ކީރިތި ގުރުއާން ކިޔެވުމުގެ 37 ވަނަ ގައުމީ މުބާރާތުގެ ފަހުރުވެރި ރަންވަނަތައް ތިން ދަރިވަރަކަށް ލިބިއްޖެ އެވެ.

މި މުބާރާތުގެ ރަންވަނަތައް ލިބިފައިވާ ތިން ބައިވެރިންނަކީ، ފާތިމަތު ޝާޔާ ޒާހިރު، އާއިޝަތު ޝަބާ އަދި އަހުމަދު ޝައިމް ރިޒާ އެވެ. މި ބައިވެރިންނަށް އިނާމު ހަވާލުކޮށްދެއްވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ދެކަނބަލުންނާއި ވަޒީރުންނެވެ.

އެގޮތުން މުޅި މުބާރާތުން ހާފިޒުންގެ ގޮފިން އެއްވަނަ ހާސިލުކުރީ ތަދްރީސުލް ގުރުއާނުލް ކަރީމްގެ ފަރާތުން ބައިވެރިވި ފާތިމަތު ޝާޔާ ޒާހިރެވެ. ނުބަލާ ކިޔެވުމުގެ ގޮފިން އެއްވަނަ ހާސިލުކުރީ ށ. އަތޮޅު ކައުންސިލްގެ ފަރާތުން ބައިވެރިވި އާއިޝަތު ޝަބާއެވެ. އަދި ބަލައިގެން ކިޔެވުމުގެ ގޮފިން އެއްވަނަ ހާސިލުކުރީ ލ. އަތޮޅު ކައުންސިލްގެ ފަރާތުން ބައިވެރިވި އަހުމަދު ޝައިމް ރިޒާ އެވެ.

ގުރުއާން ކިޔެވުމުގެ 37 ވަނަ ގައުމީ މުބާރާތް މިއަދު ނިމިފައިވާއިރު މި މުބާރާތުގެ ރަންވަނަތަކަށްދާ ބައިވެރިންނަށް އެކި އިނާމުތައް ދިނުމަށް ވަނީ ހަމަޖެހިފަ އެވެ. އެގޮތުން ހާފިޒުންގެ ގޮފިންނާއި، ނުބަލައި ކިޔެވުމުގެ ގޮފިން އަދި ބަލައިގެން ކިޔެވުމުގެ ގޮފިން އެއްވަނައަށް ދާ ބައިވެރިއަކަށް 75،000 ރުފިޔާގެ ފައިސާގެ އިނާމު، ކޮންމެ ގޮތްޕަކުން ދެވަނައަށް ދާ ބައިވެރިއަކަށް 50،000 ރުފިޔާގެ ފައިސާގެ އިނާމު އަދި ކޮންމެ ގޮތްޕަކުން ތިންވަނައަށް ދާ ބައިވެރިއަކަށް 35،000 ރުފިޔާގެ ފައިސާގެ އިނާމު ދިނުމަށް އިސްލާމިކް މިނިސްޓްރީން ވަނީ ނިންމައިފަ އެވެ. މި އިނާމުތަކުގެ އިތުރުން ރަންވަނަތަކަށް ދާ ބައިވެރިންނަށް އުމްރާ ދަތުރެއް ދިނުމަށްވެސް ވަނީ ހަމަޖެހިފަ އެވެ.

މި މުބާރާތުގައި، ނުބަލައި ކިޔެވުމުގެ ގޮފިން މުޅި މުބާރާތުން އެއްވަނަ، ބަލައިގެން ކިޔެވުމުގެ ގޮފިން މުޅި މުބާރާތުން އެއްވަނަ، އަދި ހާފިޒުންގެ ބައިން މުޅި މުބާރާތުން އެއްވަނަ ހޯދާ ފަރާތްތަކަށް އެ ފަރާތަކުން ތައުލީމް ހާސިލްކުރަން އެދޭ ދާއިރާއަކުން ޕީއެޗްޑީއާއި ހަމަޔަށް އެފަރާތަކުން ބޭނުން ގައުމަކުން ތައުލީމު ހާސިލު ކުރުމަށް ހާއްސަ ސްކޮލާޝިޕް ދިނުމަށް ވެސް ވަނީ ހަމަޖެހިފަ އެވެ.