ހުޅުމާލޭގެ ދެވަނަ ފިޔަވަހީގައި ގާއިމުކޮށްފައިވާ ހިޔާ ފްލެޓް ޓަވަރުތަކަށް އިތުރު ލިފްޓް ހަރުކުރުމުގެ މަސައްކަތުގެ 66% ނިމިއްޖެކަމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ހާމަކޮށްފި އެވެ. މި މަޝްރޫޢުގެ ދަށުން ހުރިހާ ޓަވަރުތަކުގައިވެސް މަސައްކަތް މިހާރު ދަނީ ހަލުވިކަމާއެކު ކުރިއަށްކަމަށާއި، އެންމެ އަވަހަށް ޚިދުމަތް ދޭން ފަށާނީ ޓަވަރު ތިނެއް އަދި ހަތަރެއްގައި ކަމަށްވެސް އެޗްޑީސީން ބުންޏެވެ.

މި މަޝްރޫޢަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ހިޔާ ފްލެޓްގެ ރައްޔިތުންނަށް ވެވަޑައިގެންފައިވާ ވަރަށް މުހިންމު ވަޢުދެކެވެ. އެގޮތުން ހިޔާގެ ކޮންމެ ޓަވަރަކަށް ދެ ލިފްޓް އިތުރުކޮށްދެއްވުމަކީ ރައީސް މުޢިއްޒުގެ ވަޢުދެކެވެ. މިހާރު ހިޔާގެ ފްލެޓްތަކުގައި ހުންނަނީ ތިނެއް ނުވަތަ ހަތަރު ލިފްޓެވެ. ޖުމްލަ 16 ޓަވަރުގައި އިތުރަށް 32 ލިފްޓް ހަރުކުރުމުގެ މަސައްކަތް މިހާރު ދަނީ ކުރިއަށެވެ.

އެޗްޑީސީން ދިން މަޢުލޫމާތަށް ބަލާއިރު، ހިޔާ ޓަވަރުގައި އިތުރު ލިފްޓް ހަރުކުރުމުގެ މުޅި މަޝްރޫޢުގައި ޓަވަރުތަކުގެ ލިފްޓް ސްޓްރަކްޗަރގެ މަސައްކަތްތަކުގެ %43 ނިމިފައިވާއިރު، ލިފްޓް އިންސްޓޯލްކުރުމުގެ %38 މަސައްކަތް ވަނީ ނިންމާފަ އެވެ.

ޓަވަރުތަކުގެ މަސައްކަތް ވަކިވަކިން ބަލާލާއިރު:

1. ޓަވަރު 1 އަދި 2: މި ޓަވަރުތަކުގައި ލިފްޓް ބަހައްޓާ ނިމި ބޭނުންކުރަން ވަނީ ފަށާފައެވެ. ނަމަވެސް މި ލިފްޓްތަކުގައިވެސް އިތުރަށް ރަނގަޅުކުރަން ހުރި ކަންކަން ދެނެގަނެ ރަނގަޅުކުރުމުގެ މަސައްކަތް ކުރަމުންދާކަމަށް އެޗްޑީސީން ބުންޏެވެ.
2. ޓަވަރު 3-9: މި ޓަވަރުތަކުގެ ލިފްޓް ބެހެއްޓުމަށް ބޭނުންވާ ސްޓްރަކްޗަރަލް މަސައްކަތްތައް ވަނީ ނިމިފަ އެވެ.
3. ޓަވަރު 3 އަދި 4: މި ޓަވަރުތަކުގައި ލިފްޓް ހަރުކޮށް، ފިނިޝިން މަސައްކަތްތައް މިހާރު ދަނީ ކުރަމުންނެވެ. މި ލިފްޓްތައް ވަރަށް އަވަހަށް ބޭނުންކުރަން ފަށާނެއެވެ.
4. ޓަވަރު 5-6: ލިފްޓް އިންސްޓޯލްކުރުމުގެ މަސައްކަތް ދަނީ ކުރިއަށެވެ.
5. ޓަވަރު 7-12: ސްޓީލް ސްޓްރަކްޗަރގެ މަސައްކަތްތައް ދަނީ ކުރިއަށްގެންދަމުންނެވެ.
6. ޓަވަރު 13-16: ލިފްޓް ބެހެއްޓުމުގެ ފައުންޑޭޝަން މަސައްކަތްތައް މިހާރު މުޅިން ނިމިފަވާކަމަށް އެޗްޑީސީން މަޢުލޫމާތުދެ އެވެ.

އަލަށް ބަހައްޓާ މި ލިފްޓްތަކަކީ ޒަމާނީ ފެންވަރަށް ތަރައްގީކޮށްފައިވާ، ބަލި މީހުން އުފުލޭނެ އިންތިޒާމާއެކު، ސްޓްރެޗަރ އެރުވޭގޮތަށް ހުންނަ ލިފްޓުތަކެކެވެ. މީގެ އިތުރުން ލޮލުގެ ފެނުމުން މަހުރޫމްވެފައިވާ މީހުންނަށް ފަސޭހަވާނެހެން، މި ލިފްޓުތަކުގައި ފްލޯ ނަމްބަރު ބްރެއިލްއިންވެސް ހުންނާނެ އެވެ.

ސަރުކާރުން މަސައްކަތްކުރަނީ މި އަހަރުގެ ތެރޭގައި، ހިޔާގެ ޓަވަރުތަކަށް ލިފްޓް އިތުރުކުރުމުގެ މަސައްކަތްތައް ނިންމާލުމަށެވެ. މި މަސައްކަތް ކުރިއަށްގެންދަނީ ޗައިނާގެ ޝެންޔަންގް ޔުއާން އިންޓެލެކްޗުއަލް ގްރޫޕާއި ހަވާލުކޮށްގެންނެވެ.

ހިޔާ މަޝްރޫޢަކީ ޖުމްލަ 6720 ހައުސިން ޔުނިޓް ހިމެނޭ މަޝްރޫއެކެވެ. ކޮންމެ ޓަވަރެއްގައި 400އެއްހާ އެޕަރޓްމަންޓް ހިމެނޭއިރު، ކޮންމެ ޓަވަރެއްގެ އާބާދީ 2000އާއި ގާތްކުރެއެވެ. ލިފްޓްގެ ދަތިކަމަކީ ހިޔާގެ ރައްޔިތުންނަށް ކުރިމަތިވެފައިވާ އެންމެ ބޮޑު އެއް ގޮންޖެހުމަށް ވެފައި ވަނިކޮށް، މި މަޝްރޫއު ނިމުމުން ރައްޔިތުންނަށް ބޮޑު ހިތްހަމަޖެހުމެއް ލިބިގެންދާނެކަމަށް އެޗްޑީސީން ފާހަގަކުރެ އެވެ.