މާލޭ ސިޓީގެ އެކި ސަރަހައްދުތަކުގައި ވިއްކާފައިވާ ޕާކިން ޒޯންތަކުގައި އާންމުންނަށް ޕާކު ކުރެވޭނެ ގޮތަށް މާލޭ ސިޓީ ކައުންސިލުން މިއަދު ނިންމައިފި އެވެ.
މާލޭ ސިޓީ ކައުންސިލުން މިގޮތަށް ނިންމާފައި މިވަނީ، މާލޭގެ މަގުތަކުން ހަތަރު ފޮރޮޅުލީ އުޅަނދު ޕާކިންއަށް ދޫކޮށްފައިވާ ސަރަހައްދުތައް ކުއްޔަށް ދިނުމަކީ ގާނޫނީ ގޮތުން ކުރެވޭނެ ކަމެއް ނޫން ކަމަށް ބަންޑާރަ ނައިބުގެ އޮފީހުން ޓްރާންސްޕޯޓް މިނިސްޓްރީއަށް ދީފައިވާ ލަފަޔާ ގުޅިގެން އެ މިނިސްޓްރީން މާލޭ ސިޓީ ކައުންސިލަށް އެކަން އެންގުމާ ގުޅިގެންނެވެ.
މާލޭ ސިޓީ ކައުންސިލުން މިއަދު ނެރެފައިވާ ބަޔާނެއްގައި ބުނެފައިވަނީ، މާލޭ ސިޓީގެ މަގުތަކަށް ދިމާވެފައިވާ ހާސްކަން ފިލުވުމަށް އަޅާ މުހިންމު ފިޔަވަޅެއްގެ ގޮތުން، މިއަދުން ފެށިގެން، މާލޭ ސިޓީގެ މަގުތަކުގައި، ވަކި ކަމަކަށް ބޭނުންކުރާކަން އަންގައިދިނުމުގެ ގޮތުން، ބޯޑަކުން ފާހަގަކޮށްފައިވާ ތަންތަން ފިޔަވައި، މަގުމަތީގައި، ޕާކުކުރެވޭނެކަން އަންގައިދޭ ނިޝާންތަކުން ފާހަގަކޮށްފައިވާ ކޮންމެތަނެއްގައި، އާންމުނަށް ޕާކު ކުރެވޭނެ ކަމަށެވެ.
އަމިއްލަ ފަރާތްތަކަށާއި، ޓެކްސީތަކަށް މާލޭ ސިޓީ ކައުންސިލުން ކުއްޔަށް ދޫކޮށްފައި ހުރި ޕާކިންގެ އަދަދު 1،000 އަށް އަރާނެ ކަމަށް މާލޭ ސިޓީ ކައުންސިލްގެ މޭޔަރު އާދަމް އާޒިމް މީގެ ކުރިން ވިދާޅުވި އެވެ. މިހާތަނަށް ޕްރައިވެޓް އުޅަނދުތަކަށް ޕާކިން ސްލޮޓެއް ކުއްޔަށް ދޫކުރަމުން އައީ މަހަކު 1,500 ރުފިޔާއަށެވެ. އަދި ޓެކްސީތަކަށް ޕާކިން ސްލޮޓް ދޫކުރަމުން އައީ މަހަކު 700 ރުފިޔާއަށެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒު ރިޔާސީ އިންތިހާބުގެ ކެމްޕޭނުގައި، ޕާކު ކުރާނެ ތަނެއް ނުދައްކާ އުޅަނދުތަކުގައި ސްޓިކާ ނުޖަހާނެ ކަމަށާއި، މި މައްސަލައަށް ހައްލެއް ހޯއްދަވައިދެއްވާނެ ކަމަށް ވަނީ ވިދާޅުވެފަ އެވެ.
މާލޭގެ ޕާކިން މައްސަލައަށް ހައްލެއް ހޯދުމުގެ ގޮތުން ޕާކިންއަށް ހާއްސަކޮށް އިމާރާތްތަކެއް ހެދުމަށް ސަރުކާރުން އަންނަނީ މަސައްކަތް ކުރަމުންނެވެ.
