ޢަމަލީ މަސައްކަތް ފެށި މުލަކު ބަނދަރާއެކު މަގުބައްތި ވެސް ހަރުކުރާނެ

މ. މުލަކު ބަނދަރު ހެދުމުގެ މަޝްރޫއުގެ އަމަލީ މަސައްކަތް އިއްޔެ ފަށައިފިއެވެ.

ރާއްޖޭގެ އަތޮޅުތަކަށް ކުރައްވަމުންދާ ދަތުރުފުޅުގައި ރައީސް އެރަށަށް ވަޑައިގަތުމާއި ގުޅިގެން ބޭއްވި ހާއްސަ ޖަލްސާގައި، މަޝްރޫއުގެ އަމަލީ މަސައްކަތް ފައްޓަވައިދެއްވީ ގެދޮރުވެރިކަމާއި ބިނާރާ ބެހޭ ވަޒީރު ޑރ. އަބްދުﷲ މުއްތަލިބެވެ.

މި މަޝްރޫއުގައި އެރަށުގެ ބަނދަރު ބޮޑުކުރެވި، ނެރު ފުންކުރެވޭނެ ކަމަށާއި، ކޮންކްރީޓް ބްރިޖް ހެދުމާއި ނެރު ބައްތި ޖެހުމާއި މަގު ބައްތި ހަރުކުރުމުގެ އިތުރުން ޕޭވްމަންޓް ހެދުން ހިމެނޭ ކަމަށް މިނިސްޓްރީން ބުންޏެވެ.

މި މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގް ކޮމްޕެނީ ޕަބްލިކް ލިމިޓެޑް (އެމްޓީސީސީ) އާއި ހަވާލުކުރީ 2023 ވަނަ އަހަރު 62634246.84 ރުފިޔާއަށެވެ.

މި މަޝްރޫއުގެ ދަށުން އައު ބަނދަރާއި ނެރު ފުން ކުރުމާއި ސޭންޑްފިލް ބްރޭކްވޯޓަރ ހެދުން އަދި އެއާއި ގުޅޭ އެންމެހާ ކަންތަކުގެ އިތުރުން ރިވެޓްމެންޓް ޖަހައި އެއްގަމު ތޮށި ލުމާއި އެއާއި ގުޅޭ އެންމެހާ ކަންކަން އެމްޓީސީސީން ކުރާނެ ކަމަށް އެ ކުންފުނިން ބުންޏެވެ.