އިންތިޒާރެއްގެ ނިމުން އަންނަނީ އެވެ. ގިނަ ބަޔަކު އުންމީދުކުރާ އައިފޯން 17 ސީރީޒް އަންނަ އަންގާރަ ދުވަހު ދައްކާލަން އެ ކުންފުނިން ނިންމާފައިވާއިރު މިއީ މިހާތަނަށް އެޕަލް އިން ބާއްވާ އެންމެ ހިތްގައިމު އެއް އިވެންޓު ކަމަށް އެ ކުންފުނިން ވަނީ ބުނެފަ އެވެ.

އައިފޯން 17 ސީރީޒްގައި އެޕަލް އިން ހަތަރު މޮޑެލް އެއް ނެރޭނެ ކަމަށް ބެލެވެ އެވެ. އެއީ:

- އައިފޯން 17

- އައިފޯން 17 އެއާ (އައު ވޭރިއަންޓް)

- އައިފޯން 17 ޕްރޯ

- އައިފޯން 17 ޕްރޯ މެކްސް

މި ފަހަރު ނިކުންނަ މޮޑެލްތަކުގެ ތެރޭގައި "ޕްލަސް" އެއް ނުހިމެނޭނެ އެވެ. ސަބަބަކީ އެ މޮޑެލްގެ ޑިމާންޑް ދަށްވުން ކަމުގައި ޓެކް ދާއިރާގެ އުޅޭ ތަޖުރިބާކާރުން ރިޕޯޓުކޮށްފައިވެ އެވެ.

ރިޕޯޓުތައް ބުނާ ގޮތުގައި ސްޓްރީމްލައިންޑް ޑިޒައިންތަކާއި އަދި ބާރުގަދަ އޭ19 އަދި އޭ19 ޕްރޯ ޗިޕެއް 17 ގެ ސީރީޒް ތަކުގައި އެކުލެވިގެންވެ އެވެ. އަދި ރަނގަޅު ކެމެރާ ފީޗާސްތަކާއި އާއި ބެޓެރީގެ ލައިފް ދިގުވާނެ ކަމަށް ވެސް ރިޕޯޓުތައް ބުނެ އެވެ. އަދި އެންމެ މުހިންމު ފީޗާއެއް ކަމަށް ރިޕޯޓުތަކުން ބުނެފައިވަނީ ޕްރޯ މޮޑެލްތަކުގައި ގިނަ ބަޔަކު އުންމީދު ކުރަމުން އަންނަ އަންޑަ ޑިސްޕްލޭ ފޭސް އައިޑީ ހުންނާނެ އެވެ.

ސެޕްޓެމްބަރު 12 ވަނަ ދުވަހު ޕްރީ އޯޑަރަށް ހުޅުވާލާ މި ފޯނުތަކުގެ އަގަކަށް މާ ބޮޑު ބަދަލެއް އަންނާނެ ކަމަށް ނުބެލެވެ އެވެ. އައިފޯނު 17 ފޯނުތައް ފަށާ އަގު ކަމަށް ބެލެވެނީ 799 ޑޮލަރެވެ. އަދި އައިފޯން 17 އެއާ 899 ޑޮލަރަށް ގަންނަން ލިބޭނެ ކަމަށް އަންދާޒާ ކުރެވޭއިރު އައިފޯން 17 ޕްރޯ ގެ އަގު އުޅޭނެ ކަމަށް ބެލެވެނީ 1،099 ޑޮލަރަށެވެ. 17 ޕްރޯ މެކްސް ގެ އަގު 1،199 ނުވަތަ އެއަށް ވުރެ މަތިވާނެ ކަމަށް ބެލެވެ އެވެ. އެޕަލްގެ ފިހާރަތަކުން މި ފޯނުތައް ގަންނަން ލިބޭނީ މި މަހު 19 ވަނަ ދުވަހު އެވެ.

ދިވެހިންނަކީ އަބަދުވެސް އަގުބޮޑު ސާމާނުތައް ގެންގުޅެން ބޭނުންވާ ބައެކެވެ. ފަހުގެ ފޯނުތަކާއި އެހެން އިލެކްޓްރޯނިކް ސާމާނުތައް ދެކެ ލޯބިވާ ބައެކެވެ. އަދި ހާއްސަކޮށް ފަހުގެ އައިފޯނު ނިކުންނާނެ ދުވަހެއްގެ އިންތިޒާރުގައި ތިބޭ ބައެކެވެ. ކިތަންމެ ބިކާރި ހާލުގައި ތިއްބަސް ބޭނުންވަނީ އެންމެ ފަހުން ނިކުންނަ އައިފޯނެވެ.