އައްޑޫ ސިޓީ މަރަދޫފޭދޫއަށް ނަގޫރޯޅިއެއް އަރައި އެރަށުގެ ގެތަކަކަށް ބޮޑެތި ގެއްލުންތަކެއް ލިބިއްޖެ އެވެ.
އެރަށުން ވާހަކަ ދެއްކި މީހަކު "ޚުލާސާ" އަށް މައުލޫމާތު ދެމުން ބުނެފައިވަނީ، ނަގޫރޯޅީގެ ސަބަބުން އެރަށުގެ ހަތް ގެއެއްގެ ފުރާޅު އެއްލާލައިފައިވާ ކަމަށެވެ. މީގެ ތެރޭގައި އެރަށު ހިނަވާގެއާއި މިސްކިތެއްވެސް ހިމެނޭކަމަށް އޭނާ ވަނީ ބުނެފަ އެވެ.
މި ހާދިސާ ހިނގާފައިވަނީ މިއަދު ހެނދުނު 08:45 ހާއިރު ކަމަށް މައުލޫމާތު ލިބެ އެވެ.
މި ހާދިސާ ހިނގުމާ ގުޅިގެން ނޭޝަނަލް ޑިޒާސްޓާ މެނޭޖްމަންޓް ސެންޓަރު (އެންޑީއެމްސީ) އާއި ގުޅިގެން އައްޑޫ ސިޓީ ކައުންސިލުން އަންނަނީ ގެއްލުން ލިބުނު ފަރާތްތަކަށް ބޭނުންވާ އެހީތެރިކަން ދެނެގަނެ އެ ފަރާތްތަކަށް އެހީތެރިކަން ފޯރުކޮށްދިނުމުގެ މަސައްކަތް ކުރަމުންނެވެ.
މިކަމާއި ގުޅިގެން މޫސުމާއި ބެހޭ ގައުމީ އިދާރާ، މެޓް އޮފީހުން ބުނެފައިވަނީ އައްޑޫ ސިޓީއަށް ވިއްސާރައިގެ އަސަރު މާބޮޑަށް ނުކުރާނެ ކަމަށެވެ. އެހެންނަމަވެސް ހުޅަނގާއި ހުޅަނގު އުތުރުން ގަޑިއަކު 13 މޭލާއި 23 މޭލާ ދެމެދުގެ ބާރުމިނެއްގައި ވައިޖެހޭނެ ކަމަށް ލަފާކުރެވޭ ކަމަށް މެޓް އޮފީހުން ވަނީ ބުނެފަ އެވެ.
މި ހާދިސާ އާއި ގުޅިގެން އެއްވެސް މީހަކަށް ގެއްލުން ލިބިފައިވާކަމަށް ރިޕޯޓްކޮށްފައެއް ނުވެއެވެ.
