މާލޭގެ މަގުތަކުގައި ހަތަރު ފުރޮޅުލީ އުޅަނދުތަކަށް ހާއްސަކޮށް ޕާކުކުރުމަށް ކުއްޔަށް ދޫކޮށްފައި ހުރި ޕާކިން ސްލޮޓުތައް ކެންސަލްކުރުމަށްފަހު، އާންމުންނަށް ހުޅުވައިލުމަށް ސަރުކާރުން ނިންމައިފި އެވެ.

ހަތަރު ފުރޮޅުލީ އުޅަނދުތަކަށް ހާއްސަކޮށް ޕާކުކުރުމަށް، ކުއްޔަށް ދޫކޮށްފައި ހުރި ޕާކިން ސްލޮޓުތަކަކީ މާލޭ ސިޓީ ކައުންސިލުން ކުއްޔަށް ދޫކޮށްފައި ހުރި ސްލޮޓުތަކެކެވެ. މި ކަމާ ގުޅިގެން މާލޭ ސިޓީގެ މޭޔަރު އާދަމް އާޒިމް ވިދާޅުވެފައިވަނީ، އެ ސްލޮޓުތައް އާންމުންނަށް ބޭނުންކުރެވޭ ގޮތަށް ހެދުމަށް، ޓްރާންސްޕޯޓް މިނިސްޓްރީން މާލޭ ސިޓީ ކައުންސިލަށް އަންގާފައިވާ ކަމަށެވެ.

މޭޔަރު އާޒިމް ވިދާޅުވި ގޮތުގައި، މާލޭ ސިޓީ ކައުންސިލުން އަމިއްލަ ފަރާތްތަކަށާއި، ޓެކްސީތަކަށް ކުއްޔަށް ދޫކޮށްފައި ހުރި ޕާކިންގެ އަދަދު 1،000 އަށް އަރާނެ އެވެ. މިހާތަނަށް ޕްރައިވެޓް އުޅަނދުތަކަށް ޕާކިން ސްލޮޓެއް ކުއްޔަށް ދޫކުރަމުން އައީ މަހަކު 1,500 ރުފިޔާއަށެވެ. އަދި ޓެކްސީތަކަށް ޕާކިން ސްލޮޓް ދޫކުރަމުން އައީ މަހަކު 700 ރުފިޔާއަށެވެ.

ރައީސުލްޖުމްހޫރިއްޔާ ޑރ. މުހައްމަދު މުއިއްޒު ރިޔާސީ އިންތިހާބުގެ ކެމްޕޭނުގައި، ޕާކު ކުރާނެ ތަނެއް ނުދައްކާ އުޅަނދުތަކުގައި ސްޓިކާ ނުޖަހާނެ ކަމަށާއި، މި މައްސަލައަށް ހައްލެއް ހޯއްދަވައިދެއްވާނެކަމަށް ވަނީ ވިދާޅުވެފަ އެވެ.

މާލޭގެ ޕާކިން މައްސަލައަށް ހައްލެއް ހޯދުމުގެ ގޮތުން ޕާކިންއަށް ހާއްސަކޮށް އިމާރާތްތަކެއް ހެދުމަށް ސަރުކާރުން އަންނަނީ މަސައްކަތް ކުރަމުންނެވެ.