ޙަމާސްގެ އަސްކަރީ ވިންގުގެ ތަރުޖަމާނު އަބޫ އުބައިދާ ޝަހީދު ކޮށްލައިފި ކަމަށް ބުނެ އިސްރާއީލުންނާއި ބައިނަލްއަޤްވާމީ މީޑިއާތަކުން މިއަހަރުގެ އޮގަސްޓުމަހާއި ސެޕްޓެމްބަރުގެ ކުރީކޮޅު ފެތުރީ ދޮގު ޚަބަރުތަކެއް ކަމަށް މަސްދަރަކުން ބުނެފިއެވެ.

އަބޫ އުބައިދާ ޝަހީދުވި ކަމަށް ބައިނަލްއަޤްވާމީ ބައެއް މީޑިއާތަކުން އަދި އޭނާގެ ވިކިޕީޑިއާ ޕްރޮފައިލްގައިވެސް ލިޔެފައިވާތީ ޚުލާޞާއިން ވަކި ކަންތަކެއް ބެލުމަށްފަހު އޭރު ލިޔުނު ޚަބަރު ތިރީގައި މިވަނީއެވެ.

އަބޫ އުބައިދާ ޝަހީދު ނުވާ ކަމަށް ޚަބަރު ދިން މަސްދަރުން އޭނާ މިވަގުތު ހުންނެވި ތަނެއް ބުނެފައެއް ނުވެއެވެ. އެ މަސްދަރުން ބުނީ އޭނާގެ ވައަތް ވަރަށް ބޮޑަށް ޒަޚަމް ވެފައިވާ ކަމަށާއި ކަށިގަނޑުގެ ވާތްފަޅިވެސް ވަރަށް ބޮޑަށް ޒަޚަމްވެފައިވާ ކަމަށެވެ.

އިސްރާއީލާއި ގުޅުން ހުރި ބައެއް މަސްދަރުތަކުން އަބޫ އުބައިދާގެ ޢާއިލާއަށް އޭނާގެ ޝަހީދު ވެފައިވާ ހަށިގަނޑު ފެނިފައިވާ ކަމަށް ވެސް ބުނެފައި ވެއެވެ. ނަމަވެސް އެއިން އެއްވެސް ވާހަކައެއް ޙަމާސް އިން ކަށަވަރުކޮށްދީފައެއް ނުވެއެވެ.

އިސްރާއީލުން ހިންގާ ވިކިޕީޑިއާގައިވާ އުބައިދާގެ ބަޔޮގްރަފީގައިވެސް ވަނީ އޮގަސްޓް 30 ގައި އޭނާ ޝަހީދުކޮށްލާފައިވާ ކަމަށް ލިޔެފައެވެ.

ޔަހޫދީ ބޮޑުވަޒީރު ނަތަންޔާހޫ އާއި ޑިފެންސް މިނިސްޓަރު އިސްރާއީލް ކަޓްޒް ވަރަށް ޔަޤީންކަމާއި އެކު އޭރު ބުނީ އޮގަސްޓް 30ވަނަ ދުވަހު ރިމާލް އަވަށަށް އިސްރާއީލް ޑިފެންސް ފޯސް އިން ދިން ޙަމަލާތަކުގައި އަބޫ އުބައިދާ ޝަހީދުވެއްޖެ ކަމަށާއި އޭނާއާއި އެކު އިތުރު 11 މީހުން ޝަހީދުކޮށްލި ކަމަށެވެ. ނަމަވެސް މިކަމުގެ ސާފު އެއްވެސް ހެއްކެއް ޔަހޫދީ ސަރުކާރުން މިހާތަނަށް ހާމައެއް ނުކުރެއެވެ.