އިހްތިރާމް އަދާކުރުމުގެ ގައުމީ މަޝްރޫއެއް އަންނަ 2026 ވަނަ އަހަރުގެ ތެރޭގައި ފެއްޓެވުމަށް ގަސްތުކުރައްވާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
ރައީސް ޑރ. މުއިއްޒު މި މޭރުމުން ވިދާޅުވީ، އެމަނިކުފާނު އދ. އަތޮޅުގެ މީހުން ދިރިއުޅޭ ރަށްރަށަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން އެ އަތޮޅު މަހިބަދޫއަށް ވަޑައިގެން، އެ ރަށުގެ ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުންނެވެ. އެ ރަށުގެ ރައްޔިތުންނާ ބައްދަލުކުރައްވައި ރައީސް ވިދާޅުވީ ތަރައްގީގެ ކަންކަން ކުރިއަށްދާއިރު މީހުންގެ ވިސްނުމާއި، އުޅުމާއި ގުޅުންތައްވެސް ތަރައްގީ ވާންޖެހޭ ކަމަށެވެ.
މީގެ އަހަރުތަކެއް ކުރިން، ސިޔާސީ އޮއިވަރެއްގެ ތެރެއަށް ރައްޔިތުން ވަދެގެންދާން ފެށުމާއެކު، އެކަކު އަނެކަކަށް އިހްތިރާމް އަދާކުރުމުގެ އާދަކާދަ ވަރަށް ބޮޑަށް ނެތި ގޮސްފައިވާކަން ފާހަގަކުރައްވައި ރައީސް ވިދާޅުވީ، އެމަނިކުފާނު ބޭނުންފުޅުވަނީ މިކަން ބަދަލުކުރައްވައި އިހު އޮތް ގޮތަށް އަނބުރާ ވަޑައިގަތުމަށް ކަމަށެވެ.
"ސަރުކާރުން ބޭނުން މި އަންނަ އަހަރުގެ ތެރޭގައި މިއީ އަތްލެވޭ މަޝްރޫއެއް ނޫން، އެހެންނަމަވެސް ބިޔަ މަޝްރޫއެއްގެ ގޮތުގައި އިހުތިރާމު އަދާކުރުމުގެ ގައުމީ މަޝްރޫއުއެއް ފަށަން، ރެސްޕެކްޓް ކެމްޕޭނެއް ފަށަން. މިކަމުގައި ހުރިހާ ރައްޔިތުންނާއި، ކަމާބެހޭ ހުރިހާ މުއައްސަސާތަކާއި، ސިވިލް ސޮސައިޓީގެ ހުރިހާ އެންޖީއޯތަކާއި ހުރިހާ ފަރާތްތައް ބައިވެރިވާން އަޅުގަނޑު ގޮވާލަން، ސިޔާސީ ޕާޓީތަކާއި ހުރިހާ ފަރާތްތައް." ރައީސް ވިދާޅުވި އެވެ.
މިކަމުގެ ހަގީގީ ނަތީޖާ ފެންނާނީ، އެންމެންގެ ބައިވެރިވުން ލިބިގެންކަމަށާއި ހަގީގީ މާނާގައި ދިވެހިރާއްޖެ ތަރައްގީވެގެންދާނީ، މިފަދަ، ވަށައިޖެހޭ ގޮތެއްގައި ތަރައްގީ ހާސިލުކުރެވިގެން ކަމަށް ރައީސް ވަނީ ވިދާޅުވެފަ އެވެ. މިކަމުގައި ދިވެހި ހުރިހާ ރައްޔިތުންގެ އެއްބާރުލުން ލިބި، ކާމިޔާބު ހޯއްދެވޭނެކަމުގެ ޔަގީންކަން އެބަ އޮތްކަމަށް އެމަނިކުފާނު ވަނީ އިތުރަށް ވިދާޅުވެފަ އެވެ.
