37 ވަނަ ގުރްއާން ކިޔެވުމުގެ ގައުމީ މުބާރާތުގެ ރަން ވަނަތަކަށް ދާ ބައިވެރިންނަށް، އިސްލާމިކް މިނިސްޓްރީން ބޮޑު ފައިސާގެ އިނާމެއް ދިނުމަށް ނިންމައިފި އެވެ.

މިކަމާ ގުޅިގެން އިސްލާމިކް މިނިސްޓްރީން މިއަދު ބުނެފައިވަނީ، ގުރްއާން މުބާރާތުގެ ހާފިޒުންގެ ގޮފިންނާއި، ނުބަލައި ކިޔެވުމުގެ ގޮފިން އަދި ބަލައިގެން ކިޔެވުމުގެ ގޮފިން އެއް ވަނައަށް ދާ ބައިވެރިއަކަށް 75،000 ރުފިޔާގެ ފައިސާގެ އިނާމު ދިނުމަށް ނިންމާފައިވާ ކަމަށެވެ. މީގެ އިތުރުން ކޮންމެ ގޮތްޕަކުން ވަނައަށް ދާ ބައިވެރިއަކަށް 50،000 ރުފިޔާގެ ފައިސާގެ އިނާމު އަދި ކޮންމެ ގޮތްޕަކުން ތިން ވަނައަށް ދާ ބައިވެރިއަކަށް 35،000 ރުފިޔާގެ ފައިސާގެ އިނާމު ދިނުމަށް އިސްލާމިކް މިނިސްޓްރީން ވަނީ ނިންމައިފަ އެވެ.

މި މުބާރާތުގެ މައި އިނާމުގެ ގޮތުގައި ކަނޑައަޅާފައިވާ އިނާމަކީ ރައީސުލްޖުމްހޫރިއްޔާ ކަނޑައަޅުއްވާފައިވާ އިނާމުތައް ކަމަށާއި، މިނިސްޓްރީގެ އިނާމުތަކަކީ ރައީސް ދެއްވާ އިނާމުތަކުގެ އިތުރަށް ދެވޭ އިނާމުތަކެއް ކަމަށް އިސްލާމިކް މިނިސްޓްރީން ވަނީ ބުނެފަ އެވެ.

އިސްލާމިކް މިނިސްޓްރީން ބުނެފައިވަނީ، މި އިނާމުތަކުގެ އިތުރުން ރަންވަނަތަކަށް ދާ ބައިވެރިންނަށް އުމްރާ ދަތުރެއް ދިނުމަށް ވެސް ހަމަޖެހިފައިވާ ކަމަށެވެ.

ފާހަގަކޮށްލަންޖެހޭ ގޮތުގައި، މި އަހަރުން ފެށިގެން ގުރުއާން ކިޔެވުމުގެ ގައުމީ މުބާރާތުގައި ނުބަލައި ކިޔެވުމުގެ ބައިން މުޅި މުބާރާތުން އެއްވަނަ، ބަލައިގެން ކިޔެވުމުގެ ބައިން މުޅި މުބާރާތުން އެއްވަނަ، އަދި ހާފިޒުންގެ ބައިން މުޅި މުބާރާތުން އެއްވަނަ ހޯދާ ފަރާތްތަކަށް އެ ފަރާތަކުން ތައުލީމް ހާސިލްކުރަން އެދޭ ދާއިރާއަކުން ޕީއެޗްޑީއާއި ހަމަޔަށް އެފަރާތަކުން ބޭނުން ގައުމަކުން ތައުލީމު ހާސިލު ކުރުމަށް ހާއްސަ ސްކޮލާޝިޕް ދިނުމަށް ނިންމާފައިވާ ކަމަށް ރައީސް ޑރ. މުއިއްޒު އެކްސްގައި ކުރެއްވި ޕޯސްޓެއްގައި ވަނީ ވިދާޅުވެފަ އެވެ.

މީގެ އިތުރުން އެ ޕޯސްޓުގައި ރައީސް ވިދާޅުވެފައިވަނީ، މުޅި މުބާރާތުން ތިން ބައިން އެއްވަނަ ހޯދާ ފަރާތްތަކަށާއި، މުއައްސަސާތަކުގެ ބައިން މުޅި މުބާރާތުން އެއްވަނަ ހޯދާ މުއައްސަސާއަކަށް، ރައީސްގެ އިނާމުގެ ތެރޭގައި އެއްލައްކަ ރުފިޔާގެ ފައިސާގެ އިނާމަކާއި ޝަރަފުގެ ފިލައެއް ދިނުމަށް ނިންމަވާފައިވާ ކަަމަށެވެ.

މި މުބާރާތުގެ ނަތީޖާފާޅުކުރުމުގެ ރަސްމިއްޔާތު ބޭއްވުމަށް ހަމަޖެހިފައިވަނީ މި މަހުގެ 12 ވަނަ ދުވަހު އެވެ.