މިއަހަރު ޖުލައި މަހު ހުޅުވި ވެލާނާ އިންޓަނޭޝަނަލް އެއަރޕޯޓުގެ އައު ޓާމިނަލް "ޓާމިނަލް 1" އިން މެލޭޝިއާގެ ގައުމީ އެއާލައިން ކަމަށްވާ މެލޭޝިއާ އެއާލައިންސް އަށް ހިދުމަތް ދޭން ފަށައިފިއެވެ. މި އެއާލައިނަށް ހިދުމަތްދޭން ފަށާފައިވަނީ ހޮނިހިރު ދުވަހުގެ މެންދުރުގެ ވަގުތެއްގައި އެއާޕޯޓުގައި ބޭއްވުނު ހާއްސަ ރަސްމިއްޔާތުގަ އެވެ.
މި ރަސްމިއްޔާތު ޝަރަފުވެރި ކޮށްދެއްވާފައިވަނީ އައިލެންޑް އޭވިއޭޝަންގެ މެނޭޖިން ޑިރެކްޓަރު އިބްރާހިމް އިލްޔާސް އެވެ. ރަސްމިއްޔާތުގައި މެލޭޝިއާ އެއާލައިންސް ގެ މާލޭ ސްޓޭޝަންގެ ހެޑް އަހްމަދު ހަނަމް ފާއިޒް އާއި އެމްއޭސީއެލް އާއި މެލޭޝިއާ އެއާލައިންސްގެ އިސްވެރިންނާއި އޮފިޝަލުން ބައިވެފައިވެ އެވެ.
މިއަދު ބޭއްވުނު ރަސްމިއްޔާތުގައި އެ އެއާލައިންގެ ޗެކިން ކައުންޓަރުތައް ހުޅުވާފައިވާއިރު އެ ފުލައިޓުން ދަތުރުކުރި 170 ފަސިންޖަރުންނަށް އެމްއޭސީއެލްގެ ފަރާތުން ވަނީ ހަދިޔާ ދީފަ އެވެ. އަދި މިއަދު އެ އެއާލައިން ޖެއްސި ބޯޓު (MH485) އަށް ވަނީ މަރުހަބާ ކިޔުމުގެ ގޮތުން ވޯޓަރ ސެލިއުޓެއް ދީ، އެ ބޯޓުން ރާއްޖެ އައި 172 ފަސިންޖަރުންނަށް ސަގާފީ ހަރަކާތްތަކާއެކު މަރުހަބާ ކިޔާފައެވެ.
މެލޭޝިއާ އެއާލައިންގެ ބޯޓު ވެލާނާ އެއާޕޯޓުގެ ޓެކްސީ ވޭ ގައި ވޯޓަރ ސެލިއުޓެއް އަރުވަނީ - ފޮޓޯ: އެމްއޭސީއެލް
2014 ވަނަ އަހަރު މާޗު މަހުގައި މެލޭޝިއާ އެއާލައިންގެ ބޯޓެއް ވީނުވީއެއް ނޭނގި ގެއްލުނު ހާދިސާއާ ގުޅިގެން އެ އެއާލައިން ގާތްގަނޑަކަށް ބަގުރޫޓުވި އެވެ. އެ ކުންފުނީގެ ސީއީއޯ 2015 ވަނަ އަަހަރު ބުނެފައިވަނީ MH317 ހާދިސާއަށް ފަހު ކުންފުނީގެ ޕާފޯމެންސް ދަށްވެ އެ ކުންފުނި ޓެކްނިކަލީ ބަގުރޫޓުވެފައިވާ ކަމަށެވެ. ނަމަވެސް 2015 ވަނަ އަހަރުގެ ސެޕްޓެމްބަރު މަހު "މެލޭޝިއާ އެއާލައިން ބެރްހާދް" ނަމުގައި އެ އެއާލައިން އަލުން އުދުހެން ފެށިއެވެ. 2017 ގެ މެދުކެނޑުމަކަށް ފަހު އެ އެއާލައިނުން ރާއްޖެއަށް އަލުން ދަތުރުތައް ފަށާފައިވަނީ 2024 ވަނަ އަހަރު އޮގަސްޓް ގައެވެ.
މެލޭޝިއާ އެއާލައިނަށް އާ ޓާމިނަލުން ދޭން ފެށި މި ހިދުމަތާއެކު ޓާމިނަލް 1 އިން ހިދުމަތްދޭ އެއާލައިންތަކުގެ އަދަދު މިވަނީ 10 އަކަށް އަރާފަ އެވެ. މީގެ ކުރިން ހިދުމަތް ދޭން ފެށި އެއާލައިންތަކަކީ މޯލްޑިވިއަން (ރާއްޖެ)، އެއާ އަރަބިއާ (ސައޫދީ އަރަބިއާ)، ބިއޯންޑް (ރާއްޖެ)، ފިޓްސް އެއާ (ލަންކާ)، ބެއިޖިންގް ކެޕިޓަލް އެއާލައިންސް (ޗައިނާ)، ބަޓިކް އެއާ (މެލޭޝިއާ)، ބެންކޮކް އެއާވޭސް (ތައިލެންޑް)، އިންޑިގޯ (އިންޑިއާ)، އަދި ގަލްފް އެއާ (ބަހްރެއިން) އެވެ.
އެމްއޭސީއެލް އަދި ސަރުކާރުގެ މައިގަނޑު އަމާޒަކީ ކުރިޔަށް އޮތް ދުވަސްތަކުގައި އެއާޕޯޓުގެ އޮޕަރޭޝަންތައް އިތުރަށް ފުޅާކޮށް ވީހާވެސް ގިނަ އެއާލައިންތަކަށް ހިދުމަތްދީ އަހަރަކު ހަތް މިލިއަން ފަސިންޖަރުންނަށް ހިދުމަތް ދިނުމެވެ. އަދި ހަމަ އެހެންމެ ރާއްޖެއަށް ދަތުރުކުރާ ހުރިހާ އެއާލައިނަކަށް ވެސް އެންމެ ފުރިހަމަ އަދި އެންމެ މަތީ ފަންތީގެ ހިދުމަތް ފޯރުކޮށްދިނުމަކީ އެ ކުންފުނީ އަމާޒެކެވެ.
