އެންމެ ފަހުގެ ވޯލްޑް ކަޕު ޗެމްޕިއަން އާޖެންޓީނާ ބައިނަލްއަގްވާމީ ރަހުމަތްތެރިކަމުގެ މެޗެއްގައި ވެނެޒުއެލާ މައްޗަށް 0-1 ގެ ނަތީޖާއިން ކުރި ހޯދައިފިއެވެ. އިންޓަރނޭޝަނަލް ބްރޭކުގެ މި ހަފްތާގައި އާޖެންޓީނާ އަދި ސައުތް އެމެރިކާގެ ބައެއް ގައުމުތަކުން ރަހުމަތްތެރިކަމުގެ މެޗުތައް ކުޅެނީ އެ ގައުމުތަކަށް ވޯލްޑް ކަޕުގެ ކޮލިފައިން ނިމިފައިވާތީ އެވެ.

މި މެޗުގައި ރެކޯޑު އަދަދަކަށް ދުނިޔޭގެ މޮޅު ކުޅުންތެރިޔާގެ މަގާމު ހޯދި ލިއޮނެލް މެސީ މި ކުޅެފައެއް ނުވެ އެވެ. ބެލެވޭ ގޮތުގައި ކޯޗު ލިއޮނެލް ސްކަލޯނީ، މެސީ އަށް ޖާގަ ދީފައި ނުވަނީ މިފަދަ މެޗެއްގައި އެހެން ކުޅުންތެރިން ޓެސްޓު ކުރުމުގެ ގޮތުން ޖާގަ ދިނުމަށާއި މެސީ އަށް ރެސްޓު ދިނުމުގެ ގޮތުންނެވެ. މި މެޗު ބެލުމަށް މެސީ ދަނޑަށް އައިސްފައިވެ އެވެ.

_{އާޖެންޓީނާ - ވެނެޒުއެލާ މެޗު ބެލުމަށް މެސީ ދަނޑުގައި.}

_{މެސީ، އޭނާގެ ދަރިފުޅު އަދި އަނބިކަބަލުން މެޗު ބަލަން ގޮސް ތިބި ކުޑަކުދިންތަކަކާއެކު.}

މި މެޗުގައި ފެނުނު ހަމައެކަނި ގޯލަކީ 31 ވަނަ މިނެޓުގައި ޖިއޮވާނީ ލޮސެލްސޯ ޖަހައިދިން ގޯލެވެ. އޭނާ މި ގޯލު ޖަހާފައިވަނީ ލައުޓާރޯ މާޓިނޭޒް ތަނަވަސްކޮށްދިން ފުރުސަތަކުންނެވެ.

މުޅި މެޗުގައި ވެސް ވެނެޒުއެލާ އަށް ގޯލަށް ފޮނުވާލެވިފައިވަނީ ޖުމްލަ ތިން ހަމަލާ އެވެ. އަދި ގޯލަށް އަމާޒުވީ އެންމެ ހަމަލާއެކެވެ. އާޖެންޓީނާ އިން ޖުމްލަ 11 ހަމަލާ ފޮނުވާލިއިރު ތިން ހަމަލާ ގޯލަށް އަމާޒުކޮށްފައިވެ އެވެ. މި މެޗުގައި ގިނަ ވަގުތު ބޯޅަ ހިފަހައްޓައިގެން ކުޅެފައިވަނީ ވެސް އާޖެންޓީނާއިންނެވެ.

މި ދެ ގައުމު މީގެ ކުރިން ބައްދަލުކުރި ހަތަރު މެޗު ވެސް ކާމިޔާބުކުރީ އާޖެންޓީނާ އެވެ. ވެނެޒުއެލާ އަށް އާޖެންޓީނާގެ މައްޗަށް އެންމެ ފަހުން ކުރިހޯދިފައި ވަނީ 2019 ވަނަ އަހަރުގަ އެވެ.

މި ހަފްތާގެ އިންޓަނޭޝަނަލް ބްރޭކުގައި އާޖެންޓީނާ ދެން ބައްދަލުކުރަނީ އަންނަ ހޯމަ ދުވަހުގެ ރޭ ފަތިހު 05:00 ގައި ޕުއާޓޯ ރިކޯ އާ ދެކޮޅަށެވެ. އެ މެޗުގައި ވެސް މެސީ ކުޅޭނެ ކަމާމެދު ޔަގީނެއް ނޫނެވެ.