ޙަމާސްގެ އަތުން ޣައްޒާގެ ވެރިކަން ހިންގުމުގެ ބާރުތައް ނިގުޅައިގަނެ، އިންތިޤާލީ މަރުޙަލާގައި ޣައްޒާގައި ވެރިކަން ކުރާނީ އިނގިރޭސިވިލާތުގެ ނުފޫޒާއި އެކުގައި ކަމަށް ރިޕޯޓުތައް ބުނެފިއެވެ. އެހެންކަމުން، ޞުލްޙައިގެ ޕްލޭނޭ ކިޔައި މުޅިން ތަފާތު ވެރިކަމެއް ފަލަސްޠީނުގެ ބިމުގައި ހިންގުމަށް ޓްރަމްޕް ނިންމާފައިވާއިރު، މިކަމުގެ އަޑީގައި އޮތީ އިނގިރޭސިވިލާތް ކަމުގައި ބެލެވޭނެ ހެކި އެބަހުއްޓެވެ. ޓްރަމްޕް ނިންމާފައި ވަނީ ޣައްޒާގެ ވެރިކަން ބައިނަލްއަޤްވާމީ ބޯޑެއްގެ ދަށުން ހިންގުމަށެވެ. އެ ބޯޑުގައި އިސްކޮށް ހުންނަވާނީ އިނގިރޭސީވިލާތުގެ ކުރީގެ ބޮޑުވަޒީރުކަން ކޮށްފައިވާ ޓޯނީ ބްލޭއާ އެވެ. މި ބޯޑަކީ “ބޯޑް އޮފް ޕީސް” ނުވަތަ ޣައްޒާ އިންޓަނޭޝަނަލް ޓްރާންސިޝަނަލް އޮތޯރިޓީ (ޖީއައިޓީއޭ) ގެ ނަމުން ހުޅަނގުން ނަންދެވިފައިވާ ބޯޑެކެވެ. 

^{ޓްރަމްޕް ވަނީ ޓޯނީ ބްލެއާ އަކީ ވަރަށް ބަރާބަރު މީހެއް ކަމަށް ޢަރަބީންގެ ގާތު ބުނެފަ.}

މި ދެންނެވި ބޯޑުގައި 7 އާއި 10 އާއި ދެމެދުގެ ޢަދަދަކަށް މީހުން ތިބޭނެ ކަމަށް ލަފާކުރާއިރު، ޣައްޒާ އާއި ބެހޭ ނިންމުންތައް ނިންމުމުގެ މައިގަނޑު ބާރު ލިބިގެންދާނީ މި ބޯޑަށެވެ، އިނގިރޭސީވިލާތާއި އެމެރިކާ އަދި އިސްރާއީލާއި ބައެއް ޢަރަބި “ގޮނޑިކޮއްކޮ” ޤައުމުތަކުގެވެސް ތާޢީދާއި އެކު ފަލަސްޠީނުގެ އިސްރާއީލަށް އިތުބާރުކުރެވޭ މަދު ޢަދަދެއްގެ ބަޔަކު ގުޅިގެން ކޮންމެ ދުވަހަކުވެސް ޣައްޒާގެ ރައްޔިތުންނަށް ފޯރުކޮށްދޭ ޚިދުމަތްތައް ބެލެހެއްޓޭނީ އެ ބޯޑުގެ ބެލުމުގެ ދަށުން ފަލަސްޠީނުގެ ކުޑަ އެގްޒެކެޓިވް ބޮޑީއަކުންނެވެ. މާނައަކީ ޚާރިޖީ ގުޅުންތައް ވެސް އޮންނާނީ މި ބޯޑުގެ ބާރުގެ ދަށުގައެވެ. އެހެންކަމުން މިއީ ފަލަސްޠީނުގެ އިސްތިޤުލާލު ގެއްލިގެން ހިނގައިދާނެ ކަމެކެވެ.

ޓޯނީ ބްލެއަރަކީ ވަރަށް ނުބައި “ޝައިޠާނީ ވިސްނުން” ގެންގުޅޭ މީހެކެވެ. ޣިރާޤު ސުންނާފަތިކޮށްލުމުގެ އެއް މޭސްތިރިއާއެވެ. އެހެންކަމުން މިދެންނެވި ބޯޑުގެ ޗެއާމަންގެ ގޮތުގައި ބްލޭއާ ހުރެއްޖެނަމަ، އިސްރާއީލާއި މިޞްރާއި އަދި ޣައްޒާ އާއި އެނޫންވެސް ފަލަސްޠީނާއި ގުޅިފައިވާ ދެން ހުރި ބިންތަކާއި ގުޅޭ ކަންކަމުގައި ސެންޓްރަލް ކޯޑިނޭޓަރުގެ މަގާމު އަދާކުރާނީ އޭނާއެވެ. މިއީ ކުރިމަގުގައި އިސްރާއީލަށް މުޅި ޝާމްކަރަ ނަގައިދިނުމަށް ކުރަން އުޅޭ މަސައްކަތުގެ ބައެކެވެ. އެހެނީ 1917 ވަނަ އަހަރު ބަލްފޯރ ޑިކްލެރޭޝަން މެދުވެރިކޮށް ޔަހޫދީންނަށް ފަލަސްޠީނުގެ ބިން ހޯދައިދޭނެ ކަމަށް އިނގިރޭސިވިލާތުން ވަނީ ވަޢުދުވެފައެވެ.