ކޮންމެވެސް ދުވަހަކުން ޗެމްޕިއަންސް ލީގުގެ ތަށި އަނބުރާ ބާސެލޯނާ އަށް ހޯދައިދޭނެ ކަމަށް ބުނި މެސީ އެ ކުލަބުން ފިލައި ޕީއެސްޖީ އިނދަޖައްސާލުމަށްފަހު އެންމެ ފަހުން އިންޓަރ މިއާމީ ލީގު ކަޕުގެ ފައިނަލުގެ ތަށި އެ ޓީމަށް ގެއްލުވާލައިފި އެވެ. އެމެރިކާ ލީގު ކަޕުގެ ފައިނަލުގައި ސީޓަލް ސައުންޑާސް އަތުން މިއާމީ ބަލިވެފައިވަނީ 0-3 ގެ ނަތީޖާއިންނެވެ.
2018 ވަނަ އަހަރު ޕްރީ ސީޒަނުގައި ޖޯން ގެމްޕަރ ޓްރޮފީ މެޗުގައި ބޮކަރ ޖޫނިޔާސް އާ ދެކޮޅަށް ބާސެލޯނާ ކުޅުނު މެޗުގެ ކުރިން ކޭމްޕް ނޯ ގައި އޭނާ ސަޕޯޓަރުންނަށް ވައުދުވީ "ޗެމްޕިއަންސް ލީގުގެ ތަށި އަނބުރާ ކޭމްޕް ނޯ އަށް އަންނާނެ" މިހެންނެވެ. ނަމަވެސް އޭގެ ތިން އަހަރު ފަހުން އޭނާ ބާސެލޯނާ ދޫކޮށް ޕީއެސްޖީ އަށް ދިޔައިރު ވެސް އަދި އޭގެ ފަހުން ވެސް ބާސެލޯނާ އަށް ޗެމްޕިއަންސް ލީގުގެ ތައްޓެއް ލިބިފައެއް ނުވެއެވެ. އަދި ޕީއެސްޖީ ގައި ވެސް އޭނާ އަށް އެ ތައްޓެއް ކާމިޔާބު ވެފައެއް ނުވެއެވެ. ނަމަވެސް މި ފަހުން ޕީއެސްޖީ ވަނީ ފުރަތަމަ ފަހަރަށް އެ ތަށި ކާމިޔާބުކޮށްފައެވެ.
ސީޓަލް ސައުންޑާސް ގެ ދަނޑުގައި ކުޅުނު މި މެޗުގައި ދެ ޓީމަށް ވެސް ގޯލު ޖަހާނެ ރަނގަޅު ފުރުސަތުތަކެއް ލިބި ވަނީ ބޭކާރުކޮށްލާފައެވެ. އެ ގޮތުން 39 ވަނަ މިނެޓުގައި ސީޓަލް ސައުންޑާސް ގެ ފޯވާޑު ޖީސަސް ފެރެއިރާ ފޮނުވާލި ނުރައްކާތެރި ހަމަލާ އަމާޒުވީ ގޯލުގެ ދަނޑި އަށެވެ. އަ އޭގެ އިތުރުން 48 ވަނަ މިނެޓުގައި މެސީ އަށް ލިބުނު ހުސް ފުރުސަތު ގޯލު ކުރިމަތިން އޭނާ ފޮނުވާލީ ދަނޑިމަތިން ބޭރަށެވެ. އަދި 61 ވަނަ މިނެޓުގައި ތަޑޭއޯ އެލެންޑޭ އަށް ލިބުނު ހުސް ފުރުސަތުވެސް އޭނާ ވަނީ ބޭކާރުކޮށްލާފައެވެ.
Advertisement
ސީޓަލްގެ ފުރަތަމަ ގޯލު ފުރަތަމަ ހާފުގެ 26 ވަނަ މިނެޓުގައި އޮސާޒޭ ޑި ރޮސާރިއޯ ކާމިޔާބުކޮށްފައިވަނީ އެލެކްސް ރޮލްޑަން ނެގު ހުރަހެއް ބޮލުން ވައްދާލައިގެންނެވެ. ދެވަނަ ގޯލު 84 ވަނަ މިނެޓުގައި އެ ކުލަބަށް ކާމިޔާބުކޮށްދިނީ ލިބުނު ޕެނަލްޓީއެއްގައި ރޮލްޑަން އެވެ. އަދި ތިން ވަނަ ގޯލު 88 ވަނަ މިނެޓުގައި މިއާމީ ގެ ޑިފެންޑަރުން ހެދި ގޯހެއްގެ ބޭނުންހިފައި ޕައުލް ރޮތްރޮކެވެ. މި ގޯލު އޭނާ ޖަހާފައިވަނީ ވެސް ރޮލްޑަން އެވެ.
މި ސީޒަނުގައި އިންޓަރ މިއާމީ އަދި މެސީ އަށް އެއްވެސް ތައްޓެއް ކާމިޔާބުވެފައެއް ނުވެއެވެ. ލީގުގައި މިހާތަނަށް 25 މެޗު ކުޅެފައިވާއިރު 46 ޕޮއިންޓާއެކު އެ ކުލަބު އޮތީ ނުވަ ވަނައިގައެވެ.
