ކުރީގެ ނައިބު ރައީސް އަހްމަދު އަދީބު އިސްވެ ހުރެ އުފެއްދި، މޯލްޑިވްސް ތާޑުވޭ ޑިމޮކްރެޓްސް (އެމްޓީޑީ) ހިންގި އޮފީހަށް ކުލި ނުދެއްކުމުގެ ސަބަބުން އެތަނުގެ ވެރިފަރާތުން އެ މައްސަލަ ސިވިލް ކޯޓަށް ހުށަހަޅައިފި އެވެ.
އެމްޓީޑީ ހިންގާ އޮފީހަށް ކުލި ނުދައްކާ މައްސަލަ ސިވިލް ކޯޓަށް ހުށަހަޅާފައިވަނީ، އެ ޕާޓީއާއެކު 2023 ވަނަ އަހަރުގެ ޖުލައި މަހުގައި ވެފައިވާ އެއްބަސްވުމާ އެއްގޮތަށް އިމާރާތަށް ކުލި ދައްކާފައިނުވާ ކަމަށް ބުނެއެވެ.
އެއްބަސްވުމުގެ މުއްދަތު މިހާރު ހަމަވެފައިވާތީ އެތަނުގައި ހުރި އެ ޕާޓީގެ ތަކެތި ނެރެ ތަން ސާފުކޮށް އެތަނުގެ ވެރިފަރާތްކަމަށްވާ އަލީ ހަލީލުއަށް ހަވާލުކުރުމަށާއި، އެއްބަސްވުމުގެ ދަށުން މިއަހަރުގެ އޭޕްރީލް މަހުގެ ނިޔަލަށް ދައްކަންޖެހޭ ކުލީގެ ގޮތުގައި ދައްކަންޖެހޭ 380،000 ރުފިޔާއާއި، އެތަނުގެ ވެރިފަރާތަށް ތަން ހަވާލުކުރާ ދުވަހާ ހަމައަށް މަހަކު ދައްކަންޖެހޭ 30،000 ރުފިޔާގެ އިތުރުން، ގާނޫނީ ވަކީލުންނަށް ހަރަދު ކުރަންޖެހުނު 25،920 ރުފިޔާ އެކީ އެއްފަހަރާ ހޯދުމަށް އެތަނުގެ ވެރިފަރާތުން ވަނީ އެދިފަ އެވެ.
Advertisement
އެހެންނަމަވެސް އެމްޓީޑީގެ ފަރާތުން ދައުވާގެ ރައްދު ހުށަހަޅާފައިނުވާތީ، ޝަރީއަތުގެ އަޑުއެހުމެއް ބޭއްވުމެއް ނެތި ހުކުމްކޮށްދިނުމަށް އަލީ ހަލީލްގެ ފަރާތުން ހުށަހަޅާފައިވީ ނަމަވެސް، އެއީ މަދަނީ އިޖްރާއަތާ ހިލާފު ހުށަހެޅުމެއް ކަމަށް ބުނެ ސިވިލް ކޯޓުން ވަނީ މައްސަލަ ބާތިލްކޮށްފަ އެވެ.
މައްސަލަ ބާތިލް ކުރި ނަމަވެސް އޮންނަ އިޖުރާއަތުގެ ތެރެއިން އަލުން ދައުވާކުރުމުގެ ހައްގު އަލީ ހަލީލްއަށް ލިބިގެންވާ ކަމަށް ސިވިލް ކޯޓުގެ ހުކުމުގައިވަނީ ބުނެފަ އެވެ.
މޯލްޑިވްސް ތާޑުވޭ ޑިމޮކްރެޓްސް އަކީ ކުރީގެ ނައިބު ރައީސް އަހުމަދު އަދީބު އިސްވެ ހުރެ 2018 ވަނަ އަހަރުގެ ޑިސެމްބަރު މަހު އުފެއްދި ޕާޓީއެކެވެ. އެ ޕާޓީން މީގެކުރިން ބައެއް ސިޔާސީ ހަރަކާތްތައް ހިންގި ނަމަވެސް، މި ފަހުން އެ ޕާޓީން ސިޔާސީ އެއްވެސް ހަރަކާތެއް ހިންގައިފައެއް ނުވެއެވެ. އަދި ސިޔާސީ ޕާޓީއަށް ބޭނުންވާ 3،000 މެންބަރުން އެ ޕާޓީއަށް ހަމަވެފައިނުވާތީ އިލެކްޝަންސް ކޮމިޝަނުން ވަނީ އެ ޕާޓީ މިހާރު އުވާލައިފަ އެވެ.
