ދޮންފަނުން ފެށިގެން 700 މީޓަރު ސަރަހައްދުގައި ފީނުމާއި ޑައިވުކުރުން ވަގުތީގޮތުން މަނާކޮށްފި އެވެ.
ދޮންފަނު ކައުންސިލްގެ އިދާރާއިން މިއަދު ކުރި އިއުލާނެއްގައި ބުނީ ދޮންފަނު ބިންހިއްކުމަށްޓަކައި މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީއާއި ހަވާލުކުރެވިފައިވާ ޕްރޮޖެކްޓުން ބިން ހިއްކުމުގެބައި އުނިކޮށް ބިން ނުހިއްކާގޮތަށް ސަރުކާރުން ހަމަޖެއްސުމާއި ގުޅިގެން، އެކަމަށް އިހްތިޖާޖުކުރުމުގެ ގޮތުން މިހާރު ދޮންފަނުގައި ސިލްސިލާކޮށް ރައްޔިތުން ކުރިއަށް ގެންދާ މުޒާހަރާތަކުގެ ތެރެއިން ދޮންފަނުގެ ފަރުން ފެށިގެން 700 މީޓަރުގެ ސަރަހައްދުގައި ކަނޑުމަތީގައި ސިލްސިލާކޮށް މުޒާހަރާތަށް ކުރިއަށް ގެންދަން ވަނީ ނިންމާފައިކަމަށެވެ.
އެގޮތުން މުޒާހަރާ ކުރިއަށްދާ ވަގުތު ތަކުގައި މަތީގައި ބަޔާންކޮށްފައިވާ ސަރަހައްދުގައި ފީނުމާއި ޑައިވްކުރުމަކީ ރައްކާތެރިކަމެއް ނޫން ކަމަށް ދެކޭތީކަމަށް ކަމަށް އިއުލާނުގައި ބުނެފައިވެ އެވެ.
Advertisement
އަދި ނުރައްކަލެއް ކުރިމަތިވެދާނެ ކަމުގެ ހާދިސާއެއް ހިނގުމަށް ފުރުސަތު އޮތްކަމެއްކަމަށް އެ ކައުންސިލަށް ފެންނާތީ އެ ކައުންސިލުން ވަކި ގޮތެއް ކަނޑައަޅާ އަންގަންދެން މިއަދުން ފެށިގެން އެ ސަރަހައްދުގައި އެއްވެސް ފަރާތަކުން ފީނުމާއި، ޑައިވްކުރުމަކީ މަނާކަމެއްކަމަށް އެ އިދާރާއިން ބުންޏެވެ.
ދޮންފަނުގެ ބިން ހިއްކުމާއިމެދު ބ އަތޮޅުގެ ރައްޔިތުންގެ މެދުގައި ހިޔާލުތަފާތުވުން ވަނީ އުފެދިފަ އެވެ. ދޮންފަނު ރައްޔިތުން އެރަށުގެ ބިންހިއްކައި ގޮނޑުދޮށް ހިމާޔަތްކުރުމަށް ބޭނުންވާތީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެ މަޝްރޫއު ކުރިއަށްގެންދަވަން ނިންމި އެވެ. ނަމަވެސް ދޮންފަނުގެ ބިންހިއްކަން ފެށުމުން އެ އަތޮޅުގައި ހިމާޔަތްކޮށްފައި އޮންނަ ހަނިފަރަށް އެކަމުގެ އަސަރުކޮށް އެތަނަށް އަރާ އެންމަޑިތަކަށް ގެއްލުންވާނެތީ އެކަމާ ދެކޮޅަށް އެތައް ބަޔަކު ވަނީ ސޯޝަލްމީޑިއާ މަންސަތަކުގައިވެސް ކަންބޮޑުބުން ފާޅުކޮށްފަ އެވެ. އަދި ރައްޔިތުންގެ މި ކަންބޮޑުވުންތަކާ ގުޅިގެން ރައީސް މުއިއްޒު ވަނީ ދޮންފަނު ބިންހިއްކުމުގެ މަޝްރޫއު ކުރިއަށްނުގެންދަވަން ނިންމަވާފަ އެވެ.
