އެސްޓީއޯއިން ހުޅުމާލޭގައި އިމާރާތްކުރަމުން އައި ހޮޓަލާއި ލާޖައްސައި ހުޅުމާލެއިން ބިމެއް ގަނެފި އެވެ.
އެސްޓީއޯ އިން މިއަދު ނެރުނު ބަޔާނެއްގައި ބުނީ އެ ކުންފުނިން ހަދަމުން އައި ސިޓީ ހޮޓަލުގެ އިމާރާތް 20 މިލިއަން ޑޮލަރަށް އަގުކޮށް ހުޅުމާލެ ދެވަނަ ފިޔަވަހިން ބިމަކަށް ބަދަލުކުރުމަށް އެޗްޑީސީއާއެކު މިދިޔަ އާދީއްތަ ދުވަހު އެއްބަސްވުމެއްގައި ސޮއިކޮށްފައިވާ ކަމަށެވެ. އަދި މި މުއާމަލާތާއި ގުޅިގެން ކުންފުނީގެ ހިސާބުތަކަށް އައިސްފައިވާ ބަދަލުތަކުގެ ތަފްސީލު، ކުންފުނީގެ މި އަހަރުގެ މާލީ ބަޔާންތަކުގައި ހިމެނޭނެ ކަމަށްވެސް ބުންޏެވެ.
އެސްޓީއޯ އިން ބުނީ މި އިއުލާނު ކުރީ ކެޕިޓަލް މާކެޓް ޑިވަލޮޕްމަންޓް އޮތޯރިޓީގެ ކޮންޓިނުއިން ޑިސްކްލޯޝާ އޮބްލިގޭޝަންސް އޮފް އިޝުއާޒްގެ (ސީޑީއޯއައި) ރެގިއުލޭޝަންގެ ދަށުން ކަމަށެވެ.
އެސްޓީއޯ އިން ހުޅުމާލޭގައި ހަދަން ފެށިނަމަވެސް މަސައްކަތް ނުނިމި ދިގުލައިގެން ގޮސްފައިވާ އިމާރާތަކީ ފަސް ތަރީގެ ހޮޓަލެއްގޮތަށް ތަރައްގީކުރަން ފެށި އިމާރާތެކެވެ. 2006 ގައި ފެށި އެ މަސައްކަތުގެ ދަށުން "ރެޑިސަން ހުޅުމާލެ މޯލްޑިވްސް" ގެ ނަމުގައި އެމެރިކާގެ ކާލްސަން ގުރޫޕާ ގުޅިގެން 250 ކޮޓަރީގެ ފަސް ތަރީގެ ހޮޓަލެއް އަޅަން ފެށީ 2011 ގަ އެވެ.
ނަމަވެސް އެތަނުގެ މަސައްކަތް ހުއްޓުމާ ގުޅިގެން، އެކި ފަހަރު މަތިން އެތަން ވިއްކާލަން އެސްޓީއޯއިން މަސައްކަތް ކުރި އެވެ. އަދި އެ ތަނަށް ބޮޑު އިންވެސްޓެއްކޮށް އެއްވެސް އާމްދަނީއެއް ނުލިބި ގިނަ ދުވަސްވާތީ އެ ކުންފުންޏަށް ދިޔައީ ބޮޑެތި ގެއްލުންތަކެއް ވަމުންނެވެ.
އެތަން ހުންނަނީ ހުޅުމާލޭ ފުރަތަމަ ފިޔަވަހީގައެވެ. އެ އިމާރާތުގައި މީޑިއާތަކަށް ހާއްސަ މީޑިއާ ވިލެޖާ އެކު، އާ ފަސް ތަރީގެ ހޮޓަލެއް ހެދުމަށް އެޗްޑީސީން މިހާރު ވަނީ ދުބާއި ކުންފުންޏަކާ ހަވާލުކޮށްފަ އެވެ.
މީޑިއާތަކަށް ހާއްސަ ކޮށްގެން ހަދާ މި މީޑިއާ ވިލެޖެކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދެކެވެ.
