ބޭރު ފައިސާ ގަނެވިއްކާ ވިޔަފާރިތަކުން މަރުކަޒީ ބޭންކް މޯލްޑިވްސް މަނިޓަރީ އޮތޯރިޓީ (އެމްއެމްއޭ)އިން ނަގަންޖެހޭ ހާއްސަ ލައިސަންސްގެ އެޕްލިކޭޝަން ފީއާއި އަހަރުން އަހަރަށް ދައްކަންޖެހޭ ފީ ބޮޑުކޮށް، "މަނީ ޗޭންޖިން ވިޔަފާރިތަކާ ބެހޭ ގަވާއިދު" އިސްލާހުކޮށްފި އެވެ.

މަނީ ޗޭންޖިން ވިޔަފާރިތަކާބެހޭ ގަވާއިދުގައި ކުރިން ކަނޑައަޅާފައިވާ ގޮތުން ދެ ޓިއާއެއްގެ ދަށުން ލައިސަންސް އަންނަނީ ދޫކުރަމުންނެވެ. އެއީ ޓިއާ 1 އަދި ޓިއާ 2 އެވެ. ޓިއާ 1 އަކީ ބޭރު ފައިސާ ގަތުމާއި ވިއްކުމުގެ ވިޔަފާރި ކުރުމުގެ ލައިސަންސެވެ. ޓިއާ 2 އަކީ ބޭރު ފައިސާ ވިއްކުމުގެ ވިޔަފާރި ކުރުމުގެ ލައިސަންސެވެ. ޓިއާ 2 ހާއްސަ ކޮށްފައިވާ ޓޫރިޒަމް ދާއިރާ އަށެވެ.

އެމްއެމްއޭ އިން މިއަދު އާންމުކުރި އިސްލާހުގައިވާ ގޮތުން ބޭރު ފައިސާ ގަނެވިއްކުމަށް ދޫކުރާ ލައިސަންސް ނުވަތަ ޓިއާ 1 ގެ ލައިސަންސްގެ ދަށުން ދެ ކެޓަރީއެއް ވަނީ ކަނޑައަޅާފަ އެވެ. އެއީ:

1. ކެޓަގަރީ އޭ: އާންމުންނަށާއި ވިޔަފާރިތަކަށާއި އެހެންވެސް ފަރާތްތަކަށް އަމާޒު ކޮށްގެން ބޭރު ފައިސާ ގަތުމާއި ވިއްކުމުގެ ވިޔަފާރި ކުރުން.
2. ކެޓަގަރީ ބީ: ވިޔަފާރިތަކަށް އެކަނި އަމާޒު ކޮށްގެން ބޭރު ފައިސާ ގަތުމާއި ވިއްކުމުގެ ވިޔަފާރި ކުރުން.

އިސްލާހުގައިވާ ގޮތުން ޓިއާ 1 ލައިސަންސަށް ހުށަހަޅާއިރު އެޕްލިކޭޝަން ފީގެ ގޮތުގައި 40،000 ރުފިޔާ، އެމްއެމްއޭއިން އަންގާ މުއްދަތެއްގެ ތެރޭގައި ދައްކަން ވާނެ އެވެ. އެއީ ލައިސަންސް ދޫކުރިޔަސް ދޫނުކުރިޔަސް އަނބުރާ ނުލިބޭނެ ފީއެކެވެ. އަދި އެ ލައިސަންސް އާ ކުރުމަށް އެދި ހުށަހަޅާއިރު، އަނބުރާ ނުލިބޭ ގޮތަށް 20،000 ރުފިޔާ ދައްކަން ޖެހެއެވެ.

މީގެ ކުރިން ޓިއާ 1 ލައިސަންސްގެ އެޕްލިކޭޝަން ފީއަކީ 20،000 ރުފިޔާއެވެ. އަދި ލައިސަންސް އައުކުރަން ދައްކަން ޖެހެނީ 10،000 ރުފިޔާއެވެ.

ޓިއާ 1 ލައިސަންސްގެ އަހަރީ ފީގެ ގޮތުގައި 48،000 ރުފިޔާ ދައްކަން ޖެހޭނެ ކަމަށް ބަޔާންކޮށްފަ އެވެ. މީގެ ކުރިން ދައްކަންޖެހެނީ 24،000 ރުފިޔާ އެވެ.

ޓިއާ 2 ލައިސަންސަށް އެދި ހުށަހަޅާއިރު، އެޕްލިކޭޝަން ފީގެ ގޮތުގައި 2،600 ޑޮލަރު ދައްކަންޖެހޭއިރު ލައިސަންސް އާ ކުރުމަށް 1،300 ޑޮލަރު ދައްކަން ޖެހެއެވެ. އަދި އަހަރީ ފީގެ ގޮތުގައި 3,600 ޑޮލަރު ދައްކަންޖެހެ އެވެ.

މީގެ ކުރިން އެޕްލިކޭޝަން ފީއަކީ 1،300 ޑޮލަރެވެ. އަދި ލައިސަންސް އާކުރަން ކުރިން 650 ޑޮލަރު ދައްކަންޖެހޭއިރު އަހަރީ ފީއަށް ދައްކަނީ 1،800 ޑޮލަރެވެ.

މީގެ އިތުރުން ލައިސަންސް ލިބިފައިވާ ކޮންމެ ފަރާތަކުން ވެސް، ހުރިހާ ވަގުތެއްގައި ވެސް 50،000 ޑޮލަރު ސެކިއުރިޓީ ޑިޕޮސިޓުގެ ގޮތުގައި އެމްއެމްއޭގައި ބަހައްޓަންވާނެ ކަމަށް ކުރިން އޮތް ނަމަވެސް، މިހާރު އެ އަދަދު ވަނީ އެއް ލައްކައަށް ބޮޑުކޮށްފައެވެ.