަށު ރައްޔިތުން އެއާޕޯޓެއްގެ ބޭނުން ވެފައި ހުރި މިންވަރު އެމަނިކުފާނަށް އިހުސާސްވެވަޑައިގަންނަވާ ކަމަށާއި އަވަސް މުސްތަގުބަލެއްގައި އެކަމަށް ގޮތެއް ނިންމަވާނެ ކަމަށެވެ.
މާވަށުގައި އެއާޕޯޓެއް ތަރައްގީ ކޮށްދެއްވުމަށް މާވަށު ކައުންސިލްގެ ރައީސް ވެސް ވަނީ ރައްޔިތުންގެ ފަރާތުން ރައީސަށް ދަންނަވާފަ އެވެ.
Advertisement
މިއަދު ހެނދުނުގެ ވަގުތެއްގައި ރައީސުލްޖުމްހޫރިއްޔާ މާވަށަށް ވަޑައިގެން ގިނަ މަޝްރޫއުތަކެއް ފައްޓަވައިދެއްވާ އަދި އިފްތިތާހުކޮށްދެއްވާފައިވެ އެވެ. އެގޮތުން؛
- ބީއެމްއެލްގެ އޭޓީއެމް އިފްތިތާހުކޮށްދެއްވުން
- ބޭންކް އޮފް މޯލްޑިވްސްގެ ގޮތްޕެއް ގާއިމްކުރުމުގެ މަސައްކަތް ފެއްޓެވުން
- ގޮޑުދޮށް ހިމާޔަތްކުރުމުގެ އަމަލީ މަސައްކަތް ފެއްޓެވުން
- ޕޮލިސް ސްޓޭޝަންގެ ބިންގާ އަޅުއްވައިދެއްވުން
- މަގުތައް ޒަމާނީ ފެންވަރަށް ހެދުމުގެ އަމަލީ މަސައްކަތް ފެއްޓެވުން
- އައުޓްޑޯ ވޮލީ ކޯޓުގެ އަމަލީ މަސައްކަތް ފައްޓަވައިދެއްވުން
- ފިޓްނަސް އެންޑް ރެކްރިއޭޝަން ސެންޓަރުގެ ބިންގާ އަޅުއްވައިދެއްވުން
- ވޭސްޓް މެނޭޖްމަންޓް ސެންޓަރުގެ އަމަލީ މަސައްކަތް ފައްޓަވައިދެއްވުން
- އައިސް ޕްލާންޓުގެ މަސައްކަތް ހަވާލުކުރެއްވުން
- ސްކޫލްގެ އައު އިމާރާތުގެ ބިނާކުރުމާއި ވަށާފާރު ރޭނުމުގެ މަސައްކަތް ހަވާލުކުރެއްވުން
- ބަނދަރު ތަރައްގީ ކުރުމުގެ މަޝްރޫއުގެ އެއްބަސްވުމުގައި އެމްޓީސީސީ އާއެކު ސޮއިކުރެއްވުން
މީގެ އިތުރުން މާވަށުގައި މި މަހުގެ އަށް ވަނަ ދުވަހު ފެށި ބިން ހިއްކުމުގެ އަމަލީ މަސައްކަތްވެސް ރައީސް ވަނީ ބައްލަވާލައްވައިފަ އެވެ. ބިން ހިއްކުމުގެ މި މަޝްރޫއުއަކީ އެމަނިކުފާނުގެ ރިޔާސީ ވައުދުފުޅެކެވެ. ޖުމްލަ 30 ހެކްޓަރުގެ ބިން ހިއްކުމަށް ހަވާލުކޮށް މަސައްކަތް ކުރަމުންދަނީ އެމްޓީސީސީ އިންނެވެ. ރައީސް ކުރިން ވައުދުވެފައިވަނީ 15 ހެކްޓަރުގެ ބިން ހިއްކައިދެެއްވާނެ ކަމަށެވެ. ނަމަވެސް ފަހުން ރައީސް ވަނީ 30 ހެކްޓަރުގެ ބިން މާވަށުގައި ހިއްކަވައިދެއްވާނެ ކަމަށް ވިދާޅުވެފަ އެވެ.
ރައީސް ވިދާޅުވީ ބިން ހިއްކައި ނިމުމުން އެ ބިމުގައި ފަށާނެ އެންމެ ފުރަތަމަ މަޝްރޫއުއަކީ ޒަމާނީ ފެންވަރެއްގެ ފުޓްބޯޅަ ދަނޑެއް މާވަށުގައި ތަރައްގީ ކޮށްދެއްވުން ކަމަށެވެ. އަދި އޭގެ އިތުރުން ހައުސިންގ މަޝްރޫއެއް ވެސް ފެށިގެންދާނެ ކަމަށް އެމަނިކުފާނު ވަނީ ވިދާޅުވެފަ އެވެ.
ރައީސް ވިދާޅުވީ މި ރަށުގެ ސިއްހީ ދާއިރާ ތަރައްގީކުރުމުގެ ގޮތުން މި މަސް ތެރޭގައި ކުންފުންޏަކާއެކު އެއްބަސްވުމުއް ހަދައި ހޮސްޕިޓަލެއް ގާއިމް ކުރުމުގެ މަސައްކަތް ފައްޓަވައިދެއްވާނެ ކަމަށެވެ. އަދި މިއަންނަ އަހަރު ރާއްޖޭގެ ސީ އެމްބިއުލާންސްގެ ފްލީޓު ފުޅާކޮށް، މި ރަށުގައި ގާއިމްކުރެވޭ ސީ އެމްބިއުލާސްގެ ހިދުމަތެއް އޮންނާނެ ކަމަށް އެމަނިކުފާނު ވިދާޅުވެފައިވެ އެވެ. އަދި މީގެ އިތުރުން ސްޕޯޓްސް ފިޝިންގ ބޮއެއް މި ސަރަހައްދުގައި ގާއިމްކޮށްދޭނެ ކަމަށް ވެސް އެމަނިކުފާނު ވަނީ ވައުދުވެފަ އެވެ. މިއީ ރައީސް ޑރ. މުޢިއްޒު، މާވަށަށް ވަޑައިގެންނެވި ދެވަނަ ފަހަރެވެ.
