ހޮނިހިރު ދުވަހަކީ އިނގިރޭސީ ޕްރިމިއާ ލީގުގެ ބޮޑެތި ކުލަބުތަކަށް ކާމިޔާބު ދުވަހެކެވެ. ޗެލްސީ، ސިޓީ، އަދި އާސެނަލް ވެސް މިވަނީ މޮޅުވެ ތިން ޕޮއިންޓު ހޯދާފަ އެވެ.

އެންމެ ފަހުގެ ދުނިޔޭގެ ޗެމްޕިއަން، ޗެލްސީ އިއްޔެ ހަވީރު ރަށުން ބޭރުގައި 0-3 ގެ ނަތީޖާއިން ނޮޓިހަމް ބަލިކޮށްފައިވާ އިރުމި މެޗުގައި ޗެލްސީގެ މަލޯ ގުސްޓޯ އަށް ވަނީ ރަތް ކާޑެއް ވެސް ދައްކާފަ އެވެ. މި މެޗުގެ ފުރަތަމަ ގޯލު ފުރަތަމަ ހާފުގައި ކާޟިޔާބުކުރީ ޖޯޝުއާ އަކީމް ޕޮންގެވެ. އޭނާ މި ގޯލު ޖަހާފައިވަނީ ޕެޑްރޯ ނެޓޯ ނަގައިދިނ ކްރޮހަކުން ބޮލުންނެވެ. ދެވަނަ ގޯލު ފަހު ހާފުގައި ޕެޑްރޯ ނެޓޯ ޖަހާފައިވަނީ ލިބުނު ހިލޭ ޖެހުމަކުންނެވެ. އަދި ތިން ވަނަ ގޯލު ރީސް ޖޭމްސް ޖަހާފައިވަނީ ލިބުނު ކޯނަރެއްގައި ނޯޓިންހަމްގެ ކުޅުންތެރިއެއް އެ ބޯޅަ ސާފު ކުރަން އުޅުމުގެ ތެރޭގަ އެވެ.

އެވަޓަންއާ ބައްދަލުކޮށް މެންޗެސްޓަރ ސިޓީ އިން މޮޅުވެފައިވަނީ 0-2 ގެ ނަތީޖާއިންނެވެ. މެޗުގެ ދެ ގޯލުވެސް ދެވަނަ ހާފުގައި ޖަހާފައިވަނީ ހާލަންޑެވެ. ފުރަތަމަ ގޯލު ނިކޯ އޯ'ރެލީ ނަގައިދިން ކްރޮހަކުން ބޮލުން ގޯލު ތެރެއަށް ވައްދާލި އިރު ދެވަނަ ގޯލު އޭނާ ޖެހީ ސަވީނިއީ ތަނަވަސްކޮށްދިން ފުރުސަތަކުންނެވެ. ހާލަންޑު ވަނީ މިދިޔަ ހަފްތާގައި އިޒްރޭލު ކޮޅަށް ހެޓް-ރިކެއް ވެސް ހަދާފަ އެވެ. ޕްރިމިއާ ލީގުގެ ލަނޑު ލިސްޓުގެ އެއްވަނައިގައި އޮތީ ވެސް އޭނާ އެވެ. ޖުމްލަ 11 ގޯލު މިހާތަނަށް މި ސީޒަނުގައި ޖަހާފައިވާއިރު ދެވަނައިގައި އޮތީ ބޯންމައުތްގެ ސެމެނޭޔޯ އެވެ. އެއީ ހަ ގޯލު ޖަހައިގެންނެވެ.

ރަށުން ބޭރުގައި ފުލަމް އަތުން އާސެނަލް މޮޅުވި މެޗުގައި މެޗުގެ ހަމައެކަނި ގޯލު 58 ވަނަ މިނެޓުގައި ޖަހައިދިނީ ޓްރޮސާޑެވެ. އޭނާ މި ގޯލު ޖެހީ ލިބުނު ކޯނަރަކުންނެވެ.

އާސެނަލްގެ މި މޮޅާއެކު ގްރޫޕްގެ އެއްވަނައިގައި ހަމަޖެހިލިއިރު ސިޓީ މިވަނީ ދެވަނައަށް ޖެހިލާފައެވެ. އަދި ޗެލްސީ މިވަނީ ހަ ވަނައަށް ޖެހިލާފަ އެވެ. ނަމަވެސް މިރޭގެ މެޗުތަކާ އެކު ތާވަލަށް ބަދަލު އަންނާނެ އެވެ.

ރޭގެ ކުޅުނު އެހެން މެޗުތަކަށް ބަލާއިރު؛

1. ބްރައިޓަން 2-1 ނިއުކާސަލް
2. ބާންލީ 2-0 ލީޑްސް
3. ޕެލެސް 3-3 ބޯންމައުތް
4. ސަންދަލެންޑް 2-0 ވުލްވްސް

ޕްރިމިއަރި ލީގުގައި މިރޭ ކުޅޭނެ މެޗުތަކަކީ؛

1. ޓޮޓެންހަމް - އެސްޓަން ވިލާ
2. ލިވަޕޫލް - މެންޗެސްޓާ ޔުނައިޓެޑް

ވެސްޓްހޭމް އާއި ބްރެންޓްފޯޑް ބައްދަލުކުރާ މެޗު އޮންނާނީ މާދަމާ ރޭ 00:00 ގަ އެވެ.