ބާޒާރުމަތީ ސަރަހައްދުގައި ހުންނަ ލިލީ އެފްއެންބީ ސަޕްލައި ބާޒާރު އެކެއްގައި ރޭ ދަންވަރު އަލިފާނުގެ ހާދިސާއެއް ހިނގައިފިއެވެ.
މި ހާދިސާއާއި ގުޅިގެން އެމްއެންޑީއެފްއިން ބުނެފައިވަނީ، މި ހާދިސާގެ މައުލޫމާތު އެމްއެންޑީއެފްގެ ފަޔާ އެންޑް ރެސްކިޔު ސާވިސްއަށް ރޭ ދަންވަރު 01:00 ހާއިރު ލިބިފައިވާ ކަމަށެވެ.
އެމްއެޑީއެފްއިން ބުނެފައިވާ ގޮތުގައި، މި ހާދިސާގެ މައުލޫމާތު ލިބުމާ އެކު، އެމްއެންޑީއެފްގެ ފަޔާ އެންޑް ރެސްކިޔު ސާވިސްގެ ފަޔާފައިޓަރުން އެ ސަރަހައްދަށް ގޮސް އަލިފާން ނިއްވުމުގެ މަސައްކަތްކޮށްފައިވާ ކަމަށެވެ. ފަޔާފައިޓަރުން ކުރި މަސައްކަތުން އެ ސަރަހައްދުގައި ރޯވެފައިވާ އަލިފާން ނިއްވާލެވުނީ ރޭ ދަންވަރު 02:39 ހާއިރުކަމަށް އެމްއެންޑީއެފް އިން ވަނީ ހާމަކޮށްފައެވެ.
މި ހާދިސާގައި އެއްވެސް މީހަކަށް އަނިޔާވެފައިނުވި ނަމަވެސް، އަލިފާން ނިއްވުމުގެ މަސައްކަތުގައި އުޅުނު ފަޔާފައިޓަރެއްގެ ހާލު ދެރަވެގެން، ސެނަހިޔާ މިލިޓަރީ ހޮސްޕިޓަލަށް ގެންގޮސް އޭނާއަށް ފަރުވާދެމުން އަންނަ ކަމަށް އެމްއެންޑީއެފް އިން ވަނީ ހާމަކޮށްފައެވެ.
މި ހާދިސާގައި ލިލީ ފިހާރައަށް ވަނީ ބޮޑެތި ގެއްލުންތަކެއް ލިބިފަ އެވެ. އެގޮތުން އެތަނުގައި ހުރި ގިނަ އަދަދެއްގެ މުދަލަށް ގެއްލުންވެ އެތަނުގެ ފުރާޅުން ބައެއް ވެއްޓިފައިވާ ކަމަށް އެމްއެންޑީއެފްއިން ވަނީ ހާމަކޮށްފައެވެ.
