ސަރުކާރުންވީ ހުރިހާ ވައުދެއް ފުއްދައިދިނުމަށް އަދި އިތުރު މަސައްކަތްތައް ކޮށްދިނުމުގައި ހާއްސަ އިސްކަންދެއްވައިގެން މަސައްކަތްކުރަމުން ގެންދަވާނެކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
ރައީސް މި މޭރުމުން ވިދާޅުވެފައިވަނީ، އެމަނިކުފާނު ފ. އަތޮޅުގެ މީހުން ދިރިއުޅޭ ރަށްރަށަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިިން އެ އަތޮޅުގެ ދަރަނބޫދޫއަށް ވަޑައިގެން، އެ ރަށުގެ ރައްޔިތުންނާ ބައްދަލުކުރައްވައި ވާހަކަފުޅުދައްކަވުންނެވެ.
މީގެ ތެރޭގައި އެ ރަށުގެ ބައެއް މަޝްރޫއުތަކުގެ އަމަލީ މަސައްކަތް ފެށިގެން ގޮސްފައިވާކަން އެމަނިކުފާނުގެ ވާހަކަފުޅުގައި ވަނީ ފާހަގަކުރައްވައިފަ އެވެ.
ސިއްހީ ދާއިރާ ތަރައްގީކުރުމަށް ދަރަނބޫދޫގެ ސިއްހީ މަރުކަޒަށް އިތުރުކުރެވޭ އިމާރާތުގެ ސަބަބުން، އެ ރަށުގެ ސިއްހީ މަރުކަޒަށް ބޭނުންވެފައި ހުރި ހުރިހާ ކަންތައްތަކެއް ފުރިހަމަކޮށްދިނުމުގެ ޖާގަ އަދި ވަސީލަތް އިތުރުވެގެންދާނެ ކަމަށާއި، އެތަނުގެ ހިދުމަތް 16 ގަޑިއިރަށް ހިދުމަތް ބަދަލުކުރެވިގެންދާނެ ކަމުގެ ޔަގީންކަން ރައީސް ދެއްވި އެވެ. މީގެ އިތުރުން އެ ރަށުގެ ސިއްހީ ހިދުމަތް ވަރުގަދަކޮށް ދިނުމަށްޓަކައި، ނަރުހެއް އިތުރުކުރުމަށް ކުރިއަށް އޮތް ހަފްތާގެ ތެރޭގައި ނަރުހެއް ނެގުމަށް އިއުލާންކުރަން ސަރުކާރުންދޭންޖެހޭ ހުއްދަ ދެއްވާނެކަމަށް ރައީސް ވަނީ ވިދާޅުވެފަ އެވެ.
ތައުލީމީ ދާއިރާއަށް ބަލާލާއިރު، އެ ރަށުގެ ސްކޫލަށް މަލްޓި ޕާޕަސް ހޯލެއްގެ މުހިއްމުކަމަށް ރައީސް ވަނީ އަލިއަޅުއްވާލައްވައިފަ އެވެ. އެގޮތުން މަލްޓީ ޕާޕަސް ހޯލެއްގެ އިތުރުން ތިން ކްލާސްރޫމް ވެސް އެ ސްކޫލަށް ބޭނުންވާކަމަށް އެމަނިކުފާނު ވިދާޅުވި އެވެ. އަދި އެ މަސައްކަތް އަވަސް މުސަތަގުބަލެއްގައި ފައްޓަވައިދެއްވާނެކަމުގެ ޔަގީންކަން އެމަނިކުފާނު ވިދާޅުވި އެވެ.
ކުޅިވަރުގެ ދާއިރާއިން އެ ރަށުގައި ފުޓްބޯޅަ ދަނޑެއް ހެދުމާއި، ވޮލީ ކޯޓެއް އެޅުމާއި، ފިޓްނެސް އެންޑް ރީކްރިއޭޝަން ސެންޓަރެއް ހެދުމުގެ މަސައްކަތަކީ އެމަނިކުފާނު ވެލެއްވި ވައުދުފުޅެއްކަން ހަނދާންކޮށްދެއްވަމުން ރައީސް ވިދާޅުވީ ފިޓްނެސް އެންޑް ރީކްރިއޭޝަން ސެންޓަރުގެ މަޝްރޫއުއާއެކީ އައުޓްޑޯ ވޮލީ ކޯޓުގެ މަސައްކަތް ވަރަށް އަވަސް މުސްތަގުބަލެއްގައި ފެށިގެންދާނެކަމަށެވެ. އަދި އެ ރަށު ފުޓް ބޯޅަ ދަނޑުގެ މަސައްކަތްވެސް ވަރަށް އަވަސް މުސްތަގުބަލުގައި ފެށިގެންދާނެކަމަށާއި، އެ ދަނޑުވެގެންދާނީ ރޭގަނޑުގެ ވަގުތުގައި ކުޅެވޭގޮތަށް ލައިޓްޖަހައިގެން ތަރައްގީކުރެވޭ ދަނޑަކަށް ކަމަށް އެމަނިކުފާނު ވިދާޅުވި އެވެ.
ފުޓްބޯޅަ ދަނޑާއެކު ރައްޔިތުންގެ އެދުމުގެ މަތިން ދުވާ ޓްރެކެއްވެސް ތަރައްގީކޮށްދެއްވާނެ ކަމަށާއި، ވަކި މަޝްރޫއުއެއް ގޮތަށް ހިމަނައިގެން އެ ރަށުގައި ބެޑްމިންޓަން ކޯޓެއް ތަރައްގީކޮށްދެއްވާނެކަމަށް ވެސް ރައީސް ވަނީ ވިދާޅުވެފަ އެވެ.
ފުލުހުންގެ ހިދުމަތް ނެތް 39 ރަށެއް މިއަހަރު ފެށުނުއިރު ރާއްޖޭގައި އޮތްކަން ފާހަގަކުރައްވައި ރައީސް ވިދާޅުވެފައިވަނީ، ގިނަ ރަށްތަކެއްގައި ފުލުހުންގެ މަރުކަޒުގެ އަމަލީ މަސައްކަތް މިހާރު ފެށިފައިވާކަމަށާއި މިއަހަރުގެ ތެރޭގައި ދަރަނބޫދޫގައި ވެސް ފުލުހުންގެ މަރުކަޒެއް ގާއިމުކޮށްދެއްވާނެކަމަށް ރައީސް ވިދާޅުވި އެވެ.
"އިރާދަކުރެއްވިއްޔާ އަޅުގަނޑުމެން މި މަސައްކަތްކުރަނީ މިގޮތަށްހުރި ހުރިހާ ރަށެއްގައި މިއަހަރުގެ ތެރޭގައި އަދި ބާކީ ގާތްގަނޑަކަށް 15 ވަރަކަށް ރަށް އެބައުޅޭ. ހުރިހާ ރަށެއްގައި އަމަލީގޮތުން ފުލުހުންގެ މަރުކަޒު އެޅުމުގެ މަސައްކަތް ފަށަން." ރައީސް ޑރ. މުއިއްޒު ވިދާޅުވި އެވެ.
ދަރަނބޫދޫގައި ކުރިއަށް ގެންދިއުމަށް ހަމަޖެހިފައިވާ މަޝްރޫއުތައް ފެންވަރު ރަނގަޅުގޮތެއްގައި ބާރު ސްޕީޑްގައި ކުރިއަށް ގެންގޮސްދެއްވާނެކަމުގެ ޔަގީންކަން ރައީސް ވަނީ ދެއްވައިފަ އެވެ.
