ކައުންސިލްތަކުން އުސޫލުތައް ހަދަންޖެހޭނީ ރަށުގެ ރައްޔިތުންގެ އެންމެ މަތީ މަސްލަހަތުތައް ހުރިހާ ރައްޔިތުންނަށް ޝާމިލުވާ ގޮތަށް އަދި ހިމާޔަތްވާ ގޮތަށް ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
ރައީސް މުއިއްޒު މި މޭރުމުން ވިދާޅުވީ އެމަނިކުފާނު މިހާރު އދ އަތޮޅުގެ މީހުން ދިރިއުޅޭ ރަށްރަށަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން، އެ އަތޮޅު ދިގުރަށް ވަޑައިގެން އެ ރަށުގެ ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުންނެވެ.
ރައީސް މުއިއްޒު ވިދާޅުވި ގޮތުގައި، ދިގުރަށަށް މި ވަގުތު އެންމެ މުހިއްމު ކަމަކީ އެ ރަށަށް ދިމާވެފައިވާ ގެދޮރުގެ ނުވަތަ ގޯތީގެ މައްސަލަ ހައްލުކުރުން ކަމަށެވެ. ދިގުރަށުގައި މި މައްސަލައަށް ހައްލެއް ނުލިބި ވަނީ އެ ރަށުގެ ލޭންޑް ޔޫސް ޕްލޭން އެންމެ އެކަށީގެންވާ ގޮތަކަށް ތައްޔާރުކުރެވިފައި ނުވުމުން ކަމަށް ރައީސް ވަނީ ވިދާޅުވެފަ އެވެ.
ދިގުރަށުގައި ގެދޮރުގެ ނުވަތަ ގޯތީގެ މައްސަލަ މިހާތަނަށް ދިގުލައިގެން ދިއުމުގެ މައްސަލަ ހައްލުކުރެއްވުމަށްޓަކައި ސަރުކާރުން އެހީތެރިކަން ފޯރުކޮށްދެއްވާނެ ކަމަށް ރައީސް މުއިއްޒު ވިދާޅުވި އެވެ. މިހާރު ފާސްކުރެވިފައިވާ ލޭންޑް ޔޫސް ޕްލޭނަށް ވެސް ގޯތި އިތުރުކުރަންޖެހޭ ކަމަށް ރަށުގެ ރައްޔިތުންގެ ފަރާތުން މައުލޫމާތު ލިބިފައިވާ ކަމަށް ވެސް އެމަނިކުފާނު ވަނީ ވިދާޅުވެފަ އެވެ.
"އެހެންވީމަ މަދުވެގެން 50 ގޯތި ދެވޭ ވަރަށް ލޭންޑް ޔޫސް ޕްލޭން އިސްލާހުކޮށްދިނުމުގައި ސަރުކާރުން އެހީތެރިކަންދޭނަން." --- ރައީސް ޑރ. މުއިއްޒު ދިގުރަށުގެ ރައްޔިތުންނާ މުހާތަބުކުރައްވައި ވިދާޅުވި އެވެ.
މީގެ އިތުރަށް އެ ރަށުގެ ހުރިހާ ރައްޔިތުންނަށް ހަމަހަމަ ގޮތުގައި އިންސާފުވެރިކޮށް ގޯތި ދިނުމުގެ ކަންތަށް އިއުލާންކުރެވިގެންދާ ގޮތަށް، އުސޫލު ހެދުމުގެ މަސައްކަތް ހައުސިން މިނިސްޓްރީން ވަރަށް އަވަސް މުސްތަގުބަލެއްގައި ފަށާނެ ކަމަށާއި އުސޫލު ހެދުމަށް ފަހު ކައުންސިލަށް އެ އުސޫލު ފޮނުވާނެ ކަމަށް ވެސް ރައީސް ވަނީ ވިދާޅުވެފަ އެވެ.
