އާރްބީ ލައިޕްޒިގަށް ކުޅެމުން އަންނަ އުންމީދީ ވިންގަރ ޔަން ދިއޮމާންޑޭ ހޯދުމަށް ސްޕެއިންގެ ގަދަބާރު ރެއާލް މެޑްރިޑުން ކުރަމުންދާ މަސައްކަތް ވަރުގަދަކޮށް، އެ ކްލަބުން މިހާރު މި ރޭހުގެ ކުރި ހޯދައިފިއެވެ.
މީގެކުރިން ރެއާލުން ވަނީ އުމުރުން 19 އަހަރުގެ ދިއޮމާންޑޭ ހޯދުމަށް 85.4 މިލިއަން ޕައުންޑް (100 މިލިއަން ޔޫރޯ) ގެ ބިޑެއް ހުށަހަޅާފައެވެ. ނަމަވެސް، ލައިޕްޒިގުން ވަނީ އެ ހުށަހެޅުން ބޭރުކޮށްލާފައެވެ. އެ ކްލަބުން ބޭނުންވަނީ އެއަށްވުރެ ބޮޑު އަދަދެއް ކަމަށް ރިޕޯޓްތައް ބުނެއެވެ. ހަބަރުތައް ބުނާގޮތުން، މިދިޔަ ހޮނިހިރު ދުވަހުގެ ރޭ ރެއާލް މެޑްރިޑުން ވަނީ ދިއޮމާންޑޭގެ ޓްރާންސްފާ އާއި ގުޅޭގޮތުން އެއްބަސްވުމަކަށް އައުމަށް ލައިޕްޒިގާއެކު މުހިންމު މަޝްވަރާތަކެއް ކޮށްފައެވެ.
މި ހޫނު މޫސުމުގެ ކުރީކޮޅު ދިއޮމާންޑޭ ބޭނުންވީ ޕީއެސްޖީއާ ގުޅުމަށެވެ. އަދި އެ ކްލަބާއެކު 2031 ވަނަ އަހަރާ ހަމައަށް އޭނާ ވަނީ އެއްބަސްވުމަކަށްވެސް އައިސްފައެވެ. ނަމަވެސް، މިހާރު ރެއާލް މެޑްރިޑުން ވެސް ވަނީ ދިއޮމާންޑޭއާ އެކު އަމިއްލަ ޝަރުތުތަކަށް އެއްބަސްވުމަކަށް އައިސްފައެވެ.
Advertisement
މި ޓްރާންސްފާ މާކެޓުގައި ހޯސޭ މޮރީނިއޯގެ އިރުޝާދުގެ ދަށުން ރެއާލް މެޑްރިޑް ފެންނަނީ ވަރަށް ހަރަކާތްތެރިކޮށެވެ. އެގޮތުން އެ ކްލަބުން ވަނީ ބެނާޑޯ ސިލްވާ، އިބްރާހިމް ކޮނާޓޭ، ޑެންޒެލް ޑަމްފްރީސް އަދި މާކް ކުކުރެއްލާ ފަދަ މުހިންމު ކުޅުންތެރިންތަކެއް މިހާރުވެސް ހޯދާފައެވެ. ރެއާލުން ދިއޮމާންޑޭ ހޯދުމަށް ބޮޑު ހުށަހެޅުމެއް ހުށަހެޅީ އެ ކްލަބުގެ ތަރި ވިނީޝިއަސް ޖޫނިއާގެ މުސްތަގުބަލާ މެދު ސުވާލު އުފެދިފައިވާ ދަނޑިވަޅެއްގައެވެ.
ދިއޮމާންޑޭ ހޯދުމަށް އިނގިރޭސި ވިލާތުގެ ލިވަޕޫލުން ވެސް ޝައުގުވެރިކަން ފާޅުކޮށްފައިވެއެވެ. ނަމަވެސް، އެ ކްލަބުން 85 މިލިއަން ޕައުންޑަށްވުރެ ބޮޑު އަދަދެއް ހޭދަކުރާކަށް ބޭނުމެއް ނުވެއެވެ. ލިވަޕޫލުން މި ހުށަހަޅާ އަދަދަކީ ވެސް ޕްރިމިއާ ލީގުގެ ރެކޯޑެކެވެ. މީގެ ކުރިން 2024 ވަނަ އަހަރު މެންޗެސްޓާ ޔުނައިޓެޑުން ލެނީ ޔޯރޯ ހޯދުމަށް ހޭދަކުރި 58.9 މިލިއަން ޕައުންޑްގެ ރެކޯޑް މި ހުށަހެޅުމާއެކު މުގުރާލެވޭނެއެވެ.
މީގެ އިތުރުން އާސެނަލް އަދި މެންޗެސްޓާ ސިޓީން ވެސް ދަނީ މި ކުޅުންތެރިޔާއަށް ފާރަލަމުންނެވެ. ޓްރާންސްފާ ބާޒާރު ބަންދުވާން ބާކީ ހަ ހަފުތާ އޮތްއިރު، މި ރޭސް އަދިވެސް އޮތީ ހުޅުވިފައެވެ. ނަމަވެސް މިވަގުތު އެންމެ ކުރީގައި އޮތީ ރެއާލް މެޑްރިޑެވެ.
