ފުލުހުންނާއި ކުރިމަތިލައި ތަޅައި އަނިޔާކޮށް އަދި އަނިޔާ ލިބިގަތުމަށްޓަކައި ނުބައި ރޭވުންތަކުގެ ތެރެއިން ރޭ އިދިކޮޅު މޯލްޑިވިއަން ޑިމޮކްރެޓިކް ޕާޓީ (އެމްޑީޕީީ) އިން ބޭއްވި މުޒާހަރާގައި ހައްޔަރުކުރި ހަތް މީހުންގެ ތެރެއިން މީހަކު ދޫކޮށްލައިފި އެވެ.

ސުލްހަވެރިވާނެ ކަމަށް ފުލުހުންގެ ގާތު ބުނުމަށްފަހު ޣައިރުގާނޫނީ ކޮށްލި މުޒާހަރާގައި ފުލުހުން ބަންދުކުރި ހަތް މީހުންގެ ތެރެއިން ކޯޓުން ވަނީ ދެން ތިބި މީހުންގެ ބަންދަށް 15 ދުވަހުގެ މުއްދަތެއް ޖަހާފަ އެވެ. އެ މީހުންނަކީ ފުލުހުންނާއި ކުރިމަތިލައި އަދި ފުލުހުންގެ ވާޖިބަށް ހުރަސް އެޅި މީހުން ކަމަށް ބެލެވެ އެވެ.

ރޭގެ މުޒާހަރާ ފެށީ މާލޭ އާޓިފިޝަލް ބީޗް ސަރަހައްދުންނެވެ. މުޒާހަރާގެ ބައިވެރިން ވަނީ ކަނޑައަޅައި އެއްބަސްވެފައިވާ ސަރަހައްދުގެ ބަދަލުގައި، މުޒާހަރާކުރުން މަނާ ސަރަހައްދުތަކަށް ވަންނަން މަސައްކަތްކޮށް އަދި މަޖީދީމަގަށް ވަދެ ޓެރަރިޒަމަށް މަގުފަހިވާ އަމަލުތައް ހިންގައި ސުލްހަ ގެއްލުވައިލުމަށް މަސައްކަތްކޮށްފަ އެވެ. ފުލުހުން ބެރިކޭޑް ޖަހައި އެ މަގު ބަންދުކުރިނަމަވެސް އެމްޑީޕީގެ އެކްޓިވިސްޓުން ވަނީ ބެރިކޭޑާއި އަދި ފުލުހުންގެ އަތުގައިވާ ޝީލްޑްތައް ވެސް “ފެލައިލާފައެވެ”. ނަމަވެސް، ފެންނަ ވީޑިއޯތަކުން އެމީހުންގެ އަތުން އެތަކެތި ވަގުތުން އަތުލުމަށްޓަކައި ފުލުހުން ބާރުގެ ބޭނުމެއް ނުކުރެ އެވެ.

އެމްޑީޕީގެ ގާނޫނީ ވަކީލެއްގެ ފަރާތުން ލިބުނު މައުލޫމާތުތަކަށް ބަލާއިރު، ހައްޔަރުކުރި ހަތް މީހުންގެ ތެރެއިން ބާކީ ތިބި ހަ މީހުންގެ ބަންދަށް ކޯޓުން ވަނީ 15 ދުވަސް ޖަހާފަ އެވެ. ބަންދުކުރި މީހުންގެ ތެރޭގައި ރައްޔިތުންގެ މަޖިލީހުގެ ދާންދޫ ދާއިރާގެ ކުރީގެ މެންބަރު ޔައުގޫބް އަބްދުﷲ އާއި، ޔާސިރު އަބްދުއްލަތީފާއި އަދި މާފުށީ ކައުންސިލްގެ ރައީސް ހަަސަން ސަލާހު ހިމެނެ އެވެ. މި ތިން ބޭފުޅުން ވެސް ވަނީ 15 ދުވަހަށް ބަންދުކޮށްފަ އެވެ.

މުޒާހަރާގެ ތެރެއިން ހިތާމަވެރި ހާދިސާއެއް ވެސް ރިޕޯޓުކޮށްފައިވެ އެވެ. އެގޮތުން އެމްޑީޕީގެ ހުޅުމާލެ މެދު ދާއިރާގެ ނައިބު ރައީސް މުހައްމަދު ރަސްލާނަށް ހާޓް އެޓޭކެއް ޖެހި، ހޮސްޕިޓަލުގައި ފަރުވާދެމުން އަންނަ ކަމަށް އެމްޑީޕީން ބުނެ އެވެ. އޭނާ އަށް ހާޓްއެޓޭކެއް ޖެހެން މެދުވެރިވި ސީދާ ސަބަބެއް ކަށަވަރެއް ނުވެ އެވެ.

ފުލުހުންގެ އަތުގައި ހުރި ދައުލަތުގެ މުދާތައް ގަދަކަމުން އަތުލައި ހަމަނުޖެހުން ހިންގި ރޭގެ މުޒާހަރާ ހުއްޓުވަން ފުލުހުން ވަނީ ޕެޕާ ސްޕްރޭ އާއި ލޯންގް ރޭންޖް އެކޮއިސްޓިކް ޑިވައިސް (އެލް.އާރް.އޭ.ޑީ) ބޭނުންކޮށްފަ އެވެ.