އޮކްޓޫބަރ 3 (މާދަމާ ރޭ) އާޓިފިޝަލް ބީޗުގައި އެމްޑީޕީން އިސްވެ މާލެ ތެރޭގައި އުޅެނީ ހަމަނުޖެހުން ހިންގަން ކަމަށާއި އެ ހަމަނުޖެހުންތަކުގައި އުމަރުގެ ޓީމުން ބައިވެރި ނުވާނެކަމަށް އޭނާގެ ފޭސްބުކް ޕޭޖުން އިއުލާނު ކޮށްފިއެވެ.
އުމަރުގެ ޕޭޖު މެދުވެރިކޮށް އޭނާ ބުނެފައިވަނީ "ލޫޓުވައިފި ލޫޓުވައިފި، ސައުންޑް މޯ ލައިކް ގުދޯ ގުދޯ" މިހެންނެވެ. މި ބުނި ބަހުގެ މާނައަކީ ގައުމު ލޫޓުވާލުމަށްފަހު އެމްޑީޕީން އެހެން މީހުންނަށް "ލޫޓުވައިފި" މިހެން ގޮވަނީ ކަމަށާއި އެމީހުންގެ ވައްކަންތައް ފޮރުވުމަށް އެހެން މީހުންގެ ބޮލުގައި އަޅުވަނީ ކަމަށެވެ. އުމަރު އިތުރަށް ވިދާޅުވެފައިވަނީ އަޑުގަދަކޮށްގެން ރުއްގިނަވެދާނެ ކަމަށާއި ނަމަވެސް ތާޅފިލިން ކިތަންމެ ބާރަށް ހަޅޭއްލެވިޔަސް ވަގުން ވައްކަން ނުކުރާ ކަމަށް ނުވާނެ ކަމަށެވެ. އެހެންކަމުން ވައްކަން ފޮރުވަދޭން އުމަރެއް ނުދާނެކަމަށެވެ.
ކުރީގެ ރައީސް، ރައީސް ނަޝީދަށް އަމާޒުކޮށް އުމަރު ވަނީ ނަޝީދު މުޒާހަރާ ކުރަން ތި ނިކުންނަވަނީ ކާކާ ދެކޮޅަށް ކަމަށް ބުނެ ސުވާލުކޮށްފައެވެ. ދެވަނަ ސުވާލެއްގެ ގޮތުގައި އުމަރު ކުރި ސުވާލަކީ "ތިމަންނާ އެސަރުކާރަކާ ދުރަށް ނުދެވިގެން އުޅޭ ބައިވެރިޔާ އާއި ދެކޮޅަށް ހެއްޔެވެ؟" މިހެންނެވެ. އުމަރު މިމޭރުމުން މި ދެ ސުވާލު ނަޝީދާއި އަމާޒުކުރީ ނިމިދިޔަ ރިޔާސީ އިންތިހާބުގައި އެމްޑީޕީއާ ދެކޮޅަށް ފާޅުކަން ބޮޑު ގޮތެއްގައި ނިކުމެ އެ ސަރުކާރު ނިމުމަކަށް ގެނެސް ރައީސް ޑރ. މުޢިއްޒު ވެރިކަމަށް އިންތިހާބުވުމުން ތިމަންނާއަކީ "ދެން އަންނަ ސަރުކާރެއްގެ ބައިވެރިއެއް" މިހެން ވިދާޅުވުމުންނެވެ.
އިބްރާހިމް މުޙައްމަދު ސޯލިހާ މައްސަލަތަކެއް އުފެދި ރައީސް ނަޝީދު ވަނީ އެމްޑީޕީން އިސްތިއުފާދީ "ދަ ޑިމޮކްރެޓްސް" ނަމަކަށް ކިޔާ ޕާޓީއެއް އުފައްދާ ރިޔާސީ އިންތިހާބުގައި އިލްޔާސް އިބްރާހިމް ރިޔާސީ ރޭހަށް ނެރެފައެވެ. އަދި އެމްޑީޕީ ރިޔާސީ އިންތިހާބުގައި ބަލިކުރުމުގެ އަޒުމް އެމަނިކުފާނު ވަނީ ކާމިޔާބުކުރައްވާފައެވެ. ނަމަވެސް މިއަހަރު އެމަނިކުފާނު ވަނީ އަލުން އެމްޑީޕީއާ ގުޅިވަޑާއިގެންފައެވެ. ފެކްޝަންތަކެއް އުފެދިފައިވާ އެމްޑީޕީގައި އެމަނިކުފާނު ބޮޑަށް ފެންނަނީ ފައްޔާޒުގެ ފަޅީގައެވެ.
