ދުނިޔޭގައި ދިރިއުޅޭ ހުރިހާ އަންހެން ކުދިންނަށް ވެސް އިހުތިރާމް ކުރުމަށާއި، އެކުދިންގެ އަޑު އަހައި، ހަމަހަމަ ފުރުސަތުތަކެއް ހޯދައިދިނުމަށް ރައީސުލްޖުމްހޫރިއްޔާގެ އަނބިކަނބަލުން ފަސްޓް ލޭޑީ ސާޖިދާ މުހައްމަދު ގޮވާލައްވައިފި އެވެ. އެކަމަނާ މިފަދައިން ގޮވާލެއްވީ ބައިނަލްއަގްވާމީ އަންހެން ކުދިންގެ ދުވަހުގެ މުނާސަބަތުގައި ސޯޝަލް މީޑިއާގައި ކުރެއްވި ޕޯސްޓެއްގަ އެވެ.
ފަސްޓް ލޭޑީ ވަނީ ތައުލީމު ހާސިލުކޮށްގެން މާނަހުރިގޮތެއްގައި މުޖުތަމައުތަކަށް ހިދުމަތް ކުރެވޭނެފަދަ މާހައުލުތަކެއް ބިނާކުރުމަށް އެންމެހާ ފަރާތްތައް ގުޅިގެން މަސައްކަތް ކުރުމުގެ މުހިންމުކަން ފާހަގަކުރައްވާފަ އެވެ.
އެކަމަނާ އިތުރަށް ވިދާޅުވެފައިވަނީ އަންހެން ކުދިންނަކީ އީޖާދީ ވިސްނުމާއެކު އިސްނަގައިގެން ހަރަކާތްތެރިވާ ބައެއް ކަމަށާއި މުސީބާތުގެ ވަގުތުތަކުގައި ވެސް ގަދައަޅައި މަސައްކަތް ކުރާ އަދި ވިލުންތެރިކަން އޭގެ ހަގީގީ މާނައިގައި ދައްކުވައިދޭ ބައެއް ކަމަށެވެ. ދުނިޔޭގެ އެކި ކަންކޮޅުތަކުގައި އަންހެން ކުދިން ދައްކުވައިދެމުންދާ ހިއްވަރާއި ތޫނުފިލިކަމާއި އޯގާތެރިކަން އެކަމަނާ ވަނީ ފާހަގަކުރައްވާފަ އެވެ.
Advertisement
ކޮންމެ އަހަރެއްގެ ވެސް އޮކްޓޫބަރު މަހުގެ 11 ވަނަ ދުވަސް ބައިނަލްއަގުވާމީ އަންހެން ކުދިންގެ ދުވަސް ގޮތުގައި އދ. އިން ކަނޑައެޅީ އެ ކުދިންގެ ހައްގުތައް ބަލައިގަނެ އެ ކުދިންގެ ބާރުވެރިކަމަށް މަސައްކަތްކުރުމުގެ ގޮތުންނެވެ.
