އެކައުންޓެއް ހުޅުވަން ކަމަށް ހެދިގެން އިންޑިއާގެ ވިޖަޔަޕޫރާ ޑިސްޓްރިކްޓްގެ ޗަޑްޗަންގައި ހުންނަ ސްޓޭޓް ބޭންކް އޮފް އިންޑިއާ (އެސް.ބީ.އައި)ގެ ބްރާންޗަށް ތިންމީހަކު ވަދެ 20 ކިލޯ ރަނާއި ގާތްގަނޑަކަށް 1.04 ކްރޯޑް ރުޕީސް (125،000 ޑޮލަރު)ގެ ނަގުދު ފައިސާ ފޭރިގަތުމަށް ފަހު ފިލައިފިއެވެ.
އިންޑިއާގެ ފުލުހުން ބުނި ގޮތުގައި މޫނު ނިވާކޮށްގެން ތިބި ތިން މީހުން އެ ބޭންކަށް ވަނީ ކަރަންޓް އެކައުންޓެއް ހުޅުވުމަށް ކަމަށާއި، ބޭންކަށް ވަނުމާއެކު ވަގުތުން އެ މީހުންގެ ކޮންޓްރޯލްގެ ދަށަށް ސެކިއުރިޓީ ގާޑު ގެނެސް އޭނާގެ ދެއަތް ވެސް ޕްލާސްޓިކް ކްލިޕް ބޭނުންކޮށްގެން ފުރަގަހަށް ބަނެވެ. އަދި ބޭންކުގައި އެ ވަގުތު ތިބީ ތިންހަތަރު ކަސްޓަމަރުން ކަމަށާއި ފިސްތޯލަ އާއި ވަޅިން ބިރުދައްކައި ކަސްޓަމަރުންނާއި ހުރިހާ މުވައްޒަފުންގެ އަތް ބަނދެފައިވާ ކަމަށް ފުކުހުން ބުނެއެވެ.
އިންޑިއާގެ މަސްދަރުތަކުގައި އެ ޤައުމުގެ ފުލުހުންނާއި ޙަވާލާދީ ބުނެފައިވާ ގޮތުގައި 3 މީހުންގެ އެ ގޭންގުން ވަނީ، މެނޭޖަރަށް މަޖުބޫރުކޮށްގެން އޭނާ ލައްވައި ރަންތައް ރައްކާކޮށްފައިވާ ލޮކަރުތައް ހުޅުވައި 20 ކިލޯގެ ރަނާއި 1.04 ކްރޯޑް ރުޕީސް ފޭރިގަތުމަށް ފަހު ފިލައިފައެވެ. އަދި އެ މީހުން ބޭނުންކުރި ވެހިކަލަކީ ވަގު ނަންބަރު ޕްލޭޓެއް ހަރުކޮށްފައިވާ ވެހިކަލެއް ކަމަށާއި އެއިން އެއްވެސް މީހަކު އަދި ނުފެންނަ ކަމަށެވެ.
މިއީ އިންޑިއާގައި ދޭތެރެދޭތެރެއިން ހިނގާ ކަންކަމެވެ. މިދިޔަ އަހަރު ވެސް އެސް.ބީ.އައި ގެ ބުރާންޗެއް ލޫޓުވައިލިއެވެ. އެއީ ކަރްނާޓަކާގައެެވެ. އެ ފަހަރު 13 ކްރޯޑް ރުޕީސް އާއި 17.7 ކިލޯގެ ރަން ނެގިއެވެ. އެ މައްސަލައިގައި ހިމެނޭ 6 މީހުން އިންޑިއާގެ ފުލުހުން ވަނީ ހައްޔަރުކޮށްފައެވެ.
