ވޯލްޑް ކަޕަށްފަހު ޗެލްސީގެ މިޑްފީލްޑަރު އެންޒޯ ފެނާންޑޭޒް އެނބުރި ކްލަބާ ގުޅޭއިރު، އޭނާގެ މުސްތަގުބަލާ މެދު ވަނީ ބޮޑު ސުވާލުތަކެއް އުފެދިފައެވެ. ޗެލްސީ ދޫކޮށް ރެއާލް މެޑްރިޑަށް ބަދަލުވާން ބޭނުންވާކަން ފާޅުގައި ހާމަކުރުމަށްފަހު، މިހާރު އޭނާ ތަހައްމަލު ކުރަމުންދަނީ އެއްވެސް ގޮތެއް ނެތް މާޔޫސީ ހާލަތެކެވެ.
އެންޒޯ އާއި އޭނާގެ އޭޖެންޓް ވަނީ ޗެލްސީ ދޫކޮށްލަން ބޭނުންވާކަން ތަކުރާރުކޮށް ހާމަކޮށްފައެވެ. ހާއްސަކޮށް ރެއާލް މެޑްރިޑަށް ދިއުމުގެ ޝައުގުވެރިކަން ފާޅުކޮށް، ސްޕޭންގައި ދިރިއުޅެން ބޭނުންވާ ކަމަށް އެންޒޯ ވަނީ ބުނެފައެވެ. ނަމަވެސް، ރެއާލް މެޑްރިޑުން ވަނީ ރަސްމީ ބަޔާނެއް ނެރެ، އެންޒޯ ހޯދުމުގެ އެއްވެސް ޝައުގުވެރިކަމެއް ނެތްކަން ކަށަވަރުކޮށްދީފައެވެ. އެ ކްލަބުން ބުނި ގޮތުގައި އެންޒޯއަށް އިހްތިރާމް ކުރި ނަމަވެސް، އޭނާ ސޮއިކުރުވުމުގެ އެއްވެސް މަސައްކަތެއް އެ ކްލަބުން ނުކުރާ ކަމަށެވެ.
މި ފަހަރުގެ ވޯލްޑް ކަޕަކީ އެންޒޯއަށް ވަރަށް ހިތްދަތި އަދި މައްސަލަ ބޮޑު މުބާރާތެކެވެ. ސެމީ ފައިނަލުގައި އިންގްލެންޑް އަތުން މޮޅުވުމަށްފަހު އޭނާ ދެއްކި ބޭ އަދަބީ އަމަލުތަކުގެ ސަބަބުން ގިނަ ބައެއްގެ ފާޑުކިޔުން އަމާޒުވިއެވެ. އަދި ސްޕޭނާ ދެކޮޅަށް ކުޅުނު ފައިނަލް މެޗުގެ ފަހު ވަގުތު އޭނާއަށް ދެއްކި ރަތް ކާޑުގެ ސަބަބުން އާޖެންޓީނާއަށް މެޗު ގެއްލި، އޭނާ ވެގެންދިޔައީ ސަޕޯޓަރުންގެ ކުރިމަތީގައި "ވިލަން" އަކަށެވެ.
Advertisement
އެންޒޯ ޗެލްސީ ދޫކޮށްލަން ބޭނުންވި ނަމަވެސް، އެކަން ކުރުމަށް އޮތް އެންމެ ބޮޑު ހުރަހަކީ ޗެލްސީން އޭނާއަށް ކަނޑައަޅާފައިވާ 120 މިލިއަން ފައުންޑްގެ އަގާއި، އޭނާ ސޮއިކޮށްފައިވާ އަށް އަހަރާއި ބައިގެ ދިގު ކޮންޓްރެކްޓެވެ. ޗެލްސީގެ އައު މެނޭޖަރު ޒަބީ އޮލޮންސޯ ވަނީ އެންޒޯ ކްލަބުގައި ބަހައްޓަން ބޭނުންވާކަން ހާމަކޮށްފައެވެ. އޮލޮންސޯ ބުނީ އެންޒޯއާ ވާހަކަދެކެވުނު ކަމަށާއި، އޭނާ ޗެލްސީގައި މަޑުކުރުވުމަކީ އޭނާގެ އެދުމެއް ކަމަށެވެ.
މިވަގުތު މެންޗެސްޓަރ ސިޓީ އާއި ޕީ.އެސް.ޖީ ފަދަ ކްލަބްތަކުން ވެސް އެންޒޯ ހޯދުމަށް ޝައުގުވެރިކަން ފާޅުކޮށްފައި ނުވާއިރު، އޭނާއަށް އޮތް ހަމައެކަނި ގޮތަކީ ޗެލްސީގައި މަޑުކޮށް، ސަޕޯޓަރުންނާއި ކްލަބާ ދެމެދު އުފެދިފައިވާ ނުތަނަވަސްކަން ހައްލުކުރުމެވެ. މިއީ އެންޒޯގެ ފުޓްބޯޅަ ކެރިއަރުގައި ކުރިމަތިވި އެންމެ އުނދަގޫ އެއް ވަގުތުކަން ފާހަގަކުރެވެއެވެ.
