އެމްޑީޕީ އިން މިއަދު ބާއްވާ މުޒާހަރާއަކީ ބިނާކުރުވަނިވި މުޒާހަރާއެއް ނޫން ކަމަށާއި އެއީ ފަނާކުރުވަނިވި މުޒާހަރާއެއް ކަމަށް، މަޝްހޫރު ވިޔަފާރިވެރިޔާ އަދި މާމިގިލީ ދާއިރާގެ މެންބަރު ގާސިމް އިބްރާހިމް ވިދާޅުވެއްޖެ އެވެ.

ގާސިމް މި މޭރުމުން ވިދާޅުވީ އެކްސްގައި ހިއްސާކުރެއްވި ޕޯސްޓެއްގަ އެވެ. މިއަދު އެމްޑީޕީން ބާއްވާ މުޒާހަރާގެ މަގުސަދަކީ ވެރިކަން ހޯދުމުގެ ނިޔަތުގައި ކުރާ ބޮޑު ނުބައި ކަމެއް ކަަމަށް ގާސިމް ވަނީ ސިފަކުރައްވައިފަ އެވެ. މީގެ އިތުރުން، މި އޮތް ބޮޑު ދަރަނިވެރި ހާލަތުގައި އެއްވެސް ކަމެއް ކޮށް ނުދެވޭނެކަމަށް ވިދާޅުވެ ގާސިމް ވަނީ އެމްޑީޕީއަށް ވަރަށް ބޮޑަށް ފާޑު ވިދާޅުވެފަ އެވެ.

ރައީސް ޑރ. މުއިއްޒުގެ މި ވެރިކަމުގައި ކުރަން ޖެހިފައިވާ ކަމަކީ، ކުރީގެ ސަރުކާރުތަކުން ނަގާފައިވާ ދަރަނިތައް ދެއްކުން ކަމަށާއި، ލިބޭ ފައިސާގެ ބޮޑުބައި ހަރަދު ވަނީ އެ ދަރަނިތައް ދެއްކުމަށް ކަމަށް ގާސިމް ކުރެއްވި ޕޯސްޓުގައި ވިދާޅުވި އެވެ. އެ ދަރަނިތައް ނުދެއްކިއްޖެނަމަ ގައުމު ބަނގުރޫޓް ވެދާނެ ކަމަށާއި، އެހެން ނަމަވެސް އިތުރު ޓެކްސް ނަގައިގެން ވެސް ސަރުކާރުން އެކަންކަން މެނޭޖްކުރައްވަމުން ގެންދަވާ ކަމަށް ގާސިމް ވިދާޅުވި އެވެ.

ކުރީގެ ސަރުކާރުތަކުން ސަރުކާރުގެ ކުންފުނިތަކުން ބޮޑެތި ވައްކަންތައް ކޮށްފައިވާ ކަމަށާއި، އެ ސަރުކާރުތަކުން އެކަންކަމަށް އެއްވެސް ފިޔަވަޅެއް އަޅާފައިނުވާ ކަމަށް ގާސިމް ވިދާޅުވި އެވެ. އެހެން ނަމަވެސް، މިއަދުގެ ސަރުކާރުން އެފަދަ ކަންކަން ކުރާ ފަރާތްތަކާމެދު ހަރުކަށި ފިޔަވަޅު އަޅުއްވާ ކަމަށް ގާސިމް އިތުރަށް ވިދާޅުވި އެވެ.

އެމްޑީޕީން ބާއްވާ މުޒާހަރާގައި ބައިވެރި ނުވުމަށާއި، ގައުމުގެ އަމަން އަމާންކަން ގެއްލޭ ފަދަ އެއްވެސް ކަމެއްގައި އާންމުން ބައިވެރިނުވުމަށް ވެސް ގާސިމް ވަނީ ގޮވާލައްވައިފަ އެވެ.