އެހެން ޕޯސްޓެއްގައި އުމަރުގެ ފޭސްބުކް ޕޭޖުން ބުނެފައިވަނީ ސިޔާސީ ޕާޓީތަކަކީ ކޮރަޕްޓް ބޮޑު ބައިގަނޑެއް ކަމަށާއި އެއީ ގާތްވާން ހެޔޮވާވަރުގެ ބައެއް ނޫން ކަމަށެވެ. ނަމަވެސް 2013 ގެ ރިޔާސީ އިންތިހާބުގައި ޕީޕީއެމްގެ ޕްރައިމަރީގައި އެމަނިކުފާނު ވަނީ ރައީސް އަބްދުﷲ ޔާމީންއާ ވާދަކޮށްފައެވެ. އަދި 2008 ވަނަ އަހަރު އައިޑީޕީ ނަމަކަށް ކިޔާ ސިޔާސީ ޕާޓީއެއް އުފައްދަވާ ރިޔާސީ ރޭހުގައި ވާދަކުރެއްވިއެވެ.
2013 ވަަ އަހަރު އެކުލެވުނު ޕީޕީއެމް ވެރިކަމުގެ ކެބިނެޓުގެ ހޯމް މިނިސްޓަރަކީ އުމަރު ނަސީރެވެ. މަގާމުގައި ހުންނެވިއިރު ނުފޫޒު ނަހަމަގޮތުގައި ބޭނުންކޮށް އޭނާގެ މަސްލަހަތު ފުށުއަރާ ފަރާތްތަކެއްގެ ކުންފުންޏަކަށް ފައިދާވާ ގޮތަށް ހިންގި މުއާމަލާތެއްގެ މައްސަލައިގައި އޭނާގެ މައްޗަށް ދައުވާ ކުރުމަށް 2021 ވަނަ އަހަރު ޕީޖީގެ އޮފީހަށް ހުށަހަޅާފައިވެއެވެ. އަދި މިނޫންވެސް ކޮރަޕްޝަނުގެ އެތަކެއް މައްސަލައެއް ހޯމް މިނިސްޓަރުގެ މަގާމުގައި ހުންނަވަނިކޮށް ވަނީ ފެންމަތިވެފައިވެއެވެ.
އުމަރު ނަސީރަކީ ފެށުނީއްސުރެ އެމްޑީޕީގެ ސިޔާސަތުތަކާ ވަރަށް ދެކޮޅު ބޭފުޅެކެވެ. ރައީސް ނަޝީދުގެ ވެރިކަމުގައި ޖީއެމްއާރު ވިއްކާލުމާއި އަބްދުﷲ ޣާޒީ ހައްޔަރުކުރުމާއި އިސްލާމް ދީނަށް ހަޖޫޖެހުން ފަދަ ކަންކަން އެމަނިކުފާނު ކޮށްފައިވާތީ އެ ވެރިކަން ނިމުމަކަށް ގެންނަން އެންމެ ބޮޑު ރޯލެއް އަދާކުރެއްވި އެއް ބޭފުޅަކީ އުމަރު ނަސީރެވެ. އަދި އިންޑިއާ ސިފައިން މިގައުމުގައި ތިބުމުގެ އަސްލަކީ އެމްޑީޕީގެ ދެ ވެރިކަން ކަމަށް އެމަނިކުފާނު ވަނީ ތަކުރާރުކޮށް ވިދާޅުވެފައެވެ.
އުމަރު ނަސީރުގެ އެންމެ ބޮޑު އުންމީދަކީ ރާއްޖޭގެ ރައީސްކަން ކުރެއްވުމެވެ. ދެ ފަހަރުގެ ނާކާމިޔާބީއާއެކު ވެސް އެމަނިކުފާނި ދަނީ 2028 ގެ ރިޔާސީ ރޭހުގައި އެމަނިކުފާނުގެ ނަން އޮންނާނެ ކަމަށް މީސްމީޑިއާ މެދުވެރިކޮށް ވިދާޅުވަމުންނެވެ.
