ދުންފަތާއި ދުރަށް ވަޑައިގަތުމަށް އިޓަލީގެ ބޮޑުވަޒީރު ޖޯޖިޔާ މެލޯނީގެ އަރިހުގައި ތުރްކިޔޭގެ ރައީސް ރަޖަބް ޠައްޔިބް އެރްދޮޣާން އެދިވަޑައިގެންނެވުމުން، "މީހަކު މަރައިލެވިދާނެތީވެ" ދުންފަތުގެ އިސްތިޢުމާލުކުރުމާއި ދުރަށް ވަޑައިގެންނެވެން ނެތް ކަމަށް ވިދަޅުވެ މެލޯނީ ސަމާސާކުރައްވައިފިއެވެ.

13 އަހަރުގެ މެދުކެނޑުމަކަށް ފަހު އަނެއްކާވެސް އާދަޔާއި ޚިލާފަށް ގިނައިން ދުންފަތުން އިސްތިޢުމާލުކުރައްވާ މެލޯނީގެ ގާތު އެއާއި ދުރަށް ވަޑައިގަތުމަށް ރައީސް އެރްދޮޣާން އެދިވަޑައިގެންނެވީ މިޞްރުގައި އޮތް ޣައްޒާގެ ޞުލްޙައިގެ ސަމިޓުގައެވެ. އެރްދޮޣާނަކީ ދުންފަތާއި އެންމެ ބޮޑަށް ދެކޮޅުހައްދަވާ ރައީސްގެ ގޮތުގައި ޔޫރަޕްގެ ވެރިންގެ މެދުގައި މަޝްހޫރުކަން ހޯއްދަވާފައިވާ ރައީސެކެވެ.

މެލޯނީ އަކީ އެންމެ ގަދަޔަށް ދުންފަތުން އިސްތިޢުމާލުކުރައްވާ ބޮޑުވަޒީރު ކަމަށް ބައެއް ބޭފުޅުން ވިދާޅުވެއެވެ. ދުންފަތާއި ދުރަށް ވަޑައިގަތުމަށް މެލޯނީގެ އަރިހުން އެރްދޮޣާން އެދިވަޑައިގަތުމާއި އެކު އެކަމަނާ ދެއްވި ޖަވާބުން ފްރާންސްގެ ރައީސް އިމަނުއެލް މެޚްރޮން ފަދަ ބޭފުޅުން ޖޯކުވެސް ޖެއްސެވި މަންޒަރުތައް ކެމެރާތަކަށް ވަނީ އަރާފައެވެ.

ދުންފަތަކީ އެތައް ބަޔެއްގެ ފުރާނަ ދުއްވާލާ ވިހައެކެވެ. ދުންފަތާއި ގުޅުން ހުރި ބަލިތަކުގެ ސަބަބުން އިޓަލީގައި އެކަނިވެސް އަހަރަކު ގާތްގަނޑަކަށް 93،000 މީހުން މަރުވާ ކަމަށް އިސްޓިޓިއުޓޯ ސުޕީރިއޯ ޑި ސަނިޓާ އިން ބުނެއެވެ. ދުނިޔޭގެ ޞިއްޙަތު ޖަމްޢިއްޔާ (ޑަބްލިޔުއެޗްއޯ) އިން ރިޕޯޓްކުރާ ގޮތުގައި ޔޫރަޕުން އަހަރަކު ގާތްގަނޑަކަށް 1.1 މިލިއަން މީހުން މަރުވަނީ ދުންފަތުގެ އިސްތިއުމާލު ކުރުމުގެ ސަބަބުންނެވެ.