އަމިއްލަ ކުންފުންޏަކުން ދިވެހިރާއްޖެ އަށް އެތެރެކުރި ސިގިރޭޓު ކޭސްތަކެއް ރީއެކްސްޕޯޓު ނުކޮށް އެ ކުންފުންޏަށް ފައިދާވާ ގޮތަށް ނިންމައި އެ ކުންފުނީގެ ދެ ފަރާތެއްގެ ކިބައިން ރިޝަވަތަށް އެދިފައިވާތީ ކަސްޓަމްސްގެ ކުރީގެ ސީނިއާ ސުޕްރިޑެންޓް، މުއާޒް އަލީގެ މައްޗަށް ދައުވާކޮށްދިނުމަށް އެދި އޭސީސީ އިން ޕީޖީ އޮފީހުގައި އެދެފި އެވެ.
އޭސީސީ އިން ޕީޖީ އޮފީހުގައި އެދިފައިވަނީ އަމިއްލަ ކުންފުންޏަކުން 450 ސިގިރޭޓް ކޭސް ރާއްޖެއަށް އެތެރެކޮށް ކަސްޓަމްސްގެ ހުޅުމާޅެ ބޮންޑެޑް ވެއަހައުސްގައި ބެހެއްޓުމަށްފަހު، އޭގެ ތެރެއިން 430 ކޭސް ރީއެކްސްޕޯޓް ކުރުމަށްޓަކައި ފުރިހަމަ ކުރަންޖެހޭ ހުރިހާ އިޖުރާއަތެއް ފުރިހަމަކޮށް ހުޅުމާލެ ބޮންޑެޑް ވެއަހައުސް އިން ދޫކޮށްފައިވީ ނަމަވެސް އެ ކޭސްތައް ރީއެކްސްޕޯޓް ނުކޮށް، އެތެރެކުރި ކުންފުންޏަށް ފަހިވާ ގޮތަށް ނިންމުމުގެ މުގާބިލުގައި ސިގިރޭޓް އެތެރެކުރި ކުންފުނީގެ ދެ ވެރިއެއްގެ ކިބައިން މުއާޒް އަލީ ރިޝްވަތަށް އެދިފައިވާތީ އެ މައްސަލައިގައި އޭނާގެ މައްޗަށް ދައުވާ ކޮށްދިނުމަށެވެ.
ޕީޖީ އޮފީހުގައި އޭސީސީ އިން ދައުވާ ކޮށްދިނުމަށް އެދިފައިވަނީ ގާނޫނު ނަމްބަރު 9/2014 ގެ 510 ވަނަ މާއްދާގެ (ހ) ގެ ދަށުން އެނގިހުރެ މަންފާއަކަށް އެދުމާއި ގަބޫލުކުރުމާއި އަދު ތިމާއަށްޓަކައި ނުވަތަ އެހެން މީހަކަށްޓަކައި މަންފާ ގަބޫލުކުރުމަށް އެއްބަސްވުމުގެ ކުށުގެ ދައުވާ އެވެ.
Advertisement
މި ހާދިސާ ހިނގާފައިވަނީ 2018 ވަނަ އަހަރުގަ އެވެ. މި މައްސަލައާ ގުޅިގެން މުއާޒް ވަނީ 2019 ވަނަ އަހަރު ކަސްޓަމްސްގެ ވަޒީފާ އިން ވަކޮކޮށްފަ އެވެ. މައުލޫމާތު ލިބޭ ގޮތުގައި އޭނާ މިހާރު ވަޒީފާ އަދާކުރަމުން ދަނީ މިފްކޯގެ ޖެނެރަލް މެނޭޖަރެއްގެ މަގާމުގަ އެވެ.
މަގާމުގެ ބޭނުން ނަހަމަ ގޮތުގައި ބޭނުންހިފައި ރިޝްވަތާއި ކޮރަޕްޝަނުގެ މިފަދަ އަމަލުތައް ކަސްޓަމްގެ މުވައްޒަފުންގެ ފަރާތުން ވަރަށް ގިނައިން ފެންމަތިވެ އެވެ. އާންމު ގޮތެއްގައި މިފަދަ އަމަލުތައް ހިންގަނީ އެމްޕީއެލް އާއި ކަސްޓަމްސް ނުވަތަ އެމްއޭސީއެލް އާއި ކަސްޓަމްސް، މި ތިން ތަނުގެ މުވައްޒަފުން ގުޅިގެންނެވެ.